បច្ចុប្បន្នប្រព័ន្ធផ្លូវរថភ្លើងនៅក្នុងប្រទេសកម្ពុជា នៅមិនទាន់អភិវឌ្ឍន៍ឲ្យទំនើបនៅឡើយនោះទេ ដោយយើងនៅប្រើប្រាស់ប្រព័ន្ធរថភ្លើងធម្មតាតែប៉ុណ្ណោះ។ ប៉ុន្ដែទោះជាយ៉ាងណានាពេលខាងមុខ កម្ពុជានឹងអាចមានប្រព័ន្ធផ្លូវរថភ្លើងទំនើបជានេះ ខណៈដែលសព្វថ្ងៃរាជរដ្ឋាភិបាលក៏មានគម្រោងអភិវឌ្ឍន៍ផ្លូវដែកនេះឲ្យកាន់តែទំនើបផងដែរ។ ជាស្ដែងនៅថ្ងៃទី១០ ខែកុម្ភៈ ឆ្នាំ២០២២ ក្នុងជំនួបពិភាក្សាការងារជាមួយលោកជំទាវបណ្ឌិត Sarah Taylor ឯកអគ្គរដ្ឋទូត វិសាមញ្ញ និងពេញសមត្ថភាពកាណាដាប្រចាំប្រទេសថៃ ឡាវ និងកម្ពុជា ឯកឧត្ដម ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដីក្រសួងសាធារណការ និងដឹកជញ្ជូន បានធ្វើបច្ចុប្បន្នភាពជូនលោកជំទាវអំពីគម្រោងអភិវឌ្ឍន៍ ប្រព័ន្ធដឹកជញ្ជូនសាធារណៈរបស់កម្ពុជា ក្នុងនោះរួមមាន៖ ប្រព័ន្ធប្រតិបត្តិការរថភ្លើងស្វ័យប្រវត្តិ (AGT) ប្រព័ន្ធរថភ្លើងក្រោមដី (Subway) និងការសិក្សាគម្រោងអភិវឌ្ឍន៍រថភ្លើង Monorail ដើម្បីកាត់បន្ថយការ កកស្ទះចរាចរណ៍នៅក្នុងរាជធានីភ្នំពេញ និងបានស្នើឱ្យកាណាដាជួយពិនិត្យឡើងវិញលើការរៀបចំយុទ្ធ សាស្ត្រអភិវឌ្ឍន៍គម្រោងទាំងនេះ។ សូមជម្រាបផងដែរថា ទាក់ទងនឹងផ្លូវរថភ្លើងនេះ កាលពីពេលកន្លងទៅសម្ដេចតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជាក៏បានជំរុញក្រសួងនិងស្ថាប័នពាក់ព័ន្ធធ្វើការសិក្សាគម្រោងអភិវឌ្ឍន៍ផ្លូវដែកនៅកម្ពុជាដែលមានស្រាប់ សំដៅឱ្យក្លាយទៅជាផ្លូវដែកល្បឿនលឿនតភ្ជាប់ពីរាជធានីភ្នំពេញទៅក្រុងព្រះសីហនុ និងពីរាជ ធានីភ្នំពេញទៅប៉ោយប៉ែត និងបន្ថែមខ្សែផ្លូវដែកថ្មីពីក្រុងប៉ោយប៉ែតទៅខេត្តសៀមរាប និងបន្តឆ្ពោះទៅខេត្តកំពង់ធំ និងរាជធានីភ្នំពេញ និងខ្សែផ្លូវដែកតភ្ជាប់ពីរាជធានីភ្នំពេញទៅក្រុងបាវិត ព្រំដែនប្រទេសវៀតណាម ព្រមទាំងជំរុញដំណើរការស្តារ និងលើកកម្រិតសមត្ថភាពប្រតិបត្តិការដឹកជញ្ជូនតាមផ្លូវដែកឱ្យមានចលនារស់រវើក និង ប្រកប ដោយប្រសិទ្ធភាព៕