រតនគិរី៖ មន្ត្រីមន្ទីរសាធារណការ និងអាជ្ញាធរស្រុកកូនមុំ បានចុះណែនាំឲ្យម្ចាស់ដីធ្វើរបងរំលោភលើចិញ្ចើមផ្លូវជាតិ ឲ្យរុះរើចេញដោយស្ម័គ្រចិត្ត ក្នុងករណីចចេសរឹងរូសនឹងត្រូវចាត់វិធានការតាមច្បាប់។ លោក ឃឹម រមនី អនុប្រធានមន្ទីរសាធារណការខេត្តរតនគិរី លោក ម៉ែ វាសនា អភិបាលរងស្រុកកូនមុំ លោក ថោ ប៊ុនថេត ប្រធានការិល័យភូមិបាលស្រុក និងលោកមេឃុំតាអង កាលពីរសៀលថ្ងៃទី១៥ ខែកុម្ភៈឆ្នាំ២០២២ បានចុះណែនាំម្ចាស់ដីមានឈ្មោះ ឃុន សុវណ្ណរា ម្ចាស់ការ៉ាស់សាំង PTT នៅក្រុងបានលុងដែលបានធ្វើរបងសំណង់រឹងរំលោភលើចិញ្ចើមផ្លូវជាតិលេខ៧៦ ប្រវែងជិត២០០ម៉ែត្រត្រង់ចំណុចក្បែរបន្ទាយទាហាន ស្ថិតក្នុងភូមិតាអងកាតែ ឃុំតាអងស្រុកកូនមុំ ខេត្តរតនគិរី។ លោក ឃឹម រមនី ថ្លែងប្រាប់នៅពេលលោកចុះមើលកន្លែងធ្វើរបងសំណង់រឹងថា ម្ចាស់សំណង់ខាងលើបានសង់រំលោភចំណីផ្លូវជាតិ(ខុសច្បាប់) គឺខាងជំនាញឲ្យម្ចាស់ដីវាយរបងចោលដោយស្ម័គ្រចិត្ត។ លោកនិយាយថា«ម្ចាស់ដីហ្នឹងគាត់កាយដីខូចប្រព័ន្ធលូខុសបច្ចេកទេស គ្មានការសុំការអនុញ្ញាតពីខាងមន្ទីរពោល គឺសំណង់ដែលអាចធ្វើបានត្រូវមានចម្ងាយប្រវែង២៥ម៉ែត្រពីទ្រូងផ្លូវជាតិ»។ លោក ឃឹម រមនី បានបញ្ជាក់ឲ្យដឹងថា វិធានការលើកទី១គឺឲ្យម្ចាស់ដីធ្វើរបងសំណង់រឹងសាងសង់លើចិញ្ចើមផ្លូវជាតិរុះរើដោយស្ម័គ្រចិត្ត ប៉ុន្ដែបើនៅតែចចេសរឹងរូសមិនអនុវត្តតាម គឺមានតែវិធានការផ្លូវច្បាប់។ ជាមួយគ្នានេះ លោក ថោ ប៊ុនថេត ប្រធានការិយាល័យភូមិបាលស្រុកកូនមុំប្រាប់ឲ្យដឹងដែរថាម្ចាស់សំណង់ខាងលើនេះបានសុំច្បាប់ ប៉ុន្ដែធ្វើខុសកន្លែង គឺធ្វើលើអូរធម្មជាតិតែម្តងដែលច្បាប់អនុញ្ញាតឲ្យសាងសង់មានចម្ងាយពីមាត់អូរ ៧,៥ម៉ែត្រគឺសង់ខុសច្បាប់។ ​ទន្ទឹមនឹងនេះលោកបាននិយាយថា«រឿងវាយសំណង់ចោលឬមិនវាយនោះ លោកមិនទាន់ដឹងនៅឡើយទេ គ្រាន់តែធ្វើរបាយការណ៍ជូនលោកអភិបាលស្រុកកូនមុំប៉ុណ្ណោះ»។ ទាក់ទិននឹងករណីនេះ ក្រុមការងារ CNC ព្យាយាមទាក់ទងម្ចាស់ដីខាងលើ ដោយមិនបានសម្រេច៕