វគ្គបណ្តុះបណ្តាលស្តីពី សុវត្ថិភាពចរាចរណ៍ ដល់សមាជិក សមាជិកា ស.ស.យ.ក ខេត្តត្បូងឃ្មុំ ................... នៅព្រឹកថ្ងៃព្រហស្បតិ៍ ១២កើត ខែពិសាខ ឆ្នាំខាល ចត្វាស័ក ព.ស.២៥៦៥ ត្រូវនឹងថ្ងៃទី១២ ខែឧសភា ឆ្នាំ២០២២ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក និងជាអនុប្រធានផ្នែកដឹកជញ្ជូន នៃ ស.ស.យ.ក វិស័យសាធារណការ និងដឹកជញ្ជូន បានអមដំណើរ​ ឯកឧត្តម ឈួន វ៉ន់ ប្រធានផ្នែកដឹកជញ្ជូន នៃ ស.ស.យ.ក. ក្នុងវិស័យសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តម​ ឈួន​ វិន​ ប្រធាន​ ស.ស.យ.ក​ វិស័យ​សាធារណការ​ និងដឹកជញ្ជូន លោក ម៉ៅ ឌុង នាយករដ្ឋបាល និង ជាប្រធានសហភាពសហព័ន្ធយុវជនកម្ពុជា ខេត្តត្បូងឃ្មុំ លោក អ៊ុក សំអូន ប្រធាននាយកដ្ឋានសេវាអតិថិជន និងទំនាក់ទំនងសាធារណៈ នៃ ប.ស.ស ចូលរួមវគ្គបណ្តុះបណ្តាលស្តីពី សុវត្ថិភាពចរាចរណ៍ ដល់សមាជិក សមាជិកា ស.ស.យ.ក. ខេត្តត្បូងឃ្មុំ នៅសាលប្រជុំសាលាខេត្តត្បូងឃ្មុំ ដោយមានសិក្ខាកាមចូលរួមសរុបចំនួន ១០០នាក់។ វគ្គបណ្តុះបណ្តាលនេះរៀបចំឡើងក្នុងគោលបំណងអប់រំផ្សព្វផ្សាយអំពីសុវត្ថិភាពចរាចរណ៍ដល់សមាជិក សមាជិកា ស.ស.យ.ក. ខេត្តត្បូងឃ្មុំ ដើម្បីជួយអប់រំផ្សព្វផ្សាយបន្ត។ ប្រធានបទក្នុងវគ្គបណ្តុះបណ្តាលរួមមាន៖ ស្ថានភាពគ្រោះថ្នាក់ចរាចរណ៍ផ្លូវគោក ការប្រើប្រាស់មួកសុវត្ថិភាព ការប្រើប្រាស់ល្បឿន និងហានិភ័យនៃការបើកបរក្រោមឥទ្ធិពលនៃគ្រឿងស្រវឹង។ ​វគ្គបណ្តុះបណ្តាលនេះរៀបចំដោយផ្នែកដឹកជញ្ជូន នៃ​ ស.ស.យ.ក ក្នុងវិស័យសាធារណការ​ និងដឹកជញ្ជូន​ សហការជាមួយមន្ទីរសាធារណការ និងដឹកជញ្ជូនខេត្តត្បូងឃ្មុំ ស.ស.យ.ក ខេត្តត្បូងឃ្មុំ និងមានការចូលរួមឧបត្ថម្ភដោយ បេឡាជាតិរបបសន្តិសុខសង្គម។ ក្នុងវគ្គបណ្តុះបណ្តាលនេះក៏មានការចែកជូនមួកសុវត្ថិភាពចំនួន​ ៥០មួក ជូនដល់សិក្ខាកាមដែលបានចូលរួមឆ្លើយសំណួរត្រឹមត្រូវ។