លោកហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន បានឱ្យវិទ្យុវាយោដឹងថានៅថ្ងៃទី០៦ ខែកញ្ញា ឆ្នាំ២០២២នេះថា ការអនុវត្តកម្មវិធីដកពិន្ទុបណ្ណបើកបរ និងការបង់ប្រាក់ពិន័យអន្តរការណ៍ ដែលរៀបចំដោយក្រសួងសាធារណការ និងដឹកជញ្ជូន និងក្រសួងមហាផ្ទៃ តាំងពីចាប់ផ្តើមអនុវត្តពីថ្ងៃទី០១កញ្ញា មកដល់ពេលនេះគឺបានប្រព្រឹត្តិទៅដោយរលូន។ ជាមួយគ្នានេះលោកហ៊ាង សុទ្ធាយុត្តិ ក៏បានថ្លែងថាទោះជាការអនុវត្តច្បាប់បានប្រព្រឹត្តទៅដោយរលូនក្តី ប៉ុន្តែក៏នៅមានចំណុចខ្លះដែលត្រូវការពេលពន្យល់ណែនាំប្រជាពលរដ្ឋបន្ថែមទៀតផងដែរ។ យ៉ាងណាមិញលោកថាការអនុវត្តតាមប្រកាសអន្តរក្រសួងស្តីពីនីតិវិធីនៃការដក និងបំពេញពិន្ទុឡើងវិញសម្រាប់បណ្ណបើកបរ គឺមានរាប់រយករណីក្នុងមួយថ្ងៃៗ។សូមជម្រាបថា បើយោងតាមប្រកាសអន្តរក្រសួងស្តីពីនីតិវិធីនៃការដក និងបំពេញពិន្ទុឡើងវិញសម្រាប់បណ្ណបើកបរ បានឱ្យដឹងថាក្នុងករណីពិន្ទុត្រូវបានកាត់បន្ថយមួយចំនួនហើយ ប៉ុន្តែក្នុងរយៈពេលបីឆ្នាំបន្ទាប់ពីការកាត់បន្ថយពិន្ទុចុងក្រោយ អ្នកបើកបរពុំមានបទល្មើសចរាចរណ៍អ្វីមួយបន្ថែមទៀតដែលនាំឱ្យមានការកាត់បន្ថយពិន្ទុនោះទេ នោះអ្នកបើកបរត្រូវទទួលបានការបំពេញពិន្ទុឡើងវិញដោយស្វ័យប្រវត្តិដែលមានចំនួន១២ពិន្ទុ៕