ជួបសំណេះសំណាលជាមួយប្រជាពលរដ្ឋប្រមាណ៩០០នាក់ នៅក្នុងភូមិទាំង១៥ នៅឃុំលើកដែក ស្រុកកោះធំ ខេត្តកណ្តាល ក្នុងយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ក្រោមអធិបតីភាពដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល កោះធំ៖ ថ្ងៃចន្ទ ១៥រោច ខែពិសាខ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៣០ ខែឧសភា ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានគណៈអចិន្រ្តៃយ៍ក្រុមការងារគណបក្សចុះមូលដ្ឋាន ស្រុកកោះធំ បានអញ្ជើញជួបសំណេះសំណាលជាមួយប្រជាពលរដ្ឋប្រមាណ៩០០នាក់នៅ ក្នុងភូមិទាំង១៥ នៅឃុំលើកដែក ស្រុកកោះធំ ខេត្តកណ្តាល នៅក្នុងយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ដោយមានការចូលរួមពីឯកឧត្តម លោកជំទាវ អនុប្រធានក្រុមការងារគណបក្សចុះមូលដ្ឋានស្រុក ឯកឧត្តម លោកជំទាវ លោក លោកស្រី ប្រធានក្រុមការងារគណបក្សចុះមូលដ្ឋានឃុំ លោក លោកស្រី ក្រុមការងារគណបក្សចុះមូលដ្ឋាន ស្រុក ឃុំ ភូមិ គណៈអចិន្ត្រៃយ៍គណបក្សស្រុក គណៈអចិន្ត្រៃយ៍គណបក្សឃុំលើកដែក សមាជិកគណបក្សប្រជាជន កម្ពុជាទូទាំងឃុំលើកដែក។ ថ្លែងក្នុងមតិសំណេះសំណាលនាឱកាសនោះ ឯកឧត្តមទេសរដ្ឋមន្ត្រី បានគូសបញ្ជាក់ពីសារសំខាន់នៃ តួនាទីនិងភារកិច្ច របស់សមាជិកសមាជិកាបេក្ខភាពដែលបានឈរឈ្មោះបោះឆ្នោតដើម្បីបម្រើប្រជា ពលរដ្ឋនៅឃុំលើកដែក ឱ្យអស់ពីកម្លាំងកាយកម្លាំងចិត្ត និងបានស្នើឱ្យបងប្អូនប្រជាពលរដ្ឋនៅឃុំនេះ ពិចារណាឱ្យបានច្បាស់លាស់នៅពេលគូសសន្លឹកឆ្នោត ដោយចោទសួរខ្លួនឯងថាតើគួរបោះឆ្នោតឱ្យគណបក្សណា? តើគណបក្សណាដែលនាំមកនូវសុខសន្តិភាពជូនប្រទេសជាតិមាតុភូមិរបស់យើង តើគណបក្សណាដែលកសាងមន្ទីរពេទ្យតេជោសែនកោះធំឱ្យយើង និងអាចឆ្លើយថា៖ អ្នកកសាង មន្ទីពេទ្យតេជោសែនកោះធំ គឺគណបក្សប្រជាជនកម្ពុជា។ ឯកឧត្តមទេសរដ្ឋមន្ត្រី បានសង្កត់ធ្ងន់ធ្ងរថា ក្រុមការងារគណបក្សប្រជាជននៅឃុំលើកដែក ស្រុកកោះធំ ខេត្តកណ្ដាល គឺជាអ្នកបម្រើរាស្ត្រ តាមអនុសាសន៍ណែនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ឱ្យខំបម្រើរាស្ត្រ ផ្ដល់សេវាសាធារណៈ សេវាចាំបាច់ ធ្វើឱ្យបានលឿន ធ្វើឱ្យមានប្រសិទ្ធភាព និងធ្វើឱ្យមានតម្លាភាព។ កាលពីមុនស្ពានដែក ឥឡូវនេះមានស្ពានបេតុង បន្តិចទៀតយើងមានផ្លូវ ១១ម៉ែត្រ មានផ្លូវកៅស៊ូ យើងមានផ្លូវកំពុងតែធ្វើ និងបន្តធ្វើ នេះដោយសារមានសុខសន្តិភាព មានស្ថិរភាពនយោបាយ ក្រោមការដឹកនាំដ៏ឆ្លាសវៃរបស់អគ្គមហាសេនាបតីតេជោ ហ៊ុន សែន អនុញ្ញាតឱ្យយើងមានឱកាសទាក់ទាញអ្នកវិនិយោគមកដាក់ទុននៅកម្ពុជា បង្កើតការងារជូនបងប្អូនប្រជាពលរដ្ឋមានការងារធ្វើ។ សុខសន្តិភាពធ្វើឱ្យកម្ពុជាយើង ទាក់ទាញទេសចរណ៍រាប់លានអ្នកមកលេងប្រទេសកម្ពុជាយើង បង្កើតការងារឱ្យបងប្អូនប្រជាពលរដ្ឋមានការងារធ្វើ ដឹកនាំទំនិញយើងទៅលក់នៅបរទេស មានឱកាសសាងសង់ផ្លូវ ស្ពាន សាលារៀន មន្ទីរពេទ្យ ទឹក ភ្លើង នេះហើយសុខសន្តិភាព កុំយកអ្វីមួយ មកប្តូរ នឹងសុខសន្តិភាពឱ្យសោះ កត្តានេះសំខាន់ណាស់យើងការពារសុខសន្តិភាពឱ្យបាន កសាងប្រទេសជាតិយើងឱ្យបានច្រើនបន្ថែមទៀត។ ឯកឧត្តមទេសរដ្ឋមន្ត្រីបានថ្លែងទៅកាន់បងប្អូនប្រជាពលរដ្ឋនាឱកាសនោះប្រកបដោយខ្លឹមសាថា៖ ឃុំលើកដែកយើង មានផ្លូវបេតុងល្អហើយ មានភ្លើងបំភ្លឺផ្លូវ បងប្អូនប្រជាពលរដ្ឋ លែងកាន់និងប្រើភ្លើងទៀនទៀតហើយ គេប្រើភ្លើងដោយពន្លឺព្រះអាទិត្យ ដាក់អំពូលភ្លើង ហេីយឆាប់ៗនេះយើងនឹងមានផ្លូវល្អពីឃុំលើកដែក ទៅស្រុកលើកដែក ដែលគ្រោងបេីកការដ្ឋានសាងសង់នៅចុងឆ្នាំ២០២២នេះ ដេីម្បីផ្ដល់ភាពងាយស្រួលឱ្យបងប្អូនប្រជាពលរដ្ឋក្នុងការធ្វើដំណើរឆ្លងកាត់ពីភូមិមួយទៅកាន់ភូមិមួយ គណបក្សប្រជាជនសន្យាហើយគឺត្រូវតែធ្វើ មិននិយាយហើយទុកចោលទេ។ ឯកឧត្តមទេសរដ្ឋមន្ត្រី ក៏បានផ្តាំផ្ញើផងដែរសុំឱ្យបងប្អូនប្រជាពលរដ្ឋក្នុងឃុំនេះអញ្ជើញទៅបោះឆ្នោតជ្រើស រើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ដែលនឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ឱ្យ បានគ្រប់ៗគ្នា ចាប់ផ្ដើមពីម៉ោង៧.០០នាទីព្រឹក រហូតដល់ម៉ោង១៥.០០នាទីរសៀល និងបោះឆ្នោតជូន គណបក្សប្រជាជនកម្ពុជា ឃុំលើកដែក ស្ថិតក្នុងលំដាប់លេខរៀងទី៥ មានរូបទេវតាបាចផ្កាជាសម្គាល់ ក្នុងចំណោមគណបក្សចូលរួមការបោះឆ្នោតចំនួន៥ ដោយភ្ជាប់មកជាមួយនូវអត្តសញ្ញាណប័ណ្ណសញ្ជាតិខ្មែរដែលមានសុពលភាព ឬឯកសារបញ្ជាក់អត្តសញ្ញាណ បម្រើឱ្យការបោះឆ្នោត ព្រមទាំងសូមពិនិត្យមើលឈ្មោះ និងទិន្នន័យឱ្យបានច្បាស់លាស់ផងដែរ។ គួរកត់សម្គាល់ផងដែរថា៖ សមិទ្ធផលហេដ្ឋារចនាសម្ព័ន្ធដឹកជញ្ជូនតភ្ជាប់សម្រេចបានក្នុងឃុំលើកដែក រួមមាន៖ ធ្វើផ្លូវបេតុងចំនួន ៨កន្លែង ប្រវែង ១០.១៨០ម៉ែត្រ ក្នុងនោះ នៅភូមិចំការដូង ១កន្លែង ប្រវែង ២.៤០០ម៉ែត្រ នៅភូមិព្រែកអណ្ដូង ១កន្លែង ប្រវែង ៣០០ម៉ែត្រ នៅភូមិថ្មី ១កន្លែង ប្រវែង ៤.៤៨០ម៉ែត្រ នៅភូមិអន្លង់ស្លាត ១កន្លែង ប្រវែង១.៦០០ម៉ែត្រ នៅភូមិពោធិ៍មិត្ត ១កន្លែង ប្រវែង ៣០០ម៉ែត្រ នៅភូមិត្រឡោកបែក ១កន្លែង ប្រវែង ៤០០ម៉ែត្រ នៅភូមិព្រែកខ្នាច ១កន្លែង ប្រវែង ៧០០ម៉ែត្រ សាងសង់លូជ្រុង ២កន្លែង ប្រវែង ៨០ម៉ែត្រ ក្នុងនោះនៅភូមិត្រឡោកបែក ១កន្លែង ប្រវែង ៤០ម៉ែត្រ នៅភូមិពាមផ្ទោលលិច ១កន្លែង ប្រវែង ៤០ម៉ែត្រ៕