[Khmer times] - ផ្លូវទឹកតភ្ជាប់ភ្នំពេញទៅសមុទ្រកំពុងសិក្សា
2022-02-01
Go to the website published Khmer times
រដ្ឋមន្ត្រីក្រសួងសាធារណការ លោក ស៊ុន ចាន់ថុល មានប្រសាសន៍ថា ក្រសួងកំពុងសិក្សាការតភ្ជាប់ផ្លូវទឹកពីភ្នំពេញទៅសមុទ្រក្នុងខេត្តកែប ដើម្បីសម្រួលដល់ការដឹកជញ្ជូនទៅក្រៅប្រទេសដោយមិនឆ្លងកាត់ប្រទេសវៀតណាម។
កាលពីថ្ងៃសៅរ៍ ក្នុងពិធីបិទសន្និបាតបូកសរុបរបាយការណ៍ការងារប្រចាំឆ្នាំរបស់ក្រសួង និងទិសដៅការងារឆ្នាំថ្មី លោក ចាន់ថុល មានប្រសាសន៍ថា គម្រោងសាងសង់ប្រព័ន្ធដឹកជញ្ជូនផ្លូវទឹកថ្មីពីកំពង់ផែស្វយ័តភ្នំពេញទៅ សមុទ្រក្នុងខេត្តកែបបានសិក្សារួចហើយ។
លោកបន្តថា គម្រោងនេះបានបញ្ជូនទៅលោកនាយករដ្ឋមន្ត្រី ហ៊ុន សែន ដើម្បីពិនិត្យ និងអនុម័តរួចហើយ។ លោកមានប្រសាសន៍ថា ទិដ្ឋភាពច្បាប់ក៏ត្រូវបានពិភាក្សាជាមួយក្រសួងធនធានទឹកផងដែរ ទាក់ទងនឹងច្បាប់គ្រប់គ្រងទន្លេហើយមិនឃើញមានបញ្ហាអ្វីនោះទេ។
លោកបន្តថា៖ «យើងចង់ឃើញការអភិវឌ្ឍនៃការដឹកជញ្ជូនតាមផ្លូវទឹក ហើយខេត្តមួយចំនួនដូចជាខេត្តតាកែវនឹងទទួលបានអត្ថប្រយោជន៍ជាច្រើនពីការដឹកជញ្ជូនតាមទឹកពីទន្លេបាសាក់ទៅសមុទ្រកែបផងដែរ»។
លោកបានបន្ថែម « វាមានផលចំណេញច្រើនក្នុងការដឹកជញ្ជូនដែលសន្សំបានចម្ងាយប្រហែល 80 គីឡូម៉ែត្រ បើធៀបនឹងផ្លូវថ្នល់»។
លោកថា ការដឹកជញ្ជូនទំនិញអន្តរជាតិចូល និងចេញពីកម្ពុជាតាមសមុទ្រ តាមរយៈកំពង់ផែស្វយ័តភ្នំពេញ បច្ចុប្បន្នកំពុងដំណើរការឆ្លងកាត់កំពង់ផែក្នុងប្រទេសវៀតណាម ដែលទាមទារការបញ្ចប់នីតិវិធីជាច្រើន និងជាឧបសគ្គសម្រាប់ការដឹកជញ្ជូនតាមផ្លូវទឹកផងដែរ។
លោកបន្តថា ការភ្ជាប់ផ្លូវទឹកពីទន្លេបាសាក់ទៅសមុទ្រនឹងនាំមកនូវផលប្រយោជន៍សេដ្ឋកិច្ចជាច្រើនសម្រាប់ប្រទេសកម្ពុជា ជាពិសេសការតភ្ជាប់ផ្លូវទឹកទៅកាន់ទីផ្សារអន្តរជាតិ។
លោក ចាន់ថុល មានប្រសាសន៍ផងដែរថា « ការតភ្ជាប់នេះ គឺប្រើប្រាស់ផ្លូវទឹកដែលមានស្រាប់ និងជីកផ្លូវទឹកថ្មី ដើម្បីភ្ជាប់ទៅសមុទ្រចម្ងាយប្រហែលប្រាំគីឡូម៉ែត្រ»។
លោកស្រី គីម ម៉ូលីកា អ្នកលក់ទំនិញតាមអនឡាញពីខេត្តកែប មានប្រសាសន៍ថា អ្នកស្រីនឹងសប្បាយចិត្តណាស់ ប្រសិនបើកម្ពុជាមានផ្លូវទឹកថ្មីសម្រាប់ដឹកជញ្ជូនពីកំពង់ផែស្វយ័តភ្នំពេញទៅខេត្តកែប ព្រោះអ្នកស្រីគិតថា វានឹងផ្តល់ផលប្រយោជន៍សម្រាប់ក្រុមហ៊ុន ឬអ្នកវិនិយោគដែលកំពុងដំណើរការពដោយអាជីវកម្មដឹកជញ្ជូនផលិតផលរបស់ពួកគេទៅកាន់អតិថិជន។
លោកស្រីថា « ខ្ញុំគាំទ្រកម្ពុជាយ៉ាងពេញទំហឹងក្នុងការតភ្ជាប់ផ្លូវទឹកថ្មីពីភ្នំពេញទៅខេត្តកែប ព្រោះខ្ញុំជាម្ចាស់អាជីវកម្មមួយរូបផងដែរ។ ខ្ញុំនឹងមានជម្រើសក្នុងការដឹកជញ្ជូនផលិតផលរបស់ខ្ញុំទៅកាន់អតិថិជនយ៉ាងងាយស្រួល »៕
