[ANN] - រយះពេលជាង២ខែ មន្ត្រីជំនាញរកឃើញរថយន្តកែច្នៃខុសបច្ចេកទេស ៨៣គ្រឿង
2018-03-30
Go to the website published ANN
ខេត្តបាត់ដំបង៖ ក្នុងរយះពេលជាង២ខែ មន្ត្រីក្រុមការងារត្រួតពិនិត្យយានយន្តខេត្តបាត់ដំបងបានរកឃើញរថយន្តកែច្នៃខុសលក្ខណះបច្ចេកទេសចំនួន ៨៣គ្រឿង។ នេះបើយោងតាមរបាយការណ៍ពីប្រធានការិយាល័យដឹកជញ្ជូន នៃមន្ទីរសាធារណៈការ និងដឹកជញ្ជូនខេត្ត។
លោក ហេង ប៊ុនលី ប្រធានការិយាល័យដឹកជញ្ជូន នៃមន្ទីរសាធារណៈការខេត្តបាត់ដំបងបានអោយដឹង កាលពីរសៀល ថ្ងៃទី២៩ មីនា ថា ចាប់ពីថ្ងៃចុះយុទ្ធនាការដំបូង នៅដើមឆ្នាំ២០១៨ រហូតមកដល់ពេលនេះ ក្រុមការងារត្រួតពិនិត្យយានយន្តកែច្នៃខុសលក្ខណះបច្ចេកទេស នៃអនុគណះកម្មាការសុវត្ថិភាពចរាចរណ៍ផ្លូវគោកខេត្តបាត់ដំបង បានធ្វើការត្រួតពិនិត្យទៅលើយានយន្តគ្រប់ប្រភេទបានចំនួន ២,៨៥៦គ្រឿងក្នុងនោះរកឃើញកែច្នៃខុសលក្ខណះបច្ចេកទេស ៨៣គ្រឿង។លោកបន្តថា ចំណោមរថយន្តកែច្នៃខុសលក្ខណះបច្ចេកទេសទាំង ៨៣គ្រឿង ក្នុងនោះមានរថយន្តធុនតូច ៣២គ្រឿង កាត់ទ្រុងជាក់ស្តែងចំនួន ៨០គ្រឿង និង៣គ្រឿង នៅកំពុងធ្វើការដោះស្រាយ។
លោកបញ្ជាកថា ដោយគោរពតាមអនុសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងការពង្រឹងច្បាប់ចរាចរណ៍របស់ក្រសួងសាធារណៈការ និងដឹកជញ្ជូន ក្នុងការអនុវត្តច្បាប់អោយបានកាន់តែតឹងរ៉ឹង ក្រុមការងារត្រួតពិនិត្យយានយន្តខេត្តបាត់ដំបង បានធ្វើការចុះអនុវត្តជាប្រចាំ ដើម្បីរួមចំណែកកាត់បន្ថយគ្រោះថ្នាក់ចរាចរណ៍និងសម្រាលការខូចខាតផ្លូវថ្នល់យ៉ាងធ្ងន់ធ្ងរថែមទៀតផង៕
