​មន្ដ្រីជំនាញរដ្ឋបាលរាជធានីភ្នំពេញបានបញ្ជាក់នៅព្រឹកថ្ងៃទី២៨ ខែមេសា ឆ្នាំ២០២២នេះថា ស្ពានអាកាសថ្មើរជើងសន្ធរម៉ុក ស្ថិតក្នុងខណ្ឌទួលគោក គ្រោងនឹងសម្ពោធ ដាក់ឱ្យប្រើប្រាស់នៅពេលដ៏ខ្លីខាងមុខនេះ ខណៈដែលការសាងសង់ស្ពានអាកាសថ្មើរជើង មួយនេះបានស្ថាបនារួចរាល់១០០ភាគរយហើយ ដើម្បីទុកឱ្យបងប្អូនប្រជាពលរដ្ឋ ពិសេស ប្អូនៗ កូនក្មួយសិស្សានុសិស្សបានដើរឆ្លងកាត់ ដែលអាចកាត់បន្ថយបាននូវគ្រោះថ្នាក់ ចរាចរណ៍។ ​ លោក សាំ ពិសិដ្ឋ​ប្រធានមន្ទីរសាធារណការ និងដឹកជញ្ជូនរាជធានីភ្នំពេញ ក៏បាន ឱ្យដឹងនៅថ្ងៃទី២៨នេះដែរថា ស្ពានអាកាសថ្មើរជើងសន្ធរម៉ុកនេះ ជាសមិទ្ធផលថ្មី មួយទៀត របស់ ឯកឧត្តម ឃួង ស្រេង អភិបាលរាជធានីភ្នំពេញ។ ការដ្ឋាននេះស្ថាបនាបានរួចរាល់ ១០០ភាគរយហើយ គ្រោងនឹងសម្ពោធដាក់ឱ្យប្រើប្រាស់នៅពេលដ៏ខ្លីខាងមុខនេះ ក្រោម អធិបតីភាព ឯកឧត្តម ឃួង ស្រេង អភិបាលរាជធានីភ្នំពេញ ដើម្បីទុកឱ្យបងប្អូនប្រជាពលរដ្ឋ ពិសេសប្អូនៗ កូនក្មួយសិស្សានុសិស្សបានដើរឆ្លងកាត់ ព្រោះថា ស្ពានថ្មើរជើងមួយនេះ បាន ធ្វើរំលងមហាវិថីធំៗ២ខ្សែ និងនៅលើចំណុចប្រសព្វផ្លូវបែកជា៤ ដែលត្រូវមានអ្នក ដើរឆ្លងកាត់ច្រើន។ ​យុវជន ឈ្នោះ ហ៊ុន ពេជ្រធន់នរៈ បានបង្ហាញពីការចាប់អារម្មណ៍ថា បន្ទាប់ពីមាន ស្ពានមួយនេះ ពួកគេមានភាពងាយស្រួលក្នុងការធ្វើដំណើរឆ្លងកាត់ ដែលបានជួយកាត់ បន្ថយនូវគ្រោះថ្នាក់ជាយថាហេតុ និងមិនបាច់រងចាំស្តុប មិនចំណាយពេលយូរ ដូចជាការ ពេលដែលមិនទាន់មានស្ពានអាកាសថ្មើរជើងនេះ។ ជាមួយគ្នានោះ ប្រជាពលរដ្ឋបាន ថ្លែង អំណរគុណដល់រាជរដ្ឋាភិបាល និងគណៈអភិបាលរាជធានីភ្នំពេញ ដែលបានកសាង ស្ពានអាកាសនេះឡើង ដែលបានជួយសម្រួលដល់ការធ្វើដំណើរនៅជុំវិញតំបន់នេះឱ្យកាន់ តែមានភាពល្អប្រសើរ។ ​សូមបញ្ជាក់ថា ស្ពានអាកាសថ្មើរជើងនៅមុខសាលាបឋមសិក្សាសន្ធរម៉ុក ត្រូវសាង់ សង់នៅលើចំណុចផ្លូវប្រសព្វទាំង៤ទិស គឺសាងសង់កាត់ទទឹង ផ្លូវម៉ៅសេទុង ២ខ្សែ និងកា ត់ទទឹងផ្លូវកម្ពុជាក្រោម២ខ្សែ ដើម្បីបង្កលក្ខណៈងាយស្រួលដល់សិស្សានុសិស្សបានឆ្លង កាត់ ស្ពាននេះដោយសុវត្ថិភាព ទោះពួកគេមកពីទិសខាងណាក៏ដោយ។ មកដល់ពេលនេះ រាជធានីភ្នំពេញមានស្ពានអាកាសថ្មើរជើងចំនួន៤កន្លែងហើយរួមមាន៖ នៅតំបន់ជម្ពូវ័ន្ត ខណ្ឌពោធិ៍សែនជ័យ មានចំនួន២កន្លែង នៅតំបន់ភ្លើងស្តុបនាងគង្ហីងមានចំនួន ១កន្លែង និងនៅផ្សារដើមគរមានមួយកន្លែងទៀត ដែលបានបើកសម្ពោធដាក់ឱ្យប្រើប្រាស់ជាផ្លូវការ កាលពីចុងខែកក្កដា ឆ្នាំ២០២០កន្លងមកនេះ ក្រោមវត្តមាន ឯកឧត្តម ឃួង ស្រេង អភិបាលរាជធានីភ្នំពេញ៕