ភ្នំពេញ ៖ ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និង ដឹកជញ្ជូន បានឱ្យដឹងថា ប្រជាពលរដ្ឋចាប់ផ្តើមយល់ដឹងច្រើនពីការដឹកជញ្ជូនទំនិញលើសទម្ងន់កំណត់ ខណៈដែលការផាកពិន័យលើយានយន្តដឹកទំនិញលើសទម្ងន់កំណត់នៃច្បាប់ ក្នុងរយៈពេល ៧ខែ ឆ្នាំ២០២២នេះ មានការថយចុះជាងរយៈពេលដូចគ្នាកាលពីឆ្នាំមុន។ កិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី១ និងលើកទិសដៅ ការងារ ឆមាសទី២ ឆ្នាំ២០២២ កាលពីថ្ងៃទី១៨ ខែសីហា ឆ្នាំ២០២២ នៅទីស្តីការក្រសួង ឯកឧត្ដម ស៊ុន ចាន់ថុល បានមានប្រសាសន៍ថា ការថយចុះនៃបទល្មើសដឹកជញ្ជូនលើសទម្ងន់កំណត់ដោយច្បាប់នេះ ជាសញ្ញា បញ្ជាក់ឱ្យឃើញថា ប្រជាពលរដ្ឋចាប់ផ្តើមមានការយល់ លើការដឹកជញ្ជូនទំនិញលើសទម្ងន់កំណត់នៃច្បាប់ ដែលនាំឱ្យមានការខូចខាតផ្លូវ។ ឯកឧត្តម ទេសរដ្ឋមន្ត្រី បានឱ្យដឹងថា នៅឆ្នាំ២០២២ គណៈកម្មាធិការត្រួតពិនិត្យយានយន្តដឹកទំនិញ លើសទម្ងន់កំណត់ដោយច្បាប់ បានត្រួតពិនិត្យយានយន្តប្រមាណ ២,០៧០,០០០គ្រឿង និងបានផាកពិន័យយានយន្ត ចំនួន១,៨៩៩គ្រឿង កើនឡើង៥៨ភាគរយ ខណៈដែលរយៈពេលដូចគ្នា ៧ខែ ឆ្នាំ២០២១ ត្រួតពិនិត្យរថយន្ត ១,៣១២,៨១៩គ្រឿង និងបានផាកពិន័យយានយន្ត ចំនួន ១,៩៨៥គ្រឿង។ ឯកឧត្តម ទេសរដ្ឋមន្ត្រី បញ្ជាក់បន្ថែមថា នៅក្នុងឆ្នាំ២០២២នេះ មន្ត្រីជំនាញបានត្រួតពិនិត្យយានយន្ត កើនឡើងជាងឆ្នាំមុន តែអត្រានៃការផាកពិន័យមានការថយចុះ ដែលនេះបានសញ្ជាក់ឱ្យឃើញថា ប្រជាពលរដ្ឋបានយល់ដឹងច្រើនអំពីការដឹកទំនិញលើសទម្ងន់កំណត់នៃច្បាប់ ដែលនាំឱ្យខូចខាតផ្លូវផងដែរ។ « អត្រានៃការផាកពិន័យគឺចុះ ដូច្នេះបានសេចក្តីថា គាត់យល់ដឹងអំពីការដឹកទំនិញ លើសទម្ងន់កំណត់ដោយច្បាប់ អ៊ីចឹងយើងចង់កើនមួយជាពីរហើយពិនិត្យ ប៉ុន្តែការផាកពិន័យនៅទាប មិនកើនពីរដងនោះទេ អ៊ីចឹងបានន័យថា គាត់ចាប់ផ្តើមយល់អំពីការដឹកទំនិញ កុំឱ្យលើសទម្ងន់កំណត់ ដោយច្បាប់ »។ ឯកឧត្តម ទេសរដ្ឋមន្ត្រី ស៊ុន ចាន់ថុល ធ្លាប់បានលើកឡើងថា យោងតាមរូបមន្ត នៃការ ដឹកជញ្ជូនបានរកឃើញថា រថយន្តមួយគ្រឿង ដែលដឹកលើសទម្ងន់ ១០តោន គឺស្មើនឹងរថយន្ត ១ម៉ឺនគ្រឿង ធ្វើចរាចរនៅលើផ្លូវនោះ។ បើរថយន្ត ០១គ្រឿង ដឹកលើសទម្ងន់ ៣០តោន គឺស្មើនឹងរថយន្ត ៨១ម៉ឺនគ្រឿង ធ្វើចរាចរនៅលើដងផ្លូវ ពោល គឺយកចំនួនទម្ងន់ដឹកលើសនោះគុណបន្តគ្នាចំនួន៣ដង នឹងរកឃើញចំនួន រថយន្ត ធ្វើចរាចរលើផ្លូវ។ ឧទាហរណ៍ រថយន្តមួយគ្រឿងដឹកលើសទម្ងន់ ១០តោន គឺគេយក ១០ គុណ ១០ ស្មើ១០០, យក ១០០ គុណ ១០ ស្មើ ១,០០០, យក ១,០០០ គុណ ១០ ស្មើ ១០,០០០។ ដូច្នេះរថយន្តមួយគ្រឿងដឹកលើស ១០តោន គឺស្មើនឹងរថយន្ត ១ម៉ឺនគ្រឿងបានធ្វើចរាចរលើផ្លូវ។ សូមបញ្ជាក់ថា យោងតាមច្បាប់ស្តីពីផ្លូវថ្នល់ បានកំណត់ថា បើអ្នកប្រើប្រាស់យានយន្តដឹកជញ្ជូនធុនធ្ងន់ ដឹកជញ្ជូនទំនិញលើផ្លូវថ្នល់ ដែលផ្ទុកទម្ងន់ធ្វើឱ្យស្រុតផ្លូវថ្នល់ ឬ បែកលូកាត់ទទឹងផ្លូវថ្នល់ ឬបាក់ស្ពាន ត្រូវផ្តន្ទាទោសដាក់ពន្ធនាគារពី៦ខែ ដល់២ឆ្នាំ និងពិន័យជាប្រាក់ពី១លានរៀល ដល់៤លានរៀល។ ដោយឡែក បើមន្ត្រីមានសមត្ថកិច្ចដែលអនុញ្ញាតឱ្យរថយន្តផ្ទុកលើសទម្ងន់ធ្វើឱ្យស្រុតផ្លូវថ្នល់ ឬ បែក លូកាត់ទទឹងផ្លូវថ្នល់ ឬ បាក់ស្ពាន ត្រូវផ្តន្ទាទោសដូចអ្នកប្រព្រឹត្តិផ្ទាល់៕