សិក្ខាសាលាស្ដីពីការផ្សព្វផ្សាយសៀវភៅគម្រោងកម្មវិធីវិនិយោគសាធារណៈ (ក.វ.ស) ៣ ឆ្នាំរំកិល២០២២ -២០២៤ និងការបណ្ដុះបណ្ដាលកម្មវិធីវិនិយោគសាធារណៈ( ក. វ. ស) ៣ ឆ្នាំរំកិល២០២៣-២០២៥ ប្រព្រឹត្តិទៅក្រោមអធិបតីភាពលោកជំទាវ ម៉ម រមនា តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ចូន ថ្ងៃព្រហស្បតិ៍ ៨កើត ខែផល្គុន ឆ្នាំឆ្លូវ ត្រីស័ក ព.ស ២៥៦៥ ត្រូវនិងថ្ងៃទី១០ ខែមីនា ឆ្នាំ២០២២ នៅទីស្ដីការក្រសួង លោកជំទាវរដ្ឋលេខាធិការ ម៉ម រមនា តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ចូន បានអញ្ជើញជាអធិបតីក្នុងកម្មវិធីបើកសិក្ខាសាលាស្ដីពីការផ្សព្វផ្សាយសៀវភៅគម្រោងកម្មវិធីវិនិយោគសាធារណៈ (ក.វ.ស)៣ឆ្នាំរំកិល២០២២-២០២៤ និងការបណ្ដុះបណ្ដាលកម្មវិធីវិនិយោគសាធារណៈ(ក. វ. ស) ៣ ឆ្នាំរំកិល២០២៣-២០២៥ ដោយមានការអញ្ជើញពីថ្នាក់ដឹកនាំក្រសួងទទួលបន្ទុក តំណាងក្រសួងផែនការ វិស័យឯកជន និងសិក្ខាកាមដែលអញ្ជើញមកពីមន្ទីរសាធារណការ និងដឹកជញ្ជូនរាជធានី-ខេត្តប្រមាណ៦០រូបផងដែរ។ ថ្លែងក្នុងសុន្ទរកថាបើកនាឱកាសនោះ លោកជំទាវរដ្ឋលេខាធិការ បានសម្តែងនូវការស្វាគមន៍យ៉ាងកក់ក្តៅចំពោះអង្គសិក្ខាកាមដែលបានចំណាយពេលវេលាដ៏មានតម្លៃចូលរួមក្នុងសិក្ខាសាលាផ្សព្វផ្សាយ សៀវភៅគម្រោងកម្មវិធីវិនិយោគសាធារណៈ (ក.វ.ស.) ៣ឆ្នាំរំកិល ២០២២-២០២៤ និងការបណ្តុះបណ្តាលដល់មន្ត្រីបង្គោលដើម្បីរៀបចំធាតុចូលនៃការងារកម្មវិធីវិនិយោគសាធារណៈ (ក.វ.ស.) ៣ឆ្នាំរំកិល ២០២៣-២០២៥ របស់ក្រសួងសាធារណការ និងដឹកជញ្ជូន។ ទន្ទឹមជាមួយគ្នានោះដែរ លោកជំទាវរដ្ឋលេខាធិការបានបញ្ជាក់ថា៖ ដំណើរនៃការរៀបចំកម្មវិធីវិនិយោគ សាធារណៈ(ក.វ.ស)៣ឆ្នាំរំកិល២០២២-២០២៤ និងការបណ្ដុះបណ្ដាលកម្មវិធីវិនិយោគសាធារណៈ(ក.វ.ស)៣ឆ្នាំរំកិល២០២៣-២០២៥នេះ គឺជាការបន្តអនុវត្តសេចក្ដីសម្រេចរបស់រាជរដ្ឋាភិបាលកម្ពុជាស្ដីពីការរៀបចំសុខដុមនីយកម្មការងារផែនការចំណាយវិនិយោគសាធារណៈ និងហិរញ្ញប្បទានសហប្រតិបត្តិការ ដែលដឹកនាំដោយស្ថាប័នកណ្ដាលចំនួនបួនរួមមាន៖ ក្រសួងផែនការ ក្រសួងសេដ្ឋកិច្ច និងហិរញ្ញវត្ថុ ឧត្តមក្រុមបឹ្រក្សាសេដ្ឋកិច្ចជាតិ និងគណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមបឹ្រក្សាអភិវឌ្ឍន៍កម្ពុជា។ ការងារនេះ គឺជាគោលដៅសំខាន់នៃកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ ដែលជាកំណែទម្រង់ស៊ីជម្រៅរបស់រាជរដ្ឋាភិបាលកម្ពុជា។ ឆ្លៀតក្នុងឱកាសនោះដែរ លោកជំទាវរដ្ឋលេខាធិការស្នើឱ្យតំណាងអង្គភាពពាក់ព័ន្ធក្រោមឱវាទក្រសួង ទាំងអស់ពិនិត្យគម្រោងរបស់ខ្លួនឱ្យបានច្បាស់លាស់ ក្នុងករណីមានភាពមិនច្បាស់លាស់ ឬក្នុងករណី មានការកែប្រែ សូមស្នើឱ្យមន្ដ្រីបច្ចេកទេស (មន្រ្តីជាជនបង្គោល) ទំនាក់ទំនងជាមួយមន្រ្តីបច្ចេកទេសនាយកដ្ឋានផែនការ នៃអគ្គនាយកដ្ឋានផែនការ និងគោលនយោបាយ ក្រោយពីការបញ្ចប់សិក្ខាសាលា នេះ ដើម្បីនាយកដ្ឋានផែនការមានលទ្ធភាពបញ្ចប់ការងារ ក.វ.ស.៣ឆ្នាំរំកិល ២០២៣-២០២៥ និងផ្ញើជូនទៅក្រសួងផែនការ តាមកាលបរិច្ឆេទកំណត់នៅថ្ងៃទី១១ ខែមីនា ឆ្នាំ ២០២២៕