ស្របពេលដល់ថ្ងៃកំណត់ដែលអគ្គនាយកដ្ឋានគយ និងរដ្ឋាករកម្ពុជា ត្រូវអនុវត្តវិធានការបង្រ្កាបយ៉ាងតឹងរ៉ឹងចំពោះរថយន្តចង្កូតស្តាំ ដែលគ្មានពន្ធចរាចរណ៍លើដងផ្លូវរួចមក នាថ្ងៃទី០៥ ខែកក្កដា ឆ្នាំ២០២២នេះ ឃើញថាមានក្រុមតៃកុងឡានធំចង្កូតស្តាំ គ្មានពន្ធប្រមាណជា៣០០នាក់បានប្រមូលផ្តុំគ្នាយកឡានទៅដាក់បិទផ្លូវនៅរង្វង់មូលកួរស្រូវទាំងបួនច្រក ដែលពួកគេបានធ្វើការទាមទារមួយចំណុច គឺសុំបង់ពន្ធ តែសុំមិនកែចង្កូត។  ទន្ទឹមនឹងក្រុមតៃកុងរថយន្តធន់ធ្ងន់ចង្កូតស្តាំនាំគ្នាបិទផ្លូវតវ៉ាបែបនេះ លោកហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន ថ្លែងតាមរយៈវិទ្យុវាយោថារថយន្តគ្មានពន្ធ ចង្កូតស្តាំ ដែលមានស្រាប់នៅក្នុងស្រុកគួរខិតខំដោះស្រាយ ព្រោះអគ្គនាយកដ្ឋានគយ និងរដ្ឋាករទុកឱសានវាទឱ្យយូរហើយ មិនគួរដល់ពេលអនុវត្តវិធានការរឹតបណ្តឹងទើបនាំគ្នាតវ៉ានោះទេ។ ជាមួយគ្នានេះលោកបន្តថាការប្រើរថយន្តចង្កូតស្តាំ គឺប្រឈមនឹងហានិភ័យគ្រោះថ្នាក់ខ្ពស់ណាស់ព្រោះខុសស្តង់ដាការប្រើប្រាស់នៅកម្ពុជា លោកថាអ្វីដែលខុសទៅនឹងច្បាប់គឺមិនគួរបន្តប្រើប្រាស់នោះទេ។ ជាមួយគ្នានេះលោកហ៊ាង សុទ្ធាយុត្តិ ក៏បានលើកឡើងដែរថាចំពោះរថយន្តចង្កូតស្តាំដែលកែមកឆ្វេងវិញគឺមិនបានដូចដើម១០០ភាគរយទេ តែបើប្រៀបធៀបទៅនឹងការប្រើរថយន្តចង្កូតស្តាំគឺមានលក្ខណៈខុសគ្នាឆ្ងាយ កម្រិតនៃកើតឡើងនៃហានិភ័យគឺមានទាបបំផុត។ សូមជម្រាបថា រាជរដ្ឋាភិបាលកម្ពុជាបានអនុញ្ញាតឱ្យបង់ពន្ធ និងអាករនាំចូលចំពោះរថយន្តចង្កូតស្តាំមានស្រាប់ក្នុងស្រុកជាលើកចុងក្រោយ តែត្រូវកែចង្កូតពីស្តាំមកឆ្វេង។ ការអនុញ្ញាតនេះគឺមានឱសានវាទត្រឹមដំណាច់ខែមិថុនា ឆ្នាំ២០២២។ ចាប់ពីថ្ងៃទី០១ ខែកក្កដា ឆ្នាំ២០២២ ឡានចង្កូតស្តាំដែលមិនទាន់បង់ពន្ធនាំចូលនឹងត្រូវចាប់ដកហូត កម្ទេចចោលតែម្តង៕