ក្រោយពីលេចឮដំណឹងរបស់រដ្ឋសាងសង់គម្រោងធំៗ បានធ្វើឱ្យតម្លៃអចលនទ្រព្យ ជាពិសេសដីធ្លី មានការកើនឡើងជាលំដាប់។ ជាក់ស្តែងដូចក្រវាត់ក្រុងទី៣នេះអ៊ីចឹង តាំងពីមានដំណឹងថា សាងសង់ រហូតដល់ពេលចាប់ផ្តើមបើកការដ្ឋាន ហើយបន្តមកដល់បច្ចុប្បន្នកំពុងសាងសង់ បានធ្វើឱ្យអ្នកវិនិយោគមួយចំនួនកំពុងតែត្រូវប៉ាន់ខ្លាំងផងដែរ។ ប៉ុន្តែមកដល់ពេលនេះ តើការសាងសង់ផ្លូវក្រវាត់ក្រុងទី៣ ក្រសួងសាធារណ និងដឹកជញ្ជូន បានសាងសង់រួចរាល់ប៉ុន្មានភាគរយហើយ? ខណៈអ្នកវិនិយោគមួយចំនួនធំកំពុងទន្ទឹងរង់ចាំមើលផ្លូវនៃការបើកការដ្ឋានសាងសង់ផ្លូវក្រវាត់ក្រុងទី៤។យោងតាមក្រសួងព័ត៌មានបានឱ្យដឹងថា៖ គិតត្រឹមពាក់កណ្តាល ខែមករាឆ្នាំ ២០២២ នេះ គម្រោងសាងសង់ផ្លូវក្រវាត់ក្រុងទី៣ ដែលភ្ជាប់ផ្លូវជាតិសំខាន់ៗរបស់កម្ពុជា ក្រោមហិរញ្ញប្បទានពីរដ្ឋាភិបាលចិន សម្រេចបានជិត ៧០ភាគរយហើយ គ្រោងនឹងបញ្ចប់ការស្ថាបនា នៅបំណាច់ឆ្នាំ២០២២នេះ ។ ជាមួយគ្នានេះដែរ លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការនិងដឹកជញ្ជូន បានឱ្យដឹងថា៖ គម្រោងសាងសង់ផ្លូវដែលមានប្រវែង ប្រមាណ៥៣ គីឡូម៉ែត្រនេះ នឹងដើរតួនាទីយ៉ាងសំខាន់ ក្នុងកាត់បន្ថយការកកស្ទះចរាចរណ៍ និង គ្រោះថ្នាក់ចរាចរណ៍ នៅរាជធានីភ្នំពេញ ព្រមទាំងជួយជំរុញកំណើនសេដ្ឋកិច្ចជាតិ។ ទន្ទឹមនឹងនេះដែរ សម្រាប់គម្រោងផ្លូវក្រវាត់ក្រុងទី៤ បាននឹងកំពុងសិក្សា ខណៈរាជរដ្ឋាភិបាលកំពុងរកលុយមកសាងសង់ផងដែរ។ ប៉ុន្ដែមុននឹងគម្រោងនេះបើកដំណើរការសាងសង់ ទាល់តែគម្រោងផ្លូវក្រវ៉ាត់ក្រុងទី៣ ត្រូវបានសាងសង់រួចរាល់ជាមុនសិន។ ខណៈឯកឧត្ដមទេសរដ្ឋមន្ត្រីបានមានប្រសាសន៍យ៉ាងដូច្នេះថា៖ «សព្វថ្ងៃនេះ ថវិកាដែលយើងមាន គឺសាងសង់ពាក់កណ្ដាលក្រវ៉ាត់ទេ។ ដោយសារត្រើយខាងកើតយើងត្រូវសាងសង់ស្ពានឆ្លងទន្លេមេគង្គនៅក្ដីតាកុយ យើងត្រូវសាងសង់ស្ពានឆ្លងទន្លេមេគង្គនៅកោះដាច់។ល។ ទើបយើងក្លាយទៅជាក្រវ៉ាត់ក្រុងពេញលេញ។ ដូច្នេះជំហ៊ានបន្ទាប់ គឺសាងសង់ស្ពាន សាងសង់ផ្លូវ ក្រវ៉ាត់ក្រុងផ្នែកខាងកើតទន្លេមេគង្គសិន ទើបឈានទៅរកការសាងសង់ក្រវ៉ាត់ទី៤។» នេះបើតាមការលើកឡើងរបស់ឯកឧត្ដម ស៊ុន ចាន់ថុល ទេសរដ្ឋមន្រ្ដី រដ្ឋមន្ដ្រីក្រសួងសាធារណការ និងដឹកជញ្ជូន ក្នុងកម្មវិធី MPWT LIVE SHOW ស្ដីពីប្រធានបទ"សមិទ្ធផលហេដ្ឋារចនាសម្ព័ន្ធផ្លូវថ្នល់ចាប់ពីចុងឆ្នាំ២០១៨ ដល់ពេលបច្ចុប្បន្ន និងផែនការកំពុងបន្តរហូតដល់ឆ្នាំ ២០២៣" នាថ្ងៃទី៣០ ខែសីហា ឆ្នាំ២០២១នេះ។ ដូចនេះ មានអ្នកជំនាញជាច្រើនបានរំពឹងថា ក្រោយពេលគម្រោងផ្លូវក្រវាត់ទី៣ បញ្ចប់ទៅ គម្រោងសាងសង់ផ្លូវក្រុងទី៤ នឹងរះឡើងហើយធ្វើឱ្យតម្លៃដីធ្លី ដែលមាននៅតាមបណ្តាផ្លូវក្រវាត់ក្រុងទី៤ ជាពិសេសដីធ្លីនៅក្នុងខេត្តទាំង៤ ដែលគម្រោងផ្លូវនេះត្រូវឆ្លងកាត់ នឹងកើនតម្លៃជាលំដាប់។ អត្ថបទ៖ ដារ៉ូ