រដ្ឋមន្រ្តីដឹកជញ្ជូនចំនួន៦៣ប្រទេសនៃវេទិកាដឹកជញ្ជូនអន្តរជាតិ (ITF) បោះឆ្នោតជាឯកឆន្ទដាក់បញ្ចូល កម្ពុជាជាសមាជិកទី៦៤នៃ ITF នៅក្នុងកិច្ចប្រជុំកំពូលប្រចាំឆ្នាំនៅទីក្រុង Leipzig (ឡាពហ្សិក) ប្រទេសអាល្លឺម៉ង់។ នេះបើយោងតាមក្រសួងសាធារណការ និងដឹកជញ្ជូន។ កម្ពុជា ត្រូវបានដាក់បញ្ចូលជាសមាជិកទី៦៤នៃវេទិកាដឹកជញ្ជូនអន្តរជាតិ(International Transport Forum_ITF)នៅប្រទេសអាល្លឺម៉ង់ កាលពីថ្ងៃទី១៩ឧសភា ឆ្នាំ២០២២។ លោក ឡេង ធនយុទ្ធា រដ្ឋលេខាធិការក្រសួងសាធារណការ និងដឹកជញ្ជូន បានថ្លែងក្នុងកិច្ចប្រជុំកំពូលប្រចាំឆ្នាំនៅទីក្រុងLeipzig ថា ជាមោទកភាពយ៉ាងខ្លាំងដែលកម្ពុជាត្រូវបានដាក់បញ្ចូលជាសមាជិកទី៦៤នៃITF ហើយនេះ គឺជាការឆ្លុះបញ្ចាំងអំពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការអភិវឌ្ឍវិស័យដឹកជញ្ជូននិងភស្តុភារកម្មនៅកម្ពុជា។ លោក ឡេង ធនយុទ្ធា មានប្រសាសន៍ដូច្នេះ៖ «ការចូលជាសមាជិកវេទិកាដឹកជញ្ជូនអន្តរជាតិនេះ បានផ្តល់ឱកាសឱ្យកម្ពុជាទទួលបាន និងចែករំលែកចំណេះដឹង និងបទពិសោធន៍ល្អៗ ជាមួយបណ្តាប្រទេសជាសមាជិកទាំងអស់ ជាទុនដល់ការអភិវឌ្ឍប្រព័ន្ធដឹកជញ្ជូនកម្ពុជា ប្រកបដោយប្រសិទ្ធភាព និរន្តរភាព និងបរិយាប័ន»។ សេចក្តីប្រកាសព័ត៌មានរបស់ក្រសួងសាធារណការបន្តស្រង់សម្តីលោក ឡេង ធនយុទ្ធា ថា លើសពីនេះ កម្ពុជានឹងទទួលបាននូវការគាំទ្រពីប្រទេសជាសមាជិក និងលេខាធិការដ្ឋាននៃITF ទាំងក្នុងក្របខណ្ឌបច្ចេកទេសនិងក្របខណ្ឌគោលនយោបាយ ក្នុងការអភិវឌ្ឍវិស័យដឹក និងភស្តុភារកម្មនៅកម្ពុជា។ បើតាមលោក Young Tae Kim អគ្គលេខាធិការនៃITF កម្ពុជាជាប្រទេសតែមួយគត់ក្នុងតំបន់អាស៊ីអគ្នេយ៍ ដែលបានចូលជាសមាជិកITF។ លោក ប្រកាសស្វាគមន៍កម្ពុជាជាសមាជិករបស់ITF ហើយសង្ឃឹមថាប្រទេសដ៏ទៃទៀត នៅក្នុងតំបន់អាស៊ីអាគ្នេយ៍នឹងចូលរួមជាសមាជិកITF ផងដែរ។ ក្រសួងសាធារណការបានស្រង់សម្តីអគ្គលេខាធិការនៃIFTមកចុះផ្សាយថា៖ « ITF បានត្រៀមខ្លួនជាស្រេចក្នុងការជួយប្រទេសកម្ពុជា​ ក្នុងការកសាងគោលនយោបាយដឹកជញ្ជូន និងភស្តុភារកម្ម ដើម្បីសម្រេចគោលដៅរបស់ខ្លួន ដូចមានចែងនៅក្នុងផែនការមេស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភារកម្ម»៕