ខេត្តរតនគិរី៖ ដើម្បីកាត់បន្ថយអត្រាគ្រោះថ្នាក់ចរាចរណ៍នៅលើដងផ្លូវសាធារណៈ និងជាការបញ្ជ្រាបការយល់ដឹងអំពីច្បាប់ចរាចរណ៍ផ្លូវគោកដល់សមាជិក-សមាជិកា ស.ស.យ.កខេត្ត នៅថ្ងៃទី២៨ ខែកក្កដា ឆ្នាំ២០២២នេះ អាជ្ញាធររដ្ឋបាលខេត្តរតនគិរី បានបើកវគ្គបណ្ដុះបណ្ដាល «សុវត្ថិភាពចរាចរណ៍ផ្លូវគោក» ក្រោមអធិបតីភាពឯកឧត្តមអភិបាលខេត្ត និងសិក្ខាកាមជាង១០០នាក់…។ថ្លែងទៅកាន់សិក្ខាកាមដែលជាសមាជិក-សមាជិកា ស.ស.យ.កខេត្តរតនគិរី ឧត្តម ញ៉ែម សំអឿន បញ្ជាក់ថា ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី សមិទ្ធផលជាតិសំខាន់ៗ ត្រូវបានស្ថាបនាឡើងរួមមាន៖ ហេដ្ឋារចនាសម្ព័ន្ធផ្លូវថ្នល់ ស្ពាន ផ្លូវរថភ្លើង និងផ្លូវគមនាគមន៍តាមទីជនបទយ៉ាងប្រទាក់ក្រឡា តភ្ជាប់ពីតំបន់មួយទៅតំបន់មួយ ពីទីក្រុង រហូតដល់ តំបន់ដាច់ស្រយ៉ាល បង្កនូវភាពងាយស្រួលដល់ការធ្វើចរាចរណ៍ និងដឹកជញ្ជូនកសិផលកសិកម្ម ក៏ដូចជាការដឹកជញ្ជូនទំនិញឆ្លងដែនទៅកាន់ប្រទេសជាប់របងភូមិផងជាមួយផងដែរ។ ប៉ុន្តែ ទន្ទឹមនឹងមានភាពងាយស្រួល ដែលផ្តើមចេញពីការអភិវឌ្ឍហេដ្ឋារចនាសម្ព័ន្ធផ្លូវថ្នល់នេះ អាជ្ញាធរសមត្ថកិច្ច ក៏កំពុងជួបនូវបញ្ហាប្រឈមមួយចំនួនលើវិបត្តិនៃគ្រោះថ្នាក់ចរាចរណ៍ ដែលផ្តើមចេញពីកង្វះការយល់ដឹងលើការប្រើប្រាស់ទ្រូងផ្លូវ ខ្វះការគោរពសិទ្ធិគ្នា ការបើកបរក្នុងស្ថានភាពស្រវឹង ការមិនគោរពស្លាកសញ្ញា គំនូសសញ្ញា និងភ្លើងសញ្ញាចរាចរណ៍ជាដើម។សកម្មភាពទាំងនេះ តម្រូវឱ្យអាជ្ញាធរខេត្ត ចាត់វិធានការបន្ទាន់ ដោយចុះធ្វើការអប់រំប្រជាពលរដ្ឋនៅតាមមូលដ្ឋាន និងបើកវគ្គបណ្តុះបណ្តាលលើផ្នែកចរាចរណ៍ពីមន្ត្រីជំនាញនៃមន្ទីរសាធារណការ ជូនដល់ប្អូនៗយុវជន-យុវនារី ដែលជាសមាជិក-សមាជិកាស.ស.យ.កខេត្តរតនគិរី ចុះទៅជួយបង្រៀនបងប្អូនប្រជាពលរដ្ឋតាមមូលដ្ឋានភូមិស្រុក ដើម្បីកាត់បន្ថយគ្រោះថ្នាក់ចរាចរណ៍នៅក្នុងខេត្ត ក៏ដូចជាប្រទេសកម្ពុជាយើងទាំងមូលផងដែរ។ ដូចេ្នះ វគ្គបណ្ដុះបណ្ដាលនេះ មានសារសំខាន់ណាស់ សម្រាប់យុវជន ស.ស.យ.ក ដែលបានផ្ដល់នូវព័ត៌មាន និងចំណេះដឹង ពីផលប្រឈមនៃការបើកបរហួសល្បឿនកំណត់ ពាក់ព័ន្ធបញ្ញតិ្តច្បាប់ចរាចរណ៍ និងឆ្លើយតបនឹងកាលៈទេសៈដែលរាជរដ្ឋាភិបាលកម្ពុជា ខិតខំពុះពារយ៉ាងសកម្ម ក្នុងការទប់ស្កាត់លុបបំបាត់គ្រោះថ្នាក់ចរាចរណ៍នៅកម្ពុជា ជូនប្រជាពលរដ្ឋបានយល់ដឹង។បន្ថែមលើនេះ ឯកឧត្តមអភិបាលខេត្ត ក៏បានដាស់តឿនដល់យុវជនទាំងអស់ ដែលជាទំពាំងស្នងឫស្សីរបស់ប្រទេសជាតិ ត្រូវធ្វើជាគំរូក្នុងការគោរពច្បាប់ចរាចរណ៍ផ្លូវគោក ដោយចាប់ផ្តើមពីពួកប្អូនៗមុនគេ។ ព្រោះថាសកម្មភាពរបស់យុវជន ស.ស.យ.កខេត្ត គឺជាគំរូដ៏ល្អក្នុងការគោរព និងអនុវត្តច្បាប់ ហើយបានបង្ហាញយ៉ាងច្បាស់អំពីឥរិយាបថ និងស្មារតីទទួលខុសត្រូវយ៉ាងជាក់ស្តែងរបស់យុវជនទៅកាន់ប្រជាពលរដ្ឋ..៕