[Morningpostkh] - លោកស៊ុន ចាន់ថុល៖ ផ្លូវល្បឿនលឿនភ្នំពេញ-ក្រុងព្រះសីហនុប្រើប្រាស់កំលាំងពលកម្មជាង៣ពាន់នាក់
2022-06-08
Go to the website published Morningpostkh
ភ្នំពេញ ៖ ផ្លូវល្បឿនលឿនដំបូងគេនៅកម្ពុជា ភ្នំពេញ-ក្រុងព្រះសីហនុដែលជិតនឹងរួចរាល់ទៅហើយនោះបាន ប្រើប្រាស់កំលាំងកម្មករសរុបជាង៣ពាន់នាក់ក្នុងនោះមានទាំងកម្មករជនជាតិនិងកម្មករជំនាញជនជាតិចិន ។ នេះបើតាមលោកស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនថ្លែងប្រាប់សារព័ត៌មានមួយនៅថ្ងៃទី៧ មិថុនា ២០២២ ។
លោកមានប្រសាសន៍បន្តថា ក្នុងចំណោមកម្មករ កម្មការិនី ធ្វើការងារនៅក្នុងការដ្ឋានសាងសង់ផ្លូវល្បឿនលឿនភ្នំពេញ ក្រុងព្រះសីហនុ មានជនជាតិខ្មែរប្រមាណ៧៨ភាគរយ ដែលជាចំនួនច្រើន និងបានចូលរួមចំណែកក្នុងការផ្ដល់ឱកាសការងារដល់ពួកគេផងដែរ ហើយបន្ទាប់ពីការងារនេះរួចលោកសង្ឃឹមថាកម្មករ កម្មការិនីនឹងយកចំណេះដឹងនិងជំនាញដែលបានមកពីការងារនេះទៅធ្វើការបន្តផងដែរ ហើយលោកក៏អរគុណដល់មិត្តចិនដែលបានផ្ទេរចំណេះវិជ្ជាពីការសាងសង់ទៅដល់បុគ្គលិកកម្មករ កម្មការិនីកម្ពុជាសម្រាប់ប្រើប្រាស់នៅពេលអនាគត។
លោកបានអំពាវនាវទុកជាមុនសុំឱ្យបងប្អូនប្រជាពលរដ្ឋប្រើប្រាស់ផ្លូវល្បឿនលឿននេះ ដើម្បីធានាសុវត្ថិភាព ចំណាយតិច ចំណេញពេលវេលា និងបានស្នើឱ្យក្រុមហ៊ុនសាងសង់ អនុញ្ញាតរយៈពេលមួយខែឱ្យបងប្អូនពលរដ្ឋអាចប្រើប្រាស់ផ្លូវនេះដោយមិនបាច់បង់ថ្លៃដើម្បីឱ្យពួកគាត់ មានឱកាសសាកល្បងប្រើប្រាស់ផ្លូវនេះ និងសុំឱ្យពលរដ្ឋចិនមកលេងកម្ពុជា ដើម្បីស្វែងយល់ពីការរីកចម្រើនរបស់កម្ពុជាជាពិសេសរីកចម្រើនលើវិស័យហេដ្ឋារចនាសម្ព័ន្ធ ដែលមិត្តចិនបានចូលរួមចំណែកយ៉ាងច្រើនក្នុងការស្ដារប្រព័ន្ធ ហេដ្ឋារចនាសម្ព័ន្ធនៅកម្ពុជា ។
បើតាមលោកស៊ុន ចាន់ថុលបញ្ជាក់ថាផ្លូវល្បឿនលឿន ភ្នំពេញ ក្រុងព្រះសីហនុនឹងត្រូវដាក់ឱ្យបើកបរសាកល្បងនៅខែ កក្កដាឆ្នាំ២០២២នេះតទៅ ហើយក្រុមការងារក៏កំពុងកំណត់យានយន្តដែលអាចបើកបរលើផ្លូវនេះបាន និងកំពុងពិភាក្សាលើតម្លៃជាក់លាក់ផងដែរ៕
