ភ្នំពេញ ៖ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណរ និងដឹកជញ្ជូន បានថ្លែងថា គម្រោងផ្លូវរថភ្លើងអាស៊ាន-ចិន ចាប់ពីប្រទេសសិង្ហបុរី , ម៉ាឡេស៊ី , ថៃ , កម្ពុជា , វៀតណាម ឆ្ពោះទៅ កាន់ខេត្តឃុនមីង ប្រទេសចិន កម្ពុជាបានសិក្សារួចរាល់ហើយ ប៉ុន្ដែកម្ពុជាមិនទាន់មានថវិកា គ្រប់គ្រាន់ ក្នុងការសាងសង ដែលចំណុចនេះទាមទារឲ្យ មានការពិភាក្សាជាមួយវៀតណាមបន្ថែម ព្រោះកម្ពុជា-វៀតណាមមិនទាន់មានផ្លូវរថភ្លើងភ្ជាប់គ្នានៅឡើយទេ ។ គម្រោងផ្លូវរថភ្លើង អាស៊ាន-ចិន នឹងត្រូវចំណាយថវិកាយ៉ាងច្រើនលើការសាងសង់ ព្រោះតាមគម្រោង ប្លង់មេ ផ្លូវរថភ្លើងថ្មីនេះ ជាគម្រោងតភ្ជាប់ជាមួយបណ្តាប្រទេសក្នុងតំបន់អាស៊ាន ឆ្ពោះទៅកាន់ខេត្ត ឃុនមីង ប្រទេសចិន ហើយគម្រោងថ្មីនេះដែរត្រូវធ្វើឲ្យស្របទៅតាមទំហំខ្នាតស្តង់ដារហ្គេត ដែលមាន ទំហំទទឹងផ្លូវជិតមួយម៉ែត្រកន្លះ ។ បណ្តាប្រទេសអាស៊ានទាំងអស់ ក៏កំពុងវិវត្តន៍តាមទំហំខ្នាតស្តង់ដារដូចៗគ្នាដែរ ខណៈបច្ចុប្បន្នទាំង កម្ពុជា និងប្រទេសអាស៊ានមួយចំនួន កំពុងប្រើប្រាស់ទំហំទទឹងផ្លូវរថភ្លើង លើខ្នាតមីតធើហ្គេត គឺប្រវែង មួយម៉ែត្រ ។ លោក ស៊ុន ចាន់ថុល បានថ្លែងក្នុងពិធីសម្ពោធ ដាក់ឲ្យដំណើការដឹកអ្នកដំណើរតាមរថភ្លើងជាថ្មី ពី ប៉ោយប៉ែត-សិរីសោភ័ណ នៅថ្ងៃទី៤ ខែមេសា ឆ្នាំ២០១៨ ថា “តភ្ជាប់ផ្លូវដែកពីសិង្ហបុរី មកម៉ាឡេស៊ី មកថៃ មកកម្ពុជា ទៅវៀតណាម និងឆ្ពោះទៅកាន់ខេត្តឃុនមីង ប្រទេសចិន ។ ទីមួយបានសហការ គ្នារួចហើយ ចឹងទីពីរ យើងបានសិក្សាហើយពីព្រំដែន បាក់ឌឹង វៀតណាម និងកម្ពុជា”។ លោកបន្ដថា វៀតណាមត្រូវកសាងផ្លូវរថភ្លើងពីបាក់ឌឹង ទៅហូជីមិញ ដើម្បីតភ្ជាប់ផ្លួវដែក ដែលមាន ស្រាប់ ខណៈ វៀតណាម មិនទាន់បានបញ្ជាក់ថា កសាងផ្លូវរថភ្លើងនៅពេលណាដែរ ។ រដ្ឋមន្រ្តីសង្កត់ធ្ងន់ថា ប្រសិនបើក្រសួងសាធារណការ កសាងផ្លូវរថភ្លើងពីកម្ពុជា ទៅវៀតណាម ហើយ វៀតណាមមិនធ្វើ នឹងនាំឲ្យកម្ពុជាខាតបង់ថវិកាជាតិយ៉ាងច្រើន ដូច្នេះកម្ពុជាត្រូវសហការជាមួយ វៀតណាម ដើម្បីតភ្ជាប់ផ្លូវរថភ្លើងប្រទេសពីរ ។ ឆ្លៀតឱកាសនោះដែរ លោក ស៊ុន ចាន់ថុល បានអះអាងថា ផ្លូវរថភ្លើងកម្ពុជា-ថៃ បានតភ្ជាប់រួចរាល់ ហើយកាលពីឆ្នាំ២០១៧ ហើយក្រសួងសាធារណការ នឹងអញ្ជើញនាយករដ្ឋមន្ដ្រីកម្ពុជា សម្ដេចតេជោ ហ៊ុន សែន និងនាយករដ្ឋមន្រ្តីថៃ លោក ប្រាយុទ្ធ ច័ន្ទអូឆា នៅពេលខាងមុខ ចូលរួមសម្ពោធរួមគ្នា ដើម្បី ដាក់ឲ្យប្រើប្រាស់ផ្លូវរថភ្លើងនេះ។ ការស្ដារផ្លូវដែកភាគខាងជើងរបស់កម្ពុជា នឹងជួយសម្រួលការដឹក ជញ្ជូនរវាងប្រទេសទាំងពីរ ព្រមទាំងអាចពង្រីកទំហំពាណិជ្ជកម្មរវាង ប្រទេសទាំងពីរឲ្យ បានកាន់តែ ធំធេងជាងមុន ខណៈទំនិញនាំចូលមកកម្ពុជាពីប្រទេសថៃ មាន៧០ភាគរយ ចូលតាមច្រកប៉ោយប៉ែត ។ លោកក៏បានអំពាវនាវ ដល់ប្រជាពលរដ្ឋកុំទៅដេក និយាយទូរស័ព្ទ និងអង្គុយលេង នៅលើផ្លូវរថភ្លើង ដែលធ្វើឲ្យប៉ះពាល់ដល់អាយុជីវិត ពីព្រោះកន្លងមកមានអ្នកស្លាប់ដោយសាររថភ្លើងកិនខ្វះការ ប្រុង ប្រយ័ត្ន ៕