កិច្ចប្រជុំពិភាក្សាអំពីវឌ្ឍនភាពការងារ និងត្រួតពិនិត្យការអភិវឌ្ឍប្រព័ន្ធលូក្នុងគម្រោងអភិវឌ្ឍន៍ប្រព័ន្ធចម្រោះទឹកកខ្វក់ នៅក្រុងតាខ្មៅ ថ្ងៃសុក្រ ២រោច ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៥ ខែកក្កដា ឆ្នាំ២០២២ នៅទីស្តីការក្រសួង ឯកឧត្តម កឹម បូរី អនុរដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគ្រប់គ្រង និងសម្របសម្រួលគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្នុងក្រុងតាខ្មៅ បានអញ្ជើញដឹកនាំកិច្ចប្រជុំពិភាក្សាពីវឌ្ឍនភាពការងារ ការរចនាលម្អិត និងត្រួតពិនិត្យការអភិវឌ្ឍប្រព័ន្ធលូក្នុងគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្នុងក្រុងតាខ្មៅ ក្រោមឥណទានសម្បទានពីធនាគារនីហរ័ណ អាហរ័ណកូរ៉េ ដោយមានការចូលរួមពីថ្នាក់ដឹកនាំ និងសមាជិកក្រុមការងារបច្ចេកទេសនៃអង្គភាពគ្រប់គ្រងគម្រោង(PMU) ក្រុមហ៊ុនទីប្រឹក្សាបច្ចេកទេសគម្រោង និងភាគីពាក់ព័ន្ធ។ កិច្ចប្រជុំនេះធ្វើឡើងក្នុងគោលបំណងដើម្បីពិភាក្សាលើការងារបច្ចេកទេស ការរចនាប្លង់លម្អិត ការជ្រើសរើសវិធីសាស្ត្រ ដែលអាចកាត់បន្ថយការចំណាយច្រើន និងដោះស្រាយបញ្ហាប្រឈមនានាក្នុងគម្រោងកំពុងជួបប្រទះទាក់ទងនឹងការតភ្ជាប់ប្រព័ន្ធបណ្តាញលូ ដើម្បីឱ្យគម្រោងនេះប្រព្រឹត្តទៅដោយរលូនតាមការគ្រោងទុក និងអាចបញ្ចប់ដំណាក់កាលនីមួយៗបានលឿនរហ័ស និងទាន់ពេលវេលា៕