ព្រះវិហារ៖ ក្នុងរយៈពេលមួយសប្តាហ៍ចាប់ពីថ្ងៃទី១៤-២០ ខែមីនា ឆ្នាំ២០២២ មន្ទីរសាធារណការ និងដឹកជញ្ជូនខេត្តព្រះវិហារបានត្រួតពិនិត្យយានយន្តចំនួន២៣៤គ្រឿង។ ក្នុងអំឡុងពេលត្រួតពិនិត្យ មន្ត្រីសាធារណការបានរកឃើញរថយន្តចំនួន៥៩គ្រឿងដែលបានកែច្នៃខុសបច្ចេកទេស។ នេះបើតាមការផ្សាយព័ត៌មានរបស់មន្ទីរសាធារណការ និងដឹកជញ្ជូនខេត្តព្រះវិហារ។ ក្នុងចំណោមរថយន្តដែលត្រូវបានមន្ត្រីសាធារណការខេត្តព្រះវិហារត្រួតពិនិត្យនោះ គឺមានតែ១៧៩គ្រឿងប៉ុណ្ណោះដែលមានលិខិតបញ្ជាក់ត្រឹមត្រូវ និងមិនដឹកទំនិញខុសបច្ចេកទេស។ ចំណែករថយន្តចំនួន៥៩គ្រឿងទៀត ដោយរថយន្តចំនួន២៧គ្រឿង គ្មានឯកសារបញ្ជាក់, រថយន្តចំនួន៦គ្រឿងគ្មានឯកសារ បណ្ណបើកបរ,​ផ្លាកលេខក្លែងក្លាយមានចំនួន០៦គ្រឿង,​ ដោះរានតខាងក្រោយចំនួន០៥គ្រឿង, កាត់ទ្រុងចំនួន៣គ្រឿង និងបណ្ណបើកបរខុសប្រភេទយានចំនួន០៨នាក់។​ រថយន្តទាំងនោះ ត្រូវបានមន្ត្រីសាធារណការខេត្តព្រះវិហារត្រួតពិនិត្យនៅត្រង់កំណាត់ផ្លូវជាតិលេខ៦២​ត្រង់ចំណុចគីឡូម៉ែត្រ ឬផ្លូវជាតិលេខ​ ៣៦+២០០​ ស្ថិតក្នុងភូមិជីអោក​ ឃុំរមណីយ​ស្រុករវៀង​ ខេត្តព្រះវិហារ។ ​ មន្ទីរសាធារណការខេត្តព្រះវិហារបានអំពាវនាវដល់ម្ចាស់រថយន្តទាំងឡាយមិនត្រូវកែច្នៃយានយន្តខុសលក្ខណៈបច្ចេកទេសដោយតទ្រុង​តរានខាងក្រោយ​ ផ្ទុកទំនិញលេីសទម្ងន់​ និងដឹកសំពីងសំពោង​ជាដាច់ខាត ពីព្រោះវាអាចបង្កឲ្យមានគ្រោះថ្នាក់ចរាចរណ៍ជាយថាហេតុណាមួយកើតឡើង។ សូមបញ្ជាក់ថា ចាប់តាំងពីរាជរដ្ឋាភិបាលកម្ពុជាបានលើកលែងរថយន្តដែលល្មើសទម្ងន់កំណត់ឃាត់ទុក១ឆ្នាំចំនួន២២៩គ្រឿងកាលពីខែកញ្ញា ឆ្នាំ២០២១កន្លងមក បច្ចុប្បន្ននេះក្រសួងសាធារណការ និងដឹកជញ្ជូនបានត្រួតពិនិត្យ និងឃាត់ទុករថយន្តដែលល្មើសទម្ងន់កំណត់លើសពី២០ភាគរយបានជាង១០០គ្រឿងទុករយៈពេល១ឆ្នាំ៕