ពោធិ៍សាត់៖ មន្ត្រីជាន់ខ្ពស់ក្រសួងសាធារណការ និងដឹកជញ្ជូន បានឱ្យដឹងថា គម្រោងកែលម្អគ្រប់គ្រងបរិស្ថាន នៅក្នុងក្រុងពោធិ៍សាត់ គឺជាការឆ្លើយតបទៅនឹងតម្រូវការរបស់ប្រជាពលរដ្ឋ ហើយក៏បានប្រែក្លាយទីប្រជុំជនក្រុងឱ្យកាន់តែមានសោភ័ណភាពឡើងវិញ។ ក្នុងកិច្ចប្រជុំ ស្តីពីវឌ្ឍនភាព នៃការគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាប ក្នុងភូមិសាស្ត្រាក្រុងពោធិ៍សាត់ កាលពីថ្ងៃទី១០ ខែឧសភាឆ្នាំ២០២២ ឯកឧត្តម វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន បានស្នើឱ្យរដ្ឋបាលក្រុង ខេត្ត និង​ស្ថាប័នពាក់ព័ន្ធ ចូលរួមលើការងាររក្សាការពារ ​និងថែទាំ​សមិទ្ធផល​ទាំងអស់ បន្ទាប់​ពី​ស្ថាបនារួចរាល់។ ឯកឧត្តម បានទទួលស្គាល់ដែរថា រាល់ដំណើរការស្ថាបនាគម្រោងនេះ តែងតែមានបញ្ហា​ប្រឈម​មួយចំនួន ​ហើយបញ្ហាទាំងនោះ​ ក្រុមការងារ ​បានជូនដំណឹង ​និងក្រើនរំលឹកដល់ក្រុមហ៊ុន ដើម្បី​ធ្វើការកែ​តម្រូវឡើងវិញ​ ឲ្យបានសមស្របតាមលក្ខណៈបច្ចេកទេសរបស់គម្រោង។ គម្រោងកែលម្អគ្រប់គ្រងបរិស្ថានក្រុង​ ជុំវិញបឹងទន្លេសាប ក្នុងក្រុងពោធិ៍សាត់ គឺទទួល​បាន​ហិរញ្ញប្បទាន​ពី​ធនាគារ​អភិវឌ្ឍន៍អាស៊ី (ADB) ​ស្ថិតក្រោមការគ្រប់គ្រង ​និងអនុវត្តគម្រោងដោយ​ក្រសួងសាធារណការ និងដឹកជញ្ជូន រួមជាមួយរដ្ឋបាលខេត្ត ហើយគម្រោងនេះ ​ត្រូវបានបែងចែកជា អនុគម្រោងចំនួន២ ទី១- អនុគម្រោង​ទីលានគ្រប់គ្រងសំណល់រឹង ដែលបច្ចុប្បន្នសម្រេចបាន ១០០ភាគរយ ​លើការសាងសង់​ទីលានចាក់សំរាមថ្មី ​ដែលមានភាពទំនើប ​ផ្តោតលើការការពារ​បរិស្ថាន​ជាចម្បង និងទី២- អនុគម្រោងប្រព័ន្ធលូរំដោះភ្លៀង ​ទឹកកខ្វក់ និងអាងប្រព្រឹត្តិកម្មសំណល់​រាវ ដែល​បច្ចុប្បន្ន ​សម្រេចបានប្រមាណ៩០ភាគរយ៕អត្ថបទ៖ ពៅ ភិរុណ