AKP ភ្នំពេញ ថ្ងៃទី២៤ ខែកុម្ភៈ ឆ្នាំ២០២២-- ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានអនុញ្ញាតឱ្យលោកជំទាវ Lay Cheng ឯកអគ្គរដ្ឋទូតសិង្ហបុរីប្រចាំព្រះរាជាណាចក្រកម្ពុជា ដោយមានការអមដំណើរពីគណៈប្រតិភូ Infrastructure Asia (IA) ដឹកនាំដោយលោក Lavan Thiru នាយកប្រតិបត្តិ IA រួមជាមួយនឹងលេខាទីពីរស្ថានទូតផងដែរ ចូលជួបសម្តែងការគួរសម និងពិភាក្សាការងារ កាលពីថ្ងៃ៧រោច ខែមាឃ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃពុធ ទី២៣ ខែកុម្ភៈ ឆ្នាំ២០២២ នៅទីស្តីការក្រសួង។ នៅក្នុងឱកាសនោះ លោក Lavan Thiru នាយកប្រតិបត្តិ Infrastructure Asia (IA) បាន មានប្រសាសន៍ថា ក្រុមហ៊ុន YCH និង Price Waterhouse Cooper (PwC) កំពុងធ្វើការសិក្សាសមិទ្ធិលទ្ធភាពនៃគម្រោងអភិវឌ្ឍន៍មជ្ឈមណ្ឌលភ័ស្តុភារកម្មភ្នំពេញ (PPLC)។ កាលពីសប្តាហ៍កន្លងទៅ ក្រុមហ៊ុនទាំងពីរបានប្រមូលទិន្នន័យដើម្បីធ្វើការវិភាគ និងបានចុះទៅពិនិត្យទីតាំងទាំង ៣កន្លែងផងដែរ ដោយបានគូសបញ្ជាក់បន្ថែមទៀតថា ជារួមការសិក្សាសមិទ្ធិលទ្ធភាពនៃគម្រោងអភិវឌ្ឍន៍ មជ្ឈមណ្ឌលភ័ស្តុភារកម្មភ្នំពេញ (PPLC) សម្រេចបានប្រមាណ៥០ភាគរយហើយ គ្រោងនឹងបញ្ចប់នៅពាក់កណ្តាលខែមេសា ឆ្នាំ២០២២ខាងមុខនេះ ដើម្បីដាក់ជូនក្រសួងសាធារណការនិងដឹកជញ្ជូន និងក្រសួងសេដ្ឋកិច្ចនិងហិរញ្ញវត្ថុ ពិនិត្យនិងសម្រេច។ ជាមួយគ្នានេះដែរ ឯកឧត្តមទេសរដ្ឋមន្ត្រី បានសម្តែងការពេញចិត្តចំពោះវឌ្ឍនភាព នៃការសិក្សាសមិទ្ធិលទ្ធភាពគម្រោងអភិវឌ្ឍន៍មជ្ឈមណ្ឌលភ័ស្តុភារកម្មភ្នំពេញ និងរង់ចាំមើលលទ្ធផលនៃការសិក្សានេះ នៅក្នុងខែមេសា ឆ្នាំ២០២២ ដើម្បីឈានទៅបើកការដ្ឋានសាងសង់មជ្ឈមណ្ឌលនេះ តាមផែនការដែលបានគ្រោងទុក នៅក្នុងខែវិច្ឆិកា ឆ្នាំ២០២២។ ទន្ទឹមនឹងនេះ ឯកឧត្តមទេសរដ្ឋមន្ត្រី បានស្នើឱ្យក្រុមហ៊ុនពិនិត្យលទ្ធភាពក្នុងការចូលរួម ក្នុងភាពជាដៃគូជាមួយក្រសួង ដើម្បីរៀបចំដាក់ឱ្យដំណើរការគម្រោងប្រើប្រាស់យានយន្តដើរដោយថាមពល អគ្គិសនី ផែនការមេនៃគម្រោងប្រព្រឹត្តិកម្មចម្រោះទឹកកខ្វក់ ក៏ដូចជាគម្រោងអភិវឌ្ឍន៍ជាច្រើនទៀត ដើម្បីចូលរួមចំណែកក្នុងការអភិវឌ្ឍវិស័យសាធារណការ និងដឹកជញ្ជូនរបស់កម្ពុជាឱ្យកាន់តែមានការរីកចម្រើនថែមទៀត ។ ឯកឧត្តមក៏បានគូសបញ្ជាក់អំពី កិច្ចសហការរវាងក្រសួងជាមួយនឹងអង្គការកម្មវិធីអភិវឌ្ឍន៍សហប្រជាជាតិ (UNDP) ដើម្បីដំឡើងស្ថានីយសាកថ្ម EVs និងការបង្កើត Show Room សម្រាប់រថយន្ត EVs នៅក្នុងខែមីនា ឆ្នាំ២០២២ និងការរៀបចំសេចក្តីព្រាងគោលនយោបាយ ដឹកជញ្ជូនផ្លូវគោកពេញលេញមួយក្នុងការជំរុញការប្រើប្រាស់រថយន្ត ដើរដោយថាមពលអគ្គិសនី (EV) ដើម្បីចូលរួមចំណែកកាត់បន្ថយការបំភាយឧស្ម័នកាបូន។ សូមបញ្ជាក់ថា ជំនួបពិភាក្សាការងារនេះ មានគោលបំណងសំខាន់ពីរគឺ៖ (១) ពិភាក្សាអំពីកិច្ចសហប្រតិបត្តិការរវាង IA និងក្រសួងសាធារណការនិងដឹកជញ្ជូន ។ (២) រាយការណ៍អំពីវឌ្ឍនភាពនៃការសិក្សាសមិទ្ធិលទ្ធភាព គម្រោងអភិវឌ្ឍន៍មជ្ឈមណ្ឌលភ័ស្តុភារកម្មភ្នំពេញ(PPLC) ជូនឯកឧត្ដមទេសរដ្ឋមន្ត្រី និងស្នើសុំអនុសាសន៍ណែនាំបន្ថែម សំដៅឈានទៅអនុវត្តន៍គម្រោងនេះ ឱ្យបានឆាប់តាមដែលអាចធ្វើទៅបាន៕ ដោយ ទេស ច័ន្ទសុធារី (ប្រភព៖ ក្រសួងសាធារណការ និងដឹកជញ្ជូន) សម្រួលផ្សាយដោយ៖ ធូ កុសល