ថ្ងៃអង្គារ ៦រោច ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៩ ខែកក្កដា ឆ្នាំ២០២២ លោកជំទាវរដ្ឋលេខាធិការ កុយ សុដានី តំណាងដ៏ខ្ពង់ខ្ពស់ឯកឧត្តមទេសរដ្ឋមន្រ្តី ស៊ុន ចាន់ថុល អមដំណើរដោយគណៈប្រតិភូក្រសួងសាធារណការ និងដឹកជញ្ជូនកម្ពុជា បានអញ្ជើញចុះហត្ថលេខាលើអនុស្សារណៈយោគយល់ជាមួយក្រុមប្រឹក្សាជាតិអភិវឌ្ឍន៍សេដ្ឋកិច្ច និងសង្គម(NESDC)នៃព្រះរាជាណាចក្រថៃ តំណាងដោយលោកDanucha Pichayanan អគ្គលេខាធិការNESDC ក្នុងគោលបំណងបង្កើតក្របខណ្ឌកិច្ចសហប្រតិបត្តិការក្នុងស្មារតីយោគយល់គ្នា និងសុច្ឆន្ទៈ និងបង្កើនចំណងមិត្តភាពឱ្យកាន់តែជិតស្និទ្ធរវាងប្រទេសទាំងពីរក្នុងវិស័យភស្តុភារកម្ម។ ការចុះហត្ថលេខាលើអនុស្សារណៈយោគយល់នេះ ធ្វើឡើងដោយការស្ម័គ្រចិត្តសម្រាប់កិច្ចសហប្រតិបត្តិការលើផ្នែកគោលនយោបាយ និងការគាំទ្រលើវិសាលភាព និងទិសដៅគន្លឹះជាអាទិ៍៖ ១) កម្រិតក្របខណ្ឌគោលនយោបាយរួមមានគោលនយោបាយភស្តុភារកម្ម ក្របខណ្ឌគតិយុត្ត និងបទប្បញ្ញត្តិ ក្របខណ្ឌស្ថាប័ន យន្តការសម្របសម្រួល និងការសម្រេចចិត្តដំណើរការនៃការអនុវត្ត តាមដាន និងវាយតម្លៃគោលនយោបាយ ២) សូចនាករ និងប្រព័ន្ធផ្ទុកទិន្នន័យភស្តុភារកម្ម រួមមានថ្លៃចំណាយភស្តុភារកម្មធៀបនឹងកំណើនផលិតផលក្នុងស្រុកសរុប (Logistics Cost per GDP) និងសន្ទស្សន៍ប្រតិបត្តិការភស្តុភារកម្ម (LPI: Logistics Performance Index) ៣) គាំទ្រគ្នាទៅវិញទៅមកក្នុងការពង្រឹងសមត្ថភាពស្ថាប័ន និងសមត្ថភាពរបស់ភាគីពាក់ព័ន្ធក្នុងវិស័យភស្តុភារកម្ម។ ភាគីទាំងបានពិភាក្សា និងចែករំលែកទៅវិញទៅមកអំពីសាវតារនៃការរៀបចំ និងការអនុវត្តគោលនយោបាយស្តីពីការអភិវឌ្ឍវិស័យភស្តុភារកម្ម ក្នុងនោះរួមមានការដាក់ចេញគោលនយោបាយអភិវឌ្ឍន៍ហេដ្ឋារចនាសម្ព័ន្ធដឹកជញ្ជូន និងភស្តុភារកម្មជាវិស័យអាទិភាព និងចាំបាច់បំផុតក្នុងការអភិវឌ្ឍសេដ្ឋកិច្ច និងសង្គមជាតិផងដែរ។ ថ្លែងក្នុងជំនួបនោះ លោកជំទាវរដ្ឋលេខាធិការបានជម្រាបជូនភាគីថៃអំពីការយកចិត្តទុកដាក់ និងកិច្ចខិតខំប្រឹងប្រែងរបស់ក្រសួងក្នុងការតាក់តែងសេចក្តីព្រាងផែនការមេស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភារកម្មនៅកម្ពុជា។ លោកជំទាវបានបញ្ជាក់ថាផែនការមេនេះក៏មានបញ្ចូលគម្រោងអភិវឌ្ឍន៍ហេដ្ឋារចនាសម្ព័ន្ធទាំងផ្នែករឹង និងផ្នែកទន់ ដែលរួមមានគម្រោងអភិវឌ្ឍន៍ប្រព័ន្ធដឹកជញ្ជូនផ្លូវថ្នល់ ផ្លូវដែក ផ្លូវល្បឿនលឿន ផ្លូវទឹក ផ្លូវសមុទ្រ កំពង់ផែ អាកាសយានដ្ឋាន និងហេដ្ឋារចនាសម្ព័ន្ធភស្តុភារកម្ម ដែលត្រូវការទឹកប្រាក់ប្រមាណ៥០ពាន់លានដុល្លាសហរដ្ឋអាមេរិកសម្រាប់រយៈពេល១០ឆ្នាំ។ បន្ទាប់ពីពិធីចុះហត្ថលេខាលើអនុស្សារណៈយោគយល់ ភាគីថៃបានអញ្ជើញគណៈប្រតិភូកម្ពុជាឱ្យចូលទស្សនកិច្ចសាលពិព័រណ៍របស់ក្រុមប្រឹក្សាជាតិអភិវឌ្ឍន៍សេដ្ឋកិច្ច និងសង្គម ដែលបានបង្ហាញអំពីប្រវត្តិ និងដំណើរនៃការរៀបចំ និងការអភិវឌ្ឍផែនការជាតិ៥ឆ្នាំម្តងចំនួន១៣លើក និងការរៀបចំវិស័យភស្តុភារកម្មនៅក្នុងប្រទេសថៃ។ ឆ្លៀតក្នុងឱកាសនោះ លោកជំទាវរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់ក្រុមប្រឹក្សាជាតិអភិវឌ្ឍន៍សេដ្ឋកិច្ច និងសង្គម ប្រទេសថៃ ដែលបានឆ្លៀតពេលវេលាដ៏មានតម្លៃ និងមមាញឹកព្រមទាំងផ្តល់កិច្ចសហប្រតិបត្តិការដ៏ល្អឥតខ្ចោះ រហូតដល់ពិធីចុះហត្ថលេខាលើអនុស្សារណៈយោគយល់របស់ប្រទេសទាំងពីរ បានប្រព្រឹត្តទៅដោយរលូន និងប្រកបដោយមិត្តភាពស្និទ្ធស្នាល៕