[Rasmei Kampuchea Daily News] - ការស្ថាបនាកំណាត់ផ្លូវជាតិ លេខ៩៥ ដោយក្រាលកៅស៊ូ ប្រភេទ DBST គ្រោងនឹងបញ្ចប់ ក្នុងខែកុម្ភៈនេះ
ដោយៈ រ៉ាម៉ន / ព្រះវិហារៈ បើទោះបីប្រទេសកម្ពុជា កំពុងស្ថិតក្នុងតំណាក់កាល នៃការបង្ការ ទប់ស្កាត់នឹងជំងឺកូវីដ-១៩ ក៏ពិតមែន ប៉ុន្តែសំរាប់ មន្ទីរសាធារណការ និងដឹកជញ្ជូន ខេត្តព្រះវិហារ នៅតែបន្តការស្ថាបនា ជួសជុលថែទាំផ្លូវ នៅក្នុងខេត្តរបស់ខ្លួន ជាប្រចាំ ដើម្បីកុំអោយខូចខាតធ្ងន់ធ្ងរ ចំណាយលើការជួសជុល ឬស្ថាបនាឡើងវិញច្រើន ហើយក៏ដើម្បីបង្កភាពងាយស្រួល ដល់ប្រជាពលរដ្ឋ ក្នុងការធ្វើដំណើរបានស្រួលផងដែរ។
ជាក់ស្តែង នៅពេលនេះ ក្រុមការងារ នៃមន្ទីរសាធារណការ និងដឹកជញ្ជូន ខេត្តព្រះវិហារ បាននិងកំពុងស្ថាបនា កំណាត់ផ្លូវជាតិលេខ៩៥ ដោយក្រាលកៅស៊ូ ប្រភេទ DBST ប្រវែង ៣.៥០០ ម៉ែត្រ ទទឹង ៧ ម៉ែត្រ ហើយបើគិតត្រឹមថ្ងៃទី២៧ ខែមករា ឆ្នាំ២០២២ នេះ ការដ្ឋាន សម្រេចបាន ៧៥% ហើយៗ គ្រោងនឹងបញ្ចប់ នៅក្នុងខែកុម្ភៈ ខាងមុខនេះ ។
លោក សំ លាងទ្រី ប្រធានមន្ទីរសាធារណការ និងដឹកជញ្ជូន ខេត្តព្រះវិហារ បានអោយ ដឹងថាៈ ការងារស្ថាបនាកំណាត់ផ្លូវជាតិលេខ៩៥ ដោយក្រាលកៅស៊ូ ប្រភេទ DBST ចាប់ពី PK30+200 ដល់ PK33+700 ប្រវែង ៣.៥០០ ម៉ែត្រ ទទឹង ៧ ម៉ែត្រ គិតត្រឹម ថ្ងៃទី២៧ ខែមករា ឆ្នាំ២០២២ សម្រេចបាន ៧៥% ហើយ ។
លោកបញ្ជាក់ថាៈ កំណាត់ផ្លូវមួយខ្សែនេះ គ្រោងនឹងបញ្ចប់ ក្នុងខែកុម្ភ ខាងមុខនេះហើយ។ សូមបងប្អូនប្រជាពលរដ្ឋ ធ្វើដំណើរប្រកបដោយសុខសុវត្ថិភាព និងសូមបន្ដអនុវត្តនូវ វិធានការ ៣កុំ ៣ការពារ របស់រាជរដ្ឋាភិបាល ដើម្បីការពារជំងឺកូវីដ-១៩ទាំងអស់គ្នា៕/V
