[Rasmei Kampuchea Daily News] - ក្នុងសប្ដាហ៍នេះ នឹងបើកការដ្ឋានជួសជុលកំណាត់ផ្លូវជាតិលេខ៦ និងដាក់បំពង់លូ ដែលស្ថិតក្នុងភូមិសាស្ត្រ រាជធានីភ្នំពេញ
ភ្នំពេញ៖ ដើម្បីសម្រួលដល់ការធ្វើចរាចរណ៍ ប្រកបដោយសុវត្ថិភាព រដ្ឋបាលរាជធានីភ្នំពេញ បានអនុញ្ញាតឱ្យមន្ទីរសាធារណការ និងដឹកជញ្ជូន រាជធានីភ្នំពេញ ចាប់ផ្ដើមជួសជុលកំណាត់ផ្លូវជាតិលេខ៦ និងដាក់បំពង់លូ ដែលស្ថិត ក្នុងភូមិសាស្ត្រ រាជធានីភ្នំពេញ ដើម្បីបម្រើដល់ការចូលរួម ប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ ដែលអាចបណ្តាលឱ្យមានការរំខាន ដល់ប្រជាពលរដ្ឋ ដែលធ្វើដំណើរឆ្លងកាត់ និងកំពុងរស់នៅតាមបណ្ដោយផ្លូវនេះ ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងនៅព្រឹកថ្ងៃទី១៣ កញ្ញា ២០២២ នេះថាៈ ការងារជួសជុលចាក់អ៊ុតកៅស៊ូ និងដាក់ប្រព័ន្ធលូ នៅផ្លូវជាតិលេខ៦ នឹងដំណើរការក្នុងសប្ដាហ៍នេះ ចន្លោះពីថ្ងៃទី១៣ ទៅ ១៤ ឬ ១៥ កញ្ញានេះ តទៅ ដូច្នេះបងប្អូនដែលធ្វើដំណើរតាមផ្លូវខាងលើ ដើម្បីជៀសវៀងការស្ទះចរាចរណ៍ ត្រូវទៅតាមផ្លូវវាង។
នៅក្នុងសេចក្តីជូនដំណឹង ចេញនៅល្ងាចថ្ងៃទី១២ ខែកញ្ញា ឆ្នាំ២០២២នេះ រដ្ឋបាលរាជធានីភ្នំពេញ ក៏បានអំពាវនាវដល់ប្រជាពលរដ្ឋ ដែលកំពុងរស់នៅ និងធ្វើចរាចរណ៍ ឆ្លងកាត់លើកំណាត់ផ្លូវផ្លូវជាតិលេខ៦ ដែលស្ថិតក្នុងភូមិសាស្ត្រ រាជធានីភ្នំពេញ សូមមេត្តាយោគយល់អធ្យាស្រ័យ ចំពោះការរំខាន ក្នុងដំណើរការការដ្ឋាននេះ៕
