នៅថ្ងៃចន្ទ ១៣កើត ខែមាឃ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៤ ខែកុម្ភៈ ឆ្នាំ២០២២ វេលា ម៉ោង៨.០០ ដល់ម៉ោង ៣.៣០ នាទីរសៀល វិទ្យាស្ថានតេជោសែនសាធារណការ និងដឹកជញ្ជូន នៃក្រសួងសាធារណការ និងដឹកជញ្ជូន បានរៀបចំការប្រឡងជាផ្លូវការជ្រើសរើសសិស្ស-និស្សិតឱ្យចូលរៀន ជំនាន់ទីពីរ ឆ្នាំសិក្សា២០២១-២០២២ ក្រោមគំនិតផ្តួចផ្តើម និងកិច្ចខិតខំប្រឹងប្រែងរបស់ឯកឧត្តមទេស រដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងគោលបំណងដើម្បីចម្រាញ់សិស្ស -និស្សិតដែលមានសក្តានុពលខ្ពស់យកមកបណ្ដុះបណ្ដាលឱ្យមានចំណេះជំនាញច្បាស់លាស់លើ វិស័យហេដ្ឋារចនាសម្ព័ន្ធផ្លូវថ្នល់ ស្ពាន សំណង់ កំពង់ផែ ផ្លូវដែក និងហេដ្ឋារចនាសម្ព័ន្ធផ្សេងៗទៀត ក៏ដូចជាឱ្យមានចំណេះដឹងទូលំទូលាយ មានអត្តចរិត និងសីលធម៌ល្អ ចរិយាសម្បត្តិថ្លៃថ្នូរ ដើម្បីក្លាយជាអ្នកបន្តវេនប្រកបដោយសក្តានុពល និងការទទួលខុសត្រូវខ្ពស់លើវិស័យហេដ្ឋារចនាសម្ព័ន្ធនៅកម្ពុជា។ កាលពីថ្ងៃទី១៤ ខែកុម្ភ: ឆ្នាំ២០២២ វិទ្យាស្ថានតេជោសែន សាធារណការ​ និងដឹកជញ្ជូន បានធ្វើការប្រឡងជ្រើសរើសនិស្សិតជំនាន់ទី២ ដែលមានសេចក្តីសង្ខេបដូចខាងក្រោម៖ ក. ទិដ្ឋភាពទូទៅ៖ បេក្ខជនដែលបានដាក់ពាក្យប្រឡងសរុបមានចំនួន៤៥៩នាក់ ក្នុងនោះ៖ បេក្ខភាពជានារី ១៧៧នាក់ ស្មើ ៣៩%។ បេក្ខជនដែលមាននិទ្ទេសAចំនួន៤១នាក់ និងបេក្ខជននិទ្ទេសBចំនួន៩១នាក់។ បើA+B = ស្មើ ២៩% នៃបេក្ខជនទាំងអស់។ បេក្ខជនដែលបានចូលប្រឡងជាក់ស្តែងនៅថ្ងៃទី១៤ ខែកុម្ភៈ មានចំនួន៤១៩ ស្មើ៩១,២៩% នៃបេក្ខជនដែលបានដាក់ពាក្យប្រឡងសរុប។ ខ. ការគ្រប់គ្រងវិញ្ញាសា៖ វិញ្ញាសាត្រូវបានគ្រប់គ្រងប្រកបដោយតម្លាភាពដើម្បីធានាសុក្រឹតភាពនៃវិញ្ញាសាក្នុងការជ្រើសរើសបេក្ខជនដែលសក្តានុពលខ្ពស់ឱ្យចូលរៀនៅវិទ្យាស្ថានដូចខាងក្រោម៖ -យប់ថ្ងៃអាទិត្យ ប្រគល់វិញ្ញសាជាសំណួរឱ្យទៅIT (តែម្នាក់គត់) ដែលមានសិទ្ធិUpload ចូលប្រព័ន្ធ -ពេលបេក្ខជនកំពុងប្រឡងលើវិញ្ញាសា ទើបប្រគល់វិញ្ញាសាមុខវិជ្ជាបន្ទាប់ឱ្យទៅIT ដើម្បីUpload ចូលប្រព័ន្ធ -ពេលបេក្ខជនប្រឡងចប់វិញ្ញាសានីមួយៗ ទើបប្រគល់ចម្លើយឱ្យITដើម្បីUpload ចូលប្រព័ន្ធ និងបញ្ចេញលទ្ធផល -គណៈកម្មការប្រឡងផ្ទៀងផ្ទាត់លើលទ្ធផលប្រឡងលើកទី១ភ្លាមៗក្រោយប្រឡងចប់ និងផ្ទៀងផ្ទាត់លើក ចុងក្រោយកាលពីម៉ោង ៨.៣០ ព្រឹកថ្ងៃទី១៥ ខែកុម្ភៈ ឆ្នាំ២០២២។ -សំណួរសរុបទាំងអស់មានចំនួន៣៧៣សំណួរ សំណួរចេញចំនួន៧៥សំណួរ ស្មើ២០% នៃសំណួរ សរុប។ ការកំណត់ទម្ងន់នៃមុខវិជ្ជានីមួយៗ ដោយគិតជាភាគរយស្រួល៣៥% មធ្យម ៣៥% និងលំបាក ៣០%។ ការប្រគល់វិញ្ញាសា៖ យប់មិញប្រគល់វិញ្ញាសាសំណួរ ចប់វិញ្ញាសានីមួយៗ ប្រគល់ចម្លើយ គ. លទ្ធផលនៃការប្រឡង៖ ដោយទទួលបានគោលការណ៍បន្ថែម ជ្រើសរើសនិស្សិតចំនួន២៥០នាក់ ចូលរៀនជំនាន់ទី២ ឆ្នាំសិក្សា២០២១-២០២២ វិទ្យាស្ថានបានសម្រេចចេញលទ្ធផលសង្ខេបដូចតទៅ៖ ១) ឯកទេសសំណង់សាធារណការ៖ ជំនាញផ្លូវថ្នល់ ស្ពាន ផ្លូវល្បឿន លឿន ផ្លូវដែក និងសំណង់កំពង់ផែចំនួន ៧៥ នាក់ ២) ជំនាញប្រព័ន្ធចម្រោះទឹក កខ្វក់ចំនួន២៥នាក់ ៣) ឯកទេសដឹកជញ្ជូន និងភស្តុភារកម្ម៖ ជំនាញសេដ្ឋកិច្ច និងដឹកជញ្ជូនផ្លូវគោកចំនួន៧៦នាក់ ៤) ជំនាញគ្រប់គ្រងភស្តុភារកម្ម និងខ្សែច្រវាក់ផ្គត់ផ្គង់ចំនួន៤១នាក់ ៥) ឯកទេសនាវាចរណ៍៖ ជំនាញបើកបរនាវាចរណ៍ ១៧នាក់ និង៦) ជំនាញម៉ាស៊ីនាវាចំនួន៨នាក់ បេក្ខជនដែល បានប្រឡងជាប់ត្រូវប្រកាសលទ្ធផលមានចំនួនសរុប ៖ ២៤២នាក់ ក្នុងនោះស្រីចំនួន១០៧នាក់ ស្មើ ៤៤,២% នៃបេក្ខជនដែលបានប្រឡងជាប់ទាំងអស់។ ឃ. ផ្សេងៗ៖ សិស្ស-និស្សិតដែលប្រឡងជាប់ជាស្ថាពរ តម្រូវឱ្យមកចុះឈ្មោះចូលរៀន ចាប់ពីថ្ងៃជូន ដំណឹងនេះរហូតដល់ថ្ងៃទី២៨ ខែកុម្ភៈ ឆ្នាំ២០២២។ សិស្ស-និស្សិតដែលប្រឡងជាប់បម្រុង តម្រូវឱ្យមកចុះ ឈ្មោះចូលរៀនចាប់ពីថ្ងៃទី២៨ ខែកុម្ភៈ ដល់ថ្ងៃទី០៤ ខែមីនា ឆ្នាំ២០២២ វេលាម៉ោង៥ល្ងាច។ បវេសន កាលចូលរៀនសម្រាប់សិស្ស-និស្សិតជំនាន់ទី២ នឹងប្រព្រឹត្តទៅនៅថ្ងៃទី០៩ ខែមីនា ឆ្នាំ២០២២តទៅ៕