ថ្ងៃនេះជាថ្ងៃខួប២ឆ្នាំហើយ ដែលសម្តេចតេជោនាយករដ្ឋមន្ត្រី បានធ្វើការសម្រេចចិត្តដ៏ត្រឹមត្រូវក្នុងការ អនុញ្ញាតឱ្យនាវាទេសចរណ៍អាមេរិកWesterdamដឹកអ្នកដំណើរសរុបជាង២០០០នាក់ ចូលចតនៅកំពង់ផែក្រុងព្រះសីហនុ គិតត្រឹមថ្ងៃទី១៤ ខែកុម្ភៈ ឆ្នាំ២០២២នេះមានរយៈពេល២ឆ្នាំហើយ ដែលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេចចិត្តដ៏ភ្ញាក់ផ្អើល និងកក្រើកពិភពលោក ដោយអនុញ្ញាតឱ្យនាវាទេសចរណ៍អាមេរិកWesterdamចូលចតនៅកំពង់ផែក្រុងព្រះសីហនុ ខេត្តព្រះសីហនុ។ នាវានោះដឹកអ្នកដំណើរសរុបជាង ២០០០នាក់ បានចាកចេញពីទីក្រុងហុងកុង ប្រទេសចិន ហើយ ត្រូវបានអាជ្ញាធរ កោះតៃវ៉ាន់ ហ្វីលីពីន ជប៉ុន កូរ៉េខាងត្បូង កោះហ្គាំ (អាមេរិក) និងប្រទេសថៃ បដិសេធ មិនឱ្យចូលចតឡើយ ដោយសារតែព្រួយបារម្ភថាក្នុងចំណោមមនុស្សរាប់ពាន់នាក់នៅលើនាវានោះ អាច មានផ្ទុកមេរោគកូវីដ-១៩។ សម្តេចតេជោនាយករដ្ឋមន្ត្រីមិនត្រឹមតែអនុញ្ញាតឱ្យនាវាWesterdamចូលចតប៉ុណ្ណោះទេ ប៉ុន្តែសម្តេចថែមទាំងបានអញ្ជើញធ្វើដំណើរអមដោយផ្កាកូលាបទៅទទួលស្វាគមន៍វត្តមានអ្នកដំណើរដោយផ្ទាល់ថែមទៀតផងនៅថ្ងៃទី១៤ ខែកុម្ភៈ ដែលត្រូវនឹង «ថ្ងៃបុណ្យនៃក្តីស្រឡាញ់» ដែលជាវប្បធម៌របស់មនុស្សជាតិតំបន់អឺរ៉ុបផងដែរ។ កាលពី២ឆ្នាំមុន សម្តេចតេជោនាយករដ្ឋមន្ត្រី បានធ្វើឱ្យពិភពលោករំជួលចិត្ត រំជួល បេះដូងអ្នកដំណើរលើនាវារហូតអ្នកខ្លះស្រក់ទឹកភ្នែកថែមទៀតផង។ ពួកគេបានកោតសរសើរមិនដាច់ពី មាត់ចំពោះកាយវិការរបស់សម្តេចតេជោនាយករដ្ឋមន្ត្រី ក៏ដូចជាពលរដ្ឋកម្ពុជាទាំងមូល។ មិនត្រឹមតែលើ នាវាប៉ុណ្ណោះទេ មនុស្សជាតិលើពិភពលោកជាច្រើន សុទ្ធតែបានទទួលនូវទង្វើប្រកបដោយមនោស ញ្ចេតនាដ៏ជ្រាលជ្រៅនេះ ហើយបានស្ញប់ស្ញែង និងកោតសរសើរមិនដាច់នោះឡើយ។ គួររំលឹកផងដែរថា៖ នៅក្នុងព្រឹត្តិការណ៍ដ៏ភ្ញាក់ផ្អើលនោះ បន្ទាប់ពីទទួលបានការអនុញ្ញាតដ៏ខ្ពង់ខ្ពស់ពីសម្តេចតេជោនាយករដ្ឋមន្ត្រី ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានទំនាក់ទំនង និងសម្របសម្រួលឱ្យក្រុមនាវិកនាវាWesterdamបានចូលចតនៅកំពង់ផែក្រុងព្រះសីហនុប្រកបដោយសុវត្ថិភាព និងបានអញ្ជើញទៅទទួលស្វាគមន៍អ្នកដំណើរចំនួន២៣៣រូបចុងក្រោយចុះពីលើនាវាWesterdam ដើម្បីធ្វើដំណើរទៅកាន់ប្រទេសខ្លួនវិញតាមជើងហោះហើរពីទីក្រុងភ្នំពេញផងដែរ។ ការចាកចេញពីនាវារបស់អ្នកដំណើរចំរុះជាតិសាសន៍នាពេលនោះ ធ្វើឡើងក្នុងគោលបំណងធ្វើដំណើរទៅកាន់ប្រទេសរបស់ខ្លួនតាមរថយន្តក្រុងចំនួន១០គ្រឿង ចេញពីកំពង់ផែស្វយ័តក្រុងព្រះសីហនុ ទៅកាន់ រាជធានីភ្នំពេញ រួចទើបបន្តដំណើរ តាមជើងហោះហើរពីរាជធានីភ្នំពេញ ទៅកាន់ប្រទេសកំណើតរៀងៗ ខ្លួនវិញ។ នៅក្នុងការទទួលបដិសណ្ឋារកិច្ច និងជូនដំណើរនោះ ឯកឧត្ដមទេសរដ្ឋមន្ត្រី បានផ្តល់ជូនក្រមាធ្វើពីសូត្ររបស់កម្ពុជាជាកាដូអនុស្សាវរីយ៍ជូនដល់ភ្ញៀវទេសចរណ៍ទាំង២៣៣រូបនោះផងដែរ។ គួរកត់សម្គាល់ថា៖ ការអញ្ជើញទទួលស្វាគមន៍នាវាទេសចរណ៍Westerdam ដែលត្រូវបានបដិសេធ ការចូលចតពីបណ្ដាប្រទេសមួយចំនួនដោយសារភ័យខ្លាចករណីជំងឺកូវីដ-១៩នេះ ធ្វើឡើងក្នុងគោល បំណងមនុស្សធម៌ ទឹកចិត្តសន្តោសប្រណី មិនរើសអើងពូជសាសន៍ ជួយគ្នាក្នុងគ្រាមានអាសន្ន និងផ្ដល់ក្តីស្រឡាញ់ជំនឿទុកចិត្តភាពកក់ក្តៅដល់អ្នកធ្វើដំណើរលើនាវា ដែលរួមមានមនុស្សចាស់ស្ត្រី និងកូនក្មេង ផងដែរ។ ទាំងនេះជាការស្ដែងចេញឱ្យឃើញនូវកាយវិការសប្បុរសធម៌ ការយកចិត្តទុកដាក់ខ្ពស់ និងជាការសម្រេច ដ៏ត្រឹមត្រូវបំផុតរបស់ថ្នាក់ដឹកនាំកំពូលនៃរាជរដ្ឋាភិបាលកម្ពុជាចំពោះជនរងគ្រោះដែលត្រូវបានបោះបង់ ចោលនៅលើមហាសាគរដ៏ធំល្វឹងល្វើយ៕