កិច្ចប្រជុំពិនិត្យមើលឡើងវិញ និងស្វែងយល់បន្ថែមស្តីពីការអនុវត្តយន្តការត្រួតពិនិត្យរួមគ្នាឈប់តែមួយលើកSSI (Single Stop Inspection) ក្រោមកិច្ចព្រមព្រៀងដឹកជញ្ជូនឆ្លងកាត់ព្រំដែន(GMS-CBTA) តាមប្រព័ន្ធវីដេអូពីចម្ងាយ ដឹកនាំដោយ ឯកឧត្តមអនុរដ្ឋលេខាធិការ វ៉ាស៊ឹម សុរិយា ថ្ងៃពុធ ៩រោច ខែជេស្ន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៥ ខែមិថុនា ឆ្នាំ២០២២ នៅទីស្ដីការក្រសួង ឯកឧត្តម វ៉ាស៊ឹម សុរិយា អនុរដ្ឋលេខាធិការក្រសួងសាធារណការ និងដឹកជញ្ជូន តំណាងលោកជំទាវរដ្ឋលេខាធិការ កុយ សុដានី បានអញ្ជើញដឹកនាំកិច្ចប្រជុំពិនិត្យមើលឡើងវិញ និងស្វែងយល់បន្ថែមស្តីពីការអនុវត្តយន្តការត្រួតពិនិត្យរួមគ្នាឈប់តែមួយលើក ក្រោមកិច្ចព្រមព្រៀងដឹកជញ្ជូនឆ្លងកាត់ព្រំដែន ដោយមានការចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីក្រុមការងារ ពាក់ព័ន្ធនៃគម្រោងកែលម្អប្រព័ន្ធភស្តុភារកម្មនៅកម្ពុជា ដំណាក់កាលទី២ (CLIP2) មន្រ្តីជំនាញពី ក្រសួង-ស្ថាប័នពាក់ព័ន្ធ ក្រុមជំនាញការនៃទីភ្នាក់ងារសហប្រតិបត្តិការអន្តរជាតិជប៉ុន(JICA) និងភាគីពាក់ព័ន្ធ។ ជាកិច្ចចាប់ផ្តើម ឯកឧត្តមអនុរដ្ឋលេខាធិការ បានជម្រាបជូនអង្គប្រជុំអំពីគោលបំណងនៃកិច្ចប្រជុំ ១) ពិនិត្យឡើងវិញ និងស្វែងយល់បន្ថែម ការអនុវត្តយន្តការត្រួតពិនិត្យរួមគ្នាឈប់តែមួយលើកSSI(Single Stop Inspection) ក្រោមកិច្ចព្រមព្រៀងដឹកជញ្ជូនឆ្លងកាត់ព្រំដែន GMS-CBTA ២) ពិភាក្សា និងផ្លាស់ប្តូរយោបល់ ដើម្បីត្រៀមជំហររួមចរចារជាមួយភាគីថៃសម្រាប់ការរៀបចំរចនាសម្ព័ន្ធ និងប្រព័ន្ធលំហូរការងារពាក់ព័ន្ធរបស់សមត្ថកិច្ចត្រួតពិនិត្យ (គយ ចត្តាឡីស័ក និងអន្តោប្រវេសន៍) ដើម្បីអនុវត្តយន្តការ ត្រួតពិនិត្យរួមគ្នាឈប់តែមួយលើកSSI បន្ទាប់ពីការសាងសង់ស្ថានីយច្រកទ្វារព្រំដែនស្ទឹងបត់-បានណងអៀន រួចរាល់ និង៣) ការងារពាក់ព័ន្ធផ្សេងៗទៀត។ ជាងនេះទៅទៀត ឯកឧត្តមអនុរដ្ឋលេខាធិការ បានកត់សម្គាល់អំពីមូលហេតុ បទពិសោធន៍ ការលំបាកនិងបញ្ហាប្រឈមជាច្រើនកន្លងមកទាំងវិជ្ជមាន និងអវិជ្ជមាន ក្នុងការអនុវត្តការត្រួតពិនិត្យរួមគ្នាឈប់តែមួយលើកSSIនៅតាមច្រកទ្វាព្រំដែន រវាងបណ្តាប្រទេសមហាអនុតំបន់មេគង្គមួយចំនួនដូចជា៖ រវាងឡាវ និងវៀតណាម រវាងថៃ-ឡាវ។ ដោយឡែករវាងកម្ពុជា-វៀតណាម និងរវាងកម្ពុជា-ថៃ អនុស្សារណៈយោគយល់ផ្តួចផ្តើមអនុវត្តSSI ត្រូវបានចុះហត្ថលេខានៅឆ្នាំ២០០៥ ប៉ុន្តែមិនមានការអនុវត្តរហូតមក ដោយសារកត្តាជាច្រើន ពិសេសហេដ្ឋារចនាសម្ព័ន្ធ(CCA) បទប្បញ្ញត្តិ ច្បាប់ និងកត្តាស្ថាប័ន។ ឯកឧត្តមក៏បានជម្រាបជូនអង្គប្រជុំផងដែរអំពីបច្ចុប្បន្នភាពនៃការកែសម្រួលលិខិតុបករណ៍ (ឧបសម្ព័ន្ធ និងពិធីសារ) មួយចំនួននៃកិច្ចព្រមព្រៀងឆ្លងកាត់ព្រំដែន(CBTA) និងការវិវឌ្ឍក្នុងការបញ្ចប់ និង ចុះហត្តលេខាពិធីសាររបស់អាស៊ានស្តីពីប្រព័ន្ធគយឆ្លងកាត់(Customs Transit)។ កិច្ចប្រជុំនេះក៏មានការធ្វើបទបង្ហាញផងដែរស្តីពីប្រវត្តិ ការរៀបចំបទប្បញ្ញត្តិ និងមាត្រាពាក់ព័ន្ធ ក្នុងកិច្ច ព្រមព្រៀងGMS-CBTA វិសាលភាពនៃការអនុវត្តក្នុងពិភពលោកយ៉ាងទូលំទូលាយ ដូចជា៖ អនុសញ្ញាក្យូតូរបស់អង្គការគយពិភពលោក កិច្ចព្រមព្រៀងសម្រួលពាណិជ្ជកម្មរបស់អង្គការពាណិជ្ជកម្មពិភពលោក អង្គការUNECE អង្គការUNCTAD រួមទាំងការអនុវត្តក្នុងតំបន់អឺរុប អាហ្រិ្វក តំបន់មហាអនុតំបន់ មេគង្គ(GMS) និងផលប្រយោជន៍សម្រាប់ការអនុវត្ត ការត្រួតពិនិត្យរួមគ្នាឈប់តែមួយលើកSSI ក្រោមកិច្ចព្រមព្រៀងដឹកជញ្ជូនឆ្លងកាត់ព្រំដែន(GMS-CBTA)។ អង្គប្រជុំបានលើកឡើង និងពិភាក្សាអំពីនិយមន័យ និងវាក្យស័ព្ទទាក់ទងនឹងការត្រួតពិនិត្យឈប់តែមួយលើក(Single Stop Inspection) និងទីលានត្រួតពិនិត្យរួម(Common Control Area) ដែលមានន័យ ថា៖ SSI ត្រូវអនុវត្តឱ្យបានពេញលេញ មិនមែនមានត្រឹមតែគយ(Customs)ទេ ពោលគឺ ត្រូវធ្វើឡើងឱ្យបានគ្រប់ជំហានពេញលេញ។ តាមការអនុវត្តសន្ធិសញ្ញារបស់អង្គការUNECE គឺមន្រ្តីគយ អន្តោប្រវេសន៍ និងចត្តាឡីស័ក(CIQ) អនុវត្តត្រួតពិនិត្យរួមគ្នាជាមួយប្រទេសចេញ(Exit) និងប្រទេសចូល(Entry)រួមគ្នាឈប់តែមួយលើក។ SSI មិនអាចដំណើការពេញលេញបានទេ ប្រសិនបើអនុវត្តត្រឹមតែការត្រួតពិនិត្យគយរួមគ្នាឈប់តែមួយលើកនៅទីលានត្រួតពិនិត្យគយរួម( Customs Common Control Area )។ ដោយឡែកជំនាញការទីភ្នាក់ងារJICA បានលើកយកលទ្ធភាព ទិដ្ឋភាព និងបានស្នើឡើងនូវនីតិវិធីជាក់ស្តែងមួយចំនួនសម្រាប់អនុវត្តការដឹកជញ្ជូនឆ្លងកាត់ព្រំដែន និងបញ្ចៀសការកកស្ទះចរាចរណ៍នៅប៉ោយ ប៉ែត-អរញ្ញប្រាថេត នៅពេលបើកដំណើរការឡើងវិញ និងការបើកច្រកថ្មី និងស្ទឹងបត់-បានណងអៀន នាពេលខាងមុខ។ តំណាងអគ្គនាយកដ្ឋានគយ និងរដ្ឋាករ តំណាងអគ្គនាយកដ្ឋានអន្តោប្រវេសន៍ ក៏បានបញ្ជាក់ថា ការ អនុវត្តSSI ទាមទារពេលវេលា ការបណ្តុះបណ្តាលសមត្ថភាព និងចំណេះដឹងមន្រ្តី ព្រមទាំងការរៀបចំ ប្រព័ន្ធការងារ និងគ្របគ្រងទិន្នន័យឱ្យបានត្រឹមត្រូវ។ តំណាងក្រសួងកសិកម្ម រុក្ខាប្រមាញ់ និងនេសាទ បានស្នើសុំពិចារណាក្នុងការអនុវត្តចត្តាឡីស័កជាអន្តរជាតិ។ ជាលទ្ធផល អង្គប្រជុំបានឯកភាពឱ្យមានតំណាងចត្តាឡីស័ក ក្នុងក្រុមចរចាជាមួយភាគីថៃ ដែលនឹងត្រូវធ្វើឡើងនាពេលខាងមុខ។ អង្គប្រជុំស្នើឱ្យមានកិច្ចសហប្រតិបត្តិការ និងចូលរួមបន្ថែមពីក្រសួង -ស្ថាប័នពាក់ព័ន្ធដើម្បីត្រៀជំហរ និងមតិយោបល់ចូលរួមការចរចាជាមួយភាគីថៃអំពីការរៀបចំរចនាគំនូសប្លង់សម្រាប់កន្លែងបំពេញការងារ សម្រាប់មន្រ្តីគយ អន្តោប្រវេសន៏ ចត្តាឡីស័ក(CIQ) ទាំងពីរប្រទេសនៅក្នុងអគារនៃស្ថានីយព្រំដែនស្ទឹងបត់ និងបានណងអៀន​ ឱ្យបានឯកភាពគ្នា៕