ឯកឧត្តមទេសរដ្ឋមន្ត្រី ស៊ុន ចាន់ថុល ជួបសំណេះសំណាលជាមួយសមាជិកសមាជិកាគណបក្ស ប្រជាជនកម្ពុជាក្នុងឃុំពោធិបានប្រមាណ៦៦៥នាក់ ស្រុកកោះធំ ខេត្តកណ្តាល ក្នុងយុទ្ធនាការឃោសនា បោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ កោះធំ៖ ថ្ងៃពុធ ២កើត ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០១ ខែមិថុនា ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានក្រុមការងារគណបក្សចុះមូលដ្ឋានស្រុកកោះធំ បានអញ្ជើញ ជាអធិបតីដ៏ខ្ពង់ខ្ពស់ក្នុងពិធីជួបសំណេះសំណាលជាមួយសមាជិកគណបក្សប្រជាជនកម្ពុជាឃុំពោធិបាន ស្រុកកោះធំ ខេត្តកណ្តាល ប្រមាណ៦៦៥នាក់ ដោយមានការចូលរួមពី ឯកឧត្តម លោកជំទាវ អនុប្រធាន ក្រុមការងារគណបក្សចុះមូលដ្ឋានស្រុក ឯកឧត្ដម អនុប្រធានគណបក្សខេត្ត ឯកឧត្តម លោកជំទាវ លោក លោកស្រី ប្រធានក្រុមការងារគណបក្សចុះមូលដ្ឋានឃុំ ឯកឧត្ដម ស្រេង ស្រស់ ប្រធានក្រុមការងារ គណបក្សចុះមូលដ្ឋានឃុំពោធិបាន ឯកឧត្ដម លោក លោកស្រី ក្រុមការងារគណបក្សចុះមូលដ្ឋាន ស្រុក ឃុំ ភូមិ គណៈអចិន្ត្រៃយ៍គណបក្សស្រុក គណៈអចិន្ត្រៃយ៍គណបក្សឃុំពោធិបាន និងសមាជិកគណបក្ស ប្រជាជនកម្ពុជាទូទាំងឃុំ។ ថ្លែងទៅកាន់សមាជិកសមាជិកាគណបក្សប្រជាជននាឱកាសនោះ ឯកឧត្តមទេសរដ្ឋមន្ត្រី បានគូស បញ្ជាក់ពីដំណើរវិវត្តន៍ប្រកបដោយភាពវិជ្ជមាននៃសភាពការណ៍ទូទៅរបស់កម្ពុជា បង្កលក្ខណៈសម្បត្តិល្អ ប្រសើរដល់ដំណើរការអភិវឌ្ឍគ្រប់វិស័យ ទោះបីស្ថានភាពជំងឺកូវីដ-១៩ក្នុងពិភពលោកនៅមានភាពស្មុគ ស្មាញយ៉ាងណាក្ដី។ ស្ថានភាពអំណោយផលនេះបានធ្វើឱ្យជីវភាពរស់នៅរបស់ប្រជាពលរដ្ឋនៅក្នុង សង្គមជាតិកាន់តែមានភាពប្រសើរឡើង ក្រោមដំបូលសុខសន្តិភាព បង្រួបបង្រួមជាតិ និងការអភិវឌ្ឍ តាមរយៈនយោបាយឈ្នះ-ឈ្នះរបស់សម្តេចតេជោនាយករដ្ឋមន្ត្រី។ បន្ថែមពីលើនេះ ឯកឧត្តមទេសរដ្ឋមន្ត្រី បានលើកឡើងផងដែរអំពី គម្រោងជួសជុលកែលម្អមណ្ឌល សុខភាពនានានៅក្នុងស្រុកកោះធំដើម្បីផ្តល់សេវាថែទាំសុខភាពជូនប្រជាពលរដ្ឋឱ្យកាន់តែប្រសើរឡើង បន្ថែមទៀត ជាពិសេសមណ្ឌលសុខភាពដែលនៅឆ្ងាយពីមន្ទីរពេទ្យតេជោសែនកោះធំ គម្រោងដាក់អំពូល ភ្លើងសូឡាបំភ្លឺផ្លូវដែលបានសាងសង់រួច ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ និង សមិទ្ធផលសំខាន់ៗជាច្រើនទៀតរួមមាន៖ ផ្លូវកៅស៊ូ ស្ពានឆ្លងទន្លេបាសាក់ ផ្លូវបេតុងខ្វាត់ខ្វែងឆ្លងកាត់ពី ឃុំមួយទៅឃុំមួយ ពីភូមិមួយទៅភូមិមួយស្ទើរតែទាំងអស់ ប្រឡាយទឹក អណ្ដូងទឹក និងសាលារៀន ជាដើម។ ឯកឧត្តមទេសរដ្ឋមន្រ្តី បានអំពាវនាវដល់បងប្អូនសមាជិកសមាជិកាគណបក្សប្រជាជនកម្ពុជា ក្នុងឃុំពោ ធិបាន និងអ្នកគាំទ្រគណបក្សប្រជាជនកម្ពុជាទាំងឡាយក្នុងស្រុកកោះធំ សូមប្រកាន់ខ្ជាប់ និងប្រតិបត្តិ ឱ្យបានត្រឹមត្រូវនូវក្រមសីលធម៌ទាំងឡាយដែលមានចែងក្នុងបទបញ្ជា និងនីតិវិធីសម្រាប់ការបោះឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ដើម្បីធានាឱ្យបរិយាកាសនៅក្នុងដំណើរការ ឃោសនាបោះឆ្នោតថ្ងៃស្ងប់ស្ងាត់ ថ្ងៃបោះឆ្នោត រាប់សន្លឹកឆ្នោត រហូតដល់ថ្ងៃប្រកាសលទ្ធផលបោះឆ្នោត ផ្លូវការប្រព្រឹត្តទៅដោយរលូន និងប្រកបដោយសុខសុវត្ថិភាព។ ជាមួយគ្នានោះដែរ ឯកឧត្តមទេសរដ្ឋមន្ត្រី បានផ្តាំផ្ញើបងប្អូនប្រជាពលរដ្ឋឱ្យទៅចូលរួមបោះឆ្នោតឱ្យបានគ្រប់ៗគ្នា នៅថ្ងៃអាទិត្យទី៥ ខែមិថុនា ឆ្នាំ២០២២ និងបោះឆ្នោតជូនគណបក្សប្រជាជនកម្ពជា ដែលមាន រូបសញ្ញាទេវតាបាចផ្កា និងមានលេខរៀងទី៣នៅលើសន្លឹកឆ្នោតសម្រាប់ឃុំពោធិបាន ដោយនាំយកទៅ ជាមួយនូវអត្តសញ្ញាណបណ្ណសញ្ជាតិខ្មែរដែលមានសុពលភាព ឬឯកសារបញ្ជាក់អត្តសញ្ញាណបម្រើឱ្យ ការបោះឆ្នោតផងដែរ។ សូមជម្រាបជូនថា៖ សមិទ្ធផលសម្រេចបានដែលក្រុមការងារគណបក្សបានកសាងសម្រាប់ជាប្រយោជន៍ ដល់ប្រជាពលរដ្ឋក្នុងឃុំពោធិ ស្រុកកោះធំ បានមានដូចជា៖ ធ្វើផ្លូវបេតុងប្រវែង៣.៥៧៨ម៉ែត្រ ស្ដារ ប្រឡាយ៣ខ្សែប្រវែង៩៥០ម៉ែត្រ មានអណ្ដូងស្នប់១០អណ្ដូង នៅភូមិក្បាលជ្រោយ មានបង្គោលភ្លើង៥០ដើមនៅភូមិព្រែកម្រេញ មានស្ពានបេឡេត៍១កន្លែង នៅភូមិព្រែកតាដុស៕