ឯកឧត្តមអគ្គនាយក ឈៀង ពេជ្រ ដឹកនាំគណៈប្រតិភូក្រសួងចូលរួមសន្និសីទចក្រភពអង់គ្លេស-អាស៊ាន ស្ដីពីភាពជាអ្នកដឹកនាំអាស៊ានក្នុងវិស័យហេដ្ឋារចនាសម្ព័ន្ធប្រកបដោយចីរភាព តាមប្រព័ន្ធវីដេអូពីចម្ងាយ ថ្ងៃអង្គារ ១២រោច ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៩ ខែមីនា ឆ្នាំ២០២២ នៅទីស្ដី ក្រសួង ឯកឧត្តម ឈៀង ពេជ្រ អគ្គនាយកនៃអគ្គនាយកដ្ឋានភស្តុភារកម្ម ក្រសួងសាធារណការ និងដឹកជញ្ជូន និងជាប្រធានឧត្ដមមន្ត្រីដឹកជញ្ជូនកម្ពុជា បានអញ្ជើញដឹកនាំគណៈប្រតិភូក្រសួងចូលរួមសន្និសីទចក្រភពអង់គ្លេស-អាស៊ាន ស្ដីពីភាពជាអ្នកដឹកនាំអាស៊ានក្នុងវិស័យហេដ្ឋារចនាសម្ព័ន្ធប្រកបដោយចីរភាព(UK-ASEAN SUSTAINABLE LEADERSHIP IN INFRASTRUCTURE CONFERENCE(ASLIP)) សហការរៀបចំឡើងដោយចក្រភពអង់គ្លេស និងលេខាធិការដ្ឋានអាស៊ាន តាមប្រព័ន្ធវីដេអូពីចម្ងាយ។ សន្និសីទនេះមានការចូលរួមពីប្រតិភូរាជរដ្ឋាភិបាលកម្ពុជាមកពីទីស្តីការគណៈរដ្ឋមន្រ្តី ក្រសួងការបរទេស និងសហប្រតិបត្តិការអន្តរជាតិ ក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម ក្រុមប្រឹក្សាអភិវឌ្ឍន៍ កម្ពុជា និងលេខាធិការដ្ឋានអាកាសចរណ៍ស៊ីវិល។ អង្គសន្និសីទបានពិភាក្សាលើការងារសំខាន់ចំនួន៣រួមមាន៖ ១) ការបើកដំណើរការកម្មវិធីភាពជាអ្នក ដឹកនាំប្រកបដោយចីរភាពអាស៊ានក្នុងវិស័យហេដ្ឋារចនាសម្ព័ន្ធ រួមទាំងការចែករំលែកព័ត៌មានលម្អិតអំពី កម្មវិធីសិក្សា ប្រភេទបេក្ខជនល្អ និងដំណើរការជ្រើសរើសក្រុម ២) ការបង្កើតតម្រូវការ និងបង្កើនការយល់ ដឹងអំពីASLIP និង ៣) ការសម្របសម្រួលកិច្ចពិភាក្សាស្តីពីកិច្ចសហការរវាងរដ្ឋាភិបាល និងវិស័យ ឯកជននៅក្នុងវិស័យហេដ្ឋារចនាសម្ព័ន្ធប្រកបដោយចីរភាព ព្រមទាំងផ្សារភ្ជាប់ការចូលរួមពីភាគីពាក់ព័ន្ធ ក្នុងវិស័យឯកជនសំខាន់ៗពីទូទាំងអាស៊ាន និងចក្រភពអង់គ្លេស។ ថ្លែងសុន្ទរកថាក្នុងសន្និសីទនេះ ឯកឧត្ដមអគ្គនាយក បានលើកឡើងអំពីចំនុចសំខាន់ៗរួមមាន៖ (១) កិច្ចសហប្រតិបត្តិការលើវិស័យពាក់ព័ន្ធ និងភាពជាដៃគូ ជាគន្លឹះក្នុងការជំរុញហេដ្ឋារចនាសម្ព័ន្ធប្រកប ដោយចីរភាពនៅក្នុងអាស៊ាន (២) ការបន្តស្វែងរកកិច្ចសហប្រតិបត្តិការ និងបង្កើតភាពជាដៃគូរបស់អាស៊ាន ដើម្បីផ្តល់ហេដ្ឋារចនាសម្ព័ន្ធប្រកបដោយចីរភាព និង (៣)បទពិសោធន៍ដ៏សម្បូរណ៍បែបរបស់រដ្ឋាភិបាល និងវិស័យឯកជនរបស់ចក្រភពអង់គ្លេសក្នុងការអភិវឌ្ឍហេដ្ឋារចនាសម្ព័ន្ធ ដែលមានអត្ថប្រយោជន៍សម្រាប់អាស៊ាន និងការបន្តការចូលរួមជាមួយវិស័យឯកជនលើការអនុវត្តផលិតភាព ហេដ្ឋារចនាសម្ព័ន្ធល្អបំផុត និងមានសារៈសំខាន់នៅក្នុងដំណាក់កាលបន្ទាប់នៃការអនុវត្ត។ ឯកឧត្ដមអគ្គនាយក បានថ្លែងអំណរគុណយ៉ាងជ្រាលជ្រៅដល់រាជរដ្ឋាភិបាលចក្រភពអង់គ្លេស ដែលបានផ្តល់ការគាំទ្រ និងជំនួយក្នុងការជំរុញហេដ្ឋារចនាសម្ព័ន្ធប្រកបដោយចីរភាព តាមរយៈវគ្គបណ្តុះបណ្តាលកម្មវិធី ASLIP នាពេលខាងមុខ។ សូមជម្រាបជូនថា៖ សន្និសីទនេះបានឆ្លុះបញ្ចាំងអំពីការប្តេជ្ញាចិត្តរបស់រដ្ឋាភិបាលចក្រភពអង់គ្លេសក្នុង ការបណ្តុះបណ្តាធនធានមនុស្សនៅក្នុងតំបន់អាស៊ាន តាមរយៈការផ្តល់វគ្គបណ្តុះបណ្តាលចំនួន៧ វគ្គដល់បណ្តាប្រទេសអាស៊ាន៕