នាព្រឹកថ្ងៃអង្គារ ១៤កើត ខែមាឃ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៥ ខែកុម្ភៈ ឆ្នាំ២០២២ ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ ដឹកនាំលោក​អភិបាលក្រុងព្រះសីហនុ និងប្រធានមន្ទីរ អង្គភាពពាក់ព័ន្ធចុះពិនិត្យសកម្មភាពស្តារអូរ ប្រឡាយ និងស្ពានក្នុងភូមិសាស្ត្រក្រុងព្រះសីហនុ ដើម្បីដោះស្រាយការជន់លិចដោយជំនន់ ទឹកភ្លៀងនៅរដូវវស្សា។ ​សកម្មភាពចុះពិនិត្យស្តារប្រព័ន្ធអូរ ប្រឡាយ និងស្ពាន ក្នុងភូមិសាស្ត្រក្រុងព្រះសីហនុ ចាប់ពីប្រឡាយអូរពីរមុខសាលាក្រុងព្រះសីហនុ បន្តទៅស្ពានអូរ១ បន្តទៅស្ពានL.V រួចបន្តទៅ ស្ពានអង្គការម្លប់តាប៉ាង និងបន្តរហូតដល់ប្រឡាយ ស្ពាន អូរស្តេចមឹកស្ថិតនៅក្នុងសង្កាត់ លេខ៤ ក្រុងព្រះសីហនុ។ ​ឯកឧត្តម គួច ចំរើន អភិបាលខេត្តព្រះសីហនុ បានបញ្ជាក់ថា ព្រឹកនេះយើងចុះពិនិត្យ មើលបញ្ហាពាក់ព័ន្ធការស្តារអូរ ប្រឡាយ និងស្ពានក្នុងក្រុងរបស់យើងដែលសេសសល់ ៥កន្លែងនៅក្នុងក្រុងព្រះសីហនុ ដែលជាឧបសគ្គចំនួន៥កន្លែង នៅរដូវប្រាំងនេះ យើងនឹង សម្រុកបើកការដ្ឋាន ដើម្បីដោះស្រាយចំណុចប្រឈមទាំង៥ មានដូចជាស្ពានអូរ១ ហើយនៅសល់ពីរកន្លែងទៀត នៅអាទិត្យក្រោយនេះ មន្ទីរសាធារណការ និងដឹកជញ្ជូនខេត្ត និងដាក់គ្រឿងចក្រចូលការដ្ឋាន ដើម្បីជំរុញការដោះស្រាយបញ្ហាប្រឈមដែលនៅសេស សល់ ហើយទីតាំងដែលមានភាពស្មុគស្មាញជាងគេបំផុតក្នុងក្រុងព្រះសីហនុរបស់យើងមាន ដូចជាស្ពានL.V ស្ពានអង្គការម្លប់តាប៉ាង និងស្ពានអូរស្តេចមឹក ប៉ុន្តែចំណុចទាំង៣នេះ យើងបានធ្វើការដោះស្រាយចប់សព្វគ្រប់ហើយ ដោយយើងបានប្រើប្រាស់កញ្ចប់ថវិកា ឆ្នាំ២០២១។​ ឯកឧត្តមអភិបាលខេត្តបានបញ្ជាក់ទៀតថា កន្លែងដែលប្រឈមបំផុតយើង បាន កសាងជាស្ពាន ជាផ្លូវមានសណ្តាប់ធ្នាប់ និងមានសោភណភាពឡើងវិញ យើងនៅតែធ្វើ ការកែលម្អឡើងវិញបន្ថែមទៀត។ ទាក់ទងនឹងបញ្ហាឧបសគ្គដែលយើងតែងតែជួបនៅចំណុច ទាំង៣នេះ គឺការកកស្ទះទឹកនៅពេលមានភ្លៀងធ្លាក់ខ្លាំង ហើយយើងបានធ្វើការដោះ ស្រាយ រួចរាល់ហើយ ចំពោះកាដោះស្រាយនេះ វាមិនធានាថា មិនលិចនោះទេ តែយើងបានខិតខំ ប្រឹងប្រែងឱ្យអស់សមត្ថភាពទៅតាមដីធ្លី ដែលនៅសេសសល់ប៉ុណ្ណោះ បើដីសល់ទំហំប៉ុន្មាន យើងបើកជាស្តារអូរ ប្រឡាយ ស្ពាន តាមទំហំនិយាមការ ហើយអ្វីដែលជាគុណប្រយោជន៍ សាធារណៈ យើងនឹងបន្តខិតខំបន្តពង្រីកនៅតាមតំបន់ឱ្យអស់លទ្ធភាព ដើម្បីសោភណភាព បរិស្ថានក្រុងព្រះសីហនុរបស់យើង ដូច្នេះសូម បងប្អូនប្រជាពលរដ្ឋត្រូវចូលរួមសហការ ជាមួយអាជ្ញាធរ កុំបោះចោលសំរាម ឬកាកសំណល់ចូលក្នុងអូរ ប្រឡាយ ជាហេតុបង្កឱ្យរាំង ស្ទះចរន្តទឹកហូរ បង្កជាជំនន់ទឹកភ្លៀងនៅរដូវវស្សា៕