លោក ឈួន វិន ប្រធានក្រុមការងារ ស.ស.យ.ក វិស័យសាធារណការ និងដឹកជញ្ជូន អញ្ជើញដឹកនាំកិច្ចប្រជុំផ្សព្វផ្សាយលទ្ធផលនៃកិច្ចប្រជុំគណៈកម្មាធិការកណ្ដាល ស.ស.យ.ក និងពិភាក្សាអំពីការរៀបចំបែងចែកតួនាទី និងភារកិច្ចរបស់ផ្នែក និងក្រុមជំនាញ ចំណុះឱ្យក្រុមការងារក្នុងវិស័យ ថ្ងៃព្រហស្បតិ៍ ១៤រោច ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៣១ ខែមីនា ឆ្នាំ២០២២ នៅទីស្តីការក្រសួង លោក ឈួន វិន ប្រធានក្រុមការងារ ស.ស.យ.ក វិស័យសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ ផ្សព្វផ្សាយលទ្ធផលនៃកិច្ចប្រជុំគណៈកម្មាធិការកណ្ដាលសហភាពសហព័ន្ធយុវជនកម្ពុជា និងពិភាក្សាអំពីការរៀបចំបែងចែកតួនាទី ភារកិច្ចរបស់ផ្នែក និងក្រុមជំនាញ នៃក្រុមការងារ ស.ស.យ.ក ក្នុងវិស័យវិស័យ ដោយមានការអញ្ជើញចូលរួមពី លោក-លោកស្រី អនុប្រធានក្រុមការងារវិស័យសរុបចំនួន ១៤រូប។ កិច្ចប្រជុំនេះគឺផ្ដោតជាសំខាន់លើការផ្សព្វផ្សាយលទ្ធផលនៃកិច្ចប្រជុំគណៈកម្មាធិការកណ្ដាល ស.ស.យ.ក ដែលក្នុងនោះផងដែរលទ្ធផលនៃកិច្ចប្រជុំបានបោះឆ្នោតជ្រេីសតាំងសមាសភាពសមាជិកគណៈអចិន្ត្រៃយ៍ ចំនួន ៣រូប ព្រមទាំងបំពេញបន្ថែមសមាជិកគណៈកម្មាធិការកណ្តាល ចំនួន ៩រូប។ នាពេលកន្លងមក ស.ស.យ.ក បានចូលរួមចំណែកសម្របសម្រួលក្នុងយុទ្ធនាការចាក់វ៉ាក់សាំងបង្ការជំងឺ កូវីដ១៩ នៅទូទាំងប្រទេស ដែលកម្ពុជាសម្រេចបានអត្រាខ្ពស់បំផុត និងបានបើកដំណើរការប្រទេស និងសេដ្ឋកិច្ចបានយ៉ាងពេញលេញឡើងវិញ ក្រៅពីនេះទៀត ស.ស.យ.ក ក៏ចូលរួមចំណែកដ៏សំខាន់ក្នុងការអភិវឌ្ឍសង្គមជាតិផងដែរ។ ដោយឡែកសម្រាប់ការរៀបចំបែងចែកតួនាទី ភារកិច្ចរបស់ផ្នែក និងក្រុមជំនាញ កិច្ចប្រជុំក៏បានពិភាក្សាយ៉ាងលម្អិត និងបានសម្រេច រៀបចំការបែងចែកតួនាទី ភារកិច្ចគឺត្រូវសម្រេចតាមការអនុវត្តការងារជាក់ស្តែងរបស់ផ្នែក ឬក្រុមនិមួយៗ ដោយគ្រាន់តែប្រជុំដើម្បីផ្តល់យោបល់ និងសម្រេចដោយប្រធានក្រុម ឬផ្នែកសាម៉ី។ ដែលការបែងចែកតួនាទី ភារកិច្ចនេះគឺដើម្បីឱ្យមានការទទួលខុសត្រូវដោយឡែក មានភាពជាម្ចាស់ការក្នុងការអនុវត្តការងារឱ្យកាន់តែល្អប្រសើរ និងទាន់ពេលវេលា ព្រមទាំងមានភាពស្និតស្នាលជាមួយគ្នារវាង ថ្នាក់ដឹកនាំ ជាមួយសមាជិក។ ថ្លែងទៅកាន់អង្គប្រជុំនាឱកាសនោះ លោកប្រធានក្រុមការងារ បានគាំទ្រនិងលើកទឹកចិត្តដល់ក្រុមការងារទាំងអស់ដែលបានខិតខំអនុវត្តការងារ និងបានលើកទឹកចិត្តដល់ក្រុមការងារសុវត្ថិភាពចរាចរណ៍ បន្តការងាររបស់ខ្លួនឱ្យបានកាន់តែទូលំទូលាយ ជាប្រចាំ និងធ្វើការសហការជាមួយ ស.ស.យ.ក វិស័យអប់រំ យុវជន និងកីឡា និង ស.ស.យ.ក រាជធានី-ខេត្ត ដើម្បីបណ្តុះបណ្តាល និងផ្សព្វផ្សាយស្តីពីសុវត្ថិភាពចរាចរណ៍ ដល់សិស្ស-និស្សិត នៅតាមសាកលវិទ្យាល័យ និងនៅតាមសាលារៀនផ្សេងៗ៕