[Phnom Penh Post] - ផែនការកសាងហេដ្ឋារចនាសម្ព័ន្ធដាក់ចេញពីឆ្នាំ ២០២០ សម្រេចបាន ៨០%
2022-01-28
Go to the website published Phnom Penh Post
ភ្នំពេញៈ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា ផែនការកសាងហេដ្ឋារចនាសម្ព័ន្ធដែលក្រសួងបានដាក់ចេញក្នុងសន្និបាតឆ្នាំ ២០២០ សម្រាប់អនុវត្តក្នុងឆ្នាំ ២០២១ គឺសម្រេចបាន ៨០ ភាគរយ ខណៈលោកណែនាំឱ្យមន្ត្រីក្រោមឱវាទបន្តរឹតបន្តឹងគុណភាពផ្លូវឱ្យបានហ្មត់ចត់បន្តទៀត នៅក្នុងឆ្នាំ ២០២២ នេះ។
លោកបានថ្លែងបែបនេះ ក្នុងពិធីបើកសន្និបាតបូកសរុបលទ្ធផលការងារឆ្នាំ ២០២១ និងលើកទិសដៅការងារឆ្នាំ ២០២២ ក្រោមប្រធានបទ «ការធ្វើឱ្យប្រសើរឡើងហេដ្ឋារចនាសម្ព័ន្ធដឹកជញ្ជូនដែលធន់នឹងការប្រែប្រួលអាកាសធាតុ ការគ្រប់គ្រងការងារសាងសង់ និងថែទាំផ្លូវស្ពានឱ្យមានគុណភាព ដោយផ្តោតលើការប្រើប្រាស់បច្ចេកវិទ្យាទំនើប» កាលពីថ្ងៃទី ២៧ ខែមករា។
លោក ស៊ុន ចាន់ថុលថ្លែងថា៖ «យើងមិនបានធ្វើឱ្យចប់សព្វគ្រប់ ១០០ ភាគរយនៃទិសដៅការងារដែលយើងបានដាក់ចេញកាលពីឆ្នាំ ២០២០ ទេ ព្រោះមានសកម្មភាពច្រើន។ បើយើងបូកសរុបការងារដែលយើងធ្វើបាន និងកំពុងតែធ្វើគឺបានប្រហែល ៨០ ភាគរយ។ ចំណែក ២០ ភាគរយទៀត មិនទាន់បានចាប់ផ្តើមដោយសារតែមានការរាលដាលពីជំងឺកូវីដ ១៩ផងដែរ»។
យ៉ាងណាក្តីលោកបញ្ជាក់ថា បើទោះជាស្ថិតក្នុងស្ថានភាពនៃជំងឺរាតត្បាតកូវីដ ១៩ ក្តី ក៏វិស័យសាធារណការដឹកជញ្ជូន និងភ័ស្តុភារកម្ម នៅតែបន្តសកម្មភាព និងការអនុវត្តគម្រោងតូចធំបានយ៉ាងច្រើនដោយប្រើប្រាស់ទាំងថវិកាជាតិ និងជំនួយពីដៃគូអភិវឌ្ឍន៍នានា ដោយពុំមានការផ្អាក ឬពន្យារពេលឡើយ។
សម្រាប់ឆ្នាំ ២០២២ នេះ លោក ស៊ុន ចាន់ថុល បានណែនាំឱ្យមន្ត្រីក្រោមឱវាទ បន្តរឹតបន្តឹងគុណភាពផ្លូវឱ្យបានហ្មត់ចត់ បន្តបណ្ដុះបណ្ដាលធនធានមនុស្ស ឱ្យមានសមត្ថភាពអាចធ្វើការប្រកបដោយប្រសិទ្ធភាព និងបន្តសាងសង់ ជួសជុល ថែទាំផ្លូវ ដោយផ្ដោតលើការប្រើប្រាស់បច្ចេកវិទ្យាទំនើប ធ្វើការឱ្យមានប្រសិទ្ធភាព គុណភាព កុំធ្វើការងារដដែលៗ ធ្វើម្ដងធ្វើឱ្យបានចប់សព្វគ្រប់។
បន្ថែមពីនេះលោកក៏បានជំរុញឱ្យមានការខិតខំផ្ដល់សេវាសាធារណៈឱ្យបានល្អជូនប្រជាពលរដ្ឋនៅតាមដានស្ថានីយថ្លឹងយានយន្តដឹកជញ្ជូនទំនិញ លើសទម្ងន់កម្រិតកំណត់ និងទីតាំងកែច្នៃយានយន្តខុសលក្ខណៈបច្ចេកទេស ធ្វើឱ្យប្រសើរឡើងហេដ្ឋារចនាសម្ព័ន្ធដែលធន់នឹងអាកាសធាតុ និងគ្រប់គ្រងការងារសាងសង់ផ្លូវស្ពានឱ្យមានគុណភាព ដោយប្រើប្រាស់បច្ចេកវិទ្យាទំនើបសម្រាប់គម្រោងដែលនៅសេសសល់ និងគម្រោងដែលបានដាក់ចេញថ្មីៗបន្ថែមទៀត។
លោកបញ្ជាក់ថា អង្គសន្និបាត ពិសេសថ្នាក់ដឹកនាំក្រសួង ទីប្រឹក្សា តំណាងមកពីអគ្គនាយកដ្ឋាន និងអង្គភាពជំនាញ និងមន្ទីរសាធារណការ និងដឹកជញ្ជូនរាជធានី-ខេត្ត ត្រូវយកចិត្ដទុកដាក់រួមគ្នា ពិនិត្យពិភាក្សាអំពីចំណុចខ្លាំងចំណុចខ្សោយ បញ្ហាប្រឈម និងសំណូមពរនៃប្រធានបទរបស់សន្និបាតឱ្យបានផុលផុស។ លោកបន្ថែមថា៖ «ព្រមទាំងពិភាក្សាបន្ថែមនូវបញ្ហា និងការងារសំខាន់ៗជាគន្លឹះ និងផ្តល់ជាយោបល់ និងធាតុចូលបន្ថែមទៅលើលទ្ធផលនៃសកម្មភាពការងារ អនុវត្តក្នុងអនុវិស័យ និងជំនាញរបស់ខ្លួន និងលើកវិធានការចាំបាច់ ដែលត្រូវកែលម្អ កែទម្រង់ និងអនុវត្តនៅឆ្នាំ ២០២២ និងនៅបណ្តាឆ្នាំខាងមុខ»។
តាមរបាយការណ៍របស់ក្រសួងសាធារណការឱ្យដឹងថា គិតមកទល់បច្ចុប្បន្ន បណ្តាញផ្លូវជាតិ និងផ្លូវជនបទបានស្ថាបនាដោយចាក់កៅស៊ូ និងបេតុងរួចប្រមាណជាង ១៥ ០០០ គីឡូម៉ែត្រ ហើយក្រសួងបាន និងកំពុងលើកកម្រិតគុណភាពពីកៅស៊ូ ២ ស្រទាប់ (DBST) ទៅបេតុងកៅស៊ូ (AC) និងពង្រីកពី ២ គន្លង ទៅ ៤ គន្លងនៅតាមខ្សែផ្លូវអាទិភាពមួយចំនួន។
ដោយឡែកកំណើនរថយន្ត និងទោចក្រយានយន្តដែលចរាចរនៅតាមដងផ្លូវនាពេលបច្ចុប្បន្នធៀបនឹងឆ្នាំ ១៩៩៨ ចំនួនរថយន្ត មានការកើនឡើងប្រមាណពី ៦៥ ០០០ គ្រឿង រហូតដល់ ៩២ ម៉ឺនគ្រឿង រីឯចំនួនទោចក្រយានយន្តវិញ កើនឡើងប្រមាណពី ២០ ម៉ឺនគ្រឿង រហូតដល់ ៥,២ លានគ្រឿង។ នេះបើតាមរបាយការណ៍ដដែល។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជាបានលើកឡើងថា បើទោះជាផែនការគោលដៅរបស់ក្រសួងមិនបានអនុវត្តបាន ១០០ ភាគរយក៏ប៉ុន្តែ លោកមើលឃើញថា ក្រសួងបានខិតខំប្រឹងប្រែងដាក់បញ្ចូលគំនិតផ្តើមថ្មី ដែលជាសេចក្តីត្រូវការរបស់សាធារណជន ក៏ដូចជារូបលោកផ្ទាល់ផងដែរ ដោយធ្វើយ៉ាងណា ដើម្បីបម្រើក្នុងវិស័យសាធារណការ និងដឹកជញ្ចូន។
លោកបានបញ្ជាក់ថា៖ «ខ្ញុំលើកទឹកចិត្តឱ្យក្រសួងសាធារណការ ក៏ដូចស្ថាប័នរដ្ឋាភិបាលពាក់ព័ន្ធឱ្យមានគំនិតផ្តួចផ្តើមថ្មីៗបែបនេះ ដើម្បីបង្កលក្ខណៈងាយស្រួល និងបង្កឱកាសសម្រាប់ការយល់ដឹង និងការចូលរួមក្នុងការផ្តល់មតិត្រឡប់ពីប្រជាពលរដ្ឋរបស់យើងក្នុងការរួមចំណែកលើកកម្ពស់សុវត្ថិភាពចរាចរណ៍»។
លោកមើលឃើញដែរថា បញ្ហាកូវីដ ១៩ បានធ្វើឱ្យការអនុវត្តសកម្មភាពការងារជាច្រើនត្រូវបានពន្យារពេល និងអាក់ខានផងដែរ ដែលធ្វើឱ្យសកម្មភាពរបស់ក្រសួងមិនអាចសម្រេចបាន ១០០ ភាគរយតាមផែនការ ប៉ុន្តែលោកសង្ឃឹមថា នៅពេលប្រទេសជាតិវិលមករកប្រក្រតីភាពពេលលេញ ក្រសួងនឹងបន្តបំពេញការងារដែលនៅសេសសល់ និងផ្តួចផ្តើមបង្កើតគំនិតថ្មីបន្តទៀត ដើម្បីបម្រើដល់វិស័យនេះ៕
