វិទ្យាស្ថានតេជោ សែន សាធារណការ និងដឹកជញ្ជូន រៀបចំពិធីដាក់ឱ្យដំណើការគម្រោងកសាងសមត្ថភាពស្តីពីវិធីសាស្រ្តថែទាំផ្លូវថ្នល់ ដើម្បីលើកកម្ពស់ហេដ្ឋារចនាសម្ព័ន្ធប្រកបដោយចីរភាពសម្រាប់ប្រទេសកម្ពុជា-ឡាវ-វៀតណាម ក្រោមអធិបតីភាព លោកជំទាវ ឥម នីថារ៉ា រដ្ឋលេខាធិការ ថ្ងៃចន្ទ ១៥កើត ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវថ្ងៃទី១៧ ខែមករា ឆ្នាំ២០២២ នៅទីស្ដីការ ក្រសួង លោកជំទាវ ឥម នីថារ៉ា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីដាក់ឱ្យដំណើការគម្រោងកសាង សមត្ថភាពស្តីពីវិធីសាស្រ្តថែទាំផ្លូវថ្នល់ ដើម្បីលើកកម្ពស់ហេដ្ឋារចនាសម្ព័ន្ធប្រកបដោយចីរភាពសម្រាប់ ប្រទេសកម្ពុជា-ឡាវ-វៀតណាម រៀបចំឡើងដោយវិទ្យាស្ថានតេជោ សែន សាធារណការ និងដឹកជញ្ជូន ។ កម្មវិធីនេះមានការចូលរួមតាមប្រព័ន្ធវីដេអូពីចម្ងាយ និងការចូលរួមដោយផ្ទាល់ពីថ្នាក់ដឹកនាំក្រសួង ឯកឧត្តម ហឿន សំនៀង នាយកវិទ្យាស្ថានតេជោ សែន សាធារណការ និងដឹកជញ្ជូន ក្រសួងសាធារណការ និងដឹកជញ្ជូនរបស់ប្រទេសឡាវ និងវៀតណាម លោក Madhurjya K.Duta នាយកសម្របសម្រួលការវិនិយោគនៃវិទ្យាស្ថានមេគង្គ ថ្នាក់ដឹកនាំវិទ្យាស្ថាន មន្ទីរសាធារណការ និងដឹកជញ្ជូនរាជធានី-ខេត្ត គណៈគ្រប់គ្រងសាស្ត្រាចារ្យ និស្សិត ក្រុមការងារជំនាញ ក្រោមឱវាទវិទ្យាស្ថាន និងភាគីពាក់ព័ន្ធផងផងដែរ។ ពិធីនេះប្រារព្ធធ្វើឡើងក្នុងគោលបំណងប្រកាសជូនសាធារណជនឱ្យបានដឹងអំពីការចាប់ដំណើរការអនុវត្តគម្រោងកសាងសមត្ថភាពស្ដីពីវិធីសាស្ត្រថែទាំផ្លូវថ្នល់ ដើម្បីលើកកម្ពស់ហេដ្ឋារចនាសម្ព័ន្ធប្រកបដោយចីរភាពសម្រាប់ប្រទេសកម្ពុជា ឡាវ វៀតណាម ដែលជាគម្រោងផ្ដោតលើការពង្រឹងសមត្ថភាពផ្នែក បច្ចេកទេស មន្ត្រីពាក់ព័ន្ធ និងកម្មករជំនាញ តាមរយៈកម្មវិធីបណ្ដុះបណ្ដាលថែទាំផ្លូវថ្នល់ ក្នុងន័យលើក កម្ពស់គុណភាពហេដ្ឋារចនាសម្ព័ន្ធនៅបណ្ដាប្រទេសកម្ពុជា ឡាវ វៀតណាម ក៏ដូចជាដើម្បីផ្សព្វផ្សាយអំពីសារសំខាន់នៃការថែទាំផ្លូវថ្នល់ជូនសាធារណៈជនឱ្យបានដឹងផងដែរ។ ថ្លែងនៅក្នុងរបាយការណ៍ជូនអង្គពិធីនៅក្នុងកម្មវិធីបើក ឯកឧត្តមនាយកវិទ្យាស្ថាន បានគូសបញ្ជាក់ពីកិច្ច ខិតខំយ៉ាងសស្រាក់សស្រាំឥតទំនេរដៃក្នុងការស្ថាបនា និងកែលម្អហេដ្ឋារចនាសម្ព័ន្ធផ្លូវថ្នល់នៃការដឹក ជញ្ជូនក្នុងដែនដីនៃព្រះរាជាណាចក្រកម្ពុជា ដែលជាសរសៃឈាមដ៏សំខាន់ ដើម្បីបម្រើដល់សកម្មភាពសេដ្ឋកិច្ចជាតិ និងបានលើកឡើងអំពីបំណងប្រាថ្នារបស់ឯកឧត្ដមទេសរដ្ឋមន្ដ្រីចង់ឱ្យកូនខ្មែរជំនាន់នេះ និងជំនាន់ក្រោយៗទៀតចេះសាងសង់ផ្លូវ-ថ្នល់ ស្ពាន ហេដ្ឋារចនាសម្ព័ន្ធសាធារណៈដោយខ្លួនឯង ប្រកប ដោយគុណភាព ដើម្បីលើកកម្ពស់ការអភិវឌ្ឍវិស័យដឹកជញ្ជូន និងភស្តុភារកម្មឱ្យកាន់តែមានប្រសិទ្ធភាព ខ្ពស់ជូនជាតិមាតុភូមិ។ ជាមួយគ្នានោះផងដែរ លោកជំទាវរដ្ឋលេខាធិការ បានសម្តែងនូវការអបអរសាទរយ៉ាងក្រៃលែងជាមួយជោគជ័យរបស់វិទ្យាស្ថាន តេជោ សែន សាធារណការ និងដឹកជញ្ជូន ដែលទទួលបានជំនួយពីមូលនិធិកិច្ចសហប្រតិបត្តិការមេគង្គ-កូរ៉េ ក្នុងការកសាងសមត្ថភាពអ្នកបច្ចេកទេស មន្ត្រីពាក់ព័ន្ធ និងកម្មករសំណង់ តាមរយៈកម្មវិធីបណ្តុះបណ្តាលថែទាំផ្លូវថ្នល់លើកកម្ពស់ហេដ្ឋារចនាសម្ព័ន្ធប្រកបដោយចីរភាពសម្រាប់ប្រទេសកម្ពុជា និងបានចូលរួមមតិចាប់អារម្មណ៍ថាគម្រោងនេះធ្វើឡើងដើម្បីផ្ដល់នូវឱកាសមិនមែនតែសម្រាប់ប្រទេសកម្ពុជានោះទេ ប៉ុន្តែបានផ្ដល់ឱកាសដល់ប្រទេសវៀតណាម និង ប្រទេសឡាវ ដើម្បីពង្រឹងសមត្ថភាព និងការចែករំលែកបទពិសោធន៍នៃការវាយតម្លៃតម្រូវការបណ្ដុះបណ្ដាលការអភិវឌ្ឍកម្មវិធីបណ្ដុះបណ្ដាល ការផ្លាស់ប្ដូរទស្សនកិច្ចសិក្សា ក្នុងពេលអនុវត្តការងារទៅវិញទៅមកជាដើម។ ជាងនេះទៅទៀត លោកជំទាវ បានស្នើឱ្យគ្រប់ភាគីពាក់ព័ន្ធទាំងអស់សហការ និងចូលរួមផ្តល់ធាតុចូលឱ្យបានផុលផុស ធ្វើយ៉ាងណាឱ្យការអនុវត្តគម្រោងនេះទទួលបានជោគជ័យ និងប្រកបដោយផ្លែផ្កានាពេលអនាគត និងបានបង្ហាញនូវក្តីសង្ឃឹមយ៉ាងមុតមាំថាកិច្ចសហប្រតិបត្តិការនេះនឹងជួយពង្រឹងដល់ការគ្រប់គ្រងប្រព័ន្ធថែទាំផ្លូវថ្នល់នៅកម្ពុជាកាន់តែមានប្រសិទ្ធភាព។ លោកជំទាវរដ្ឋលេខាធិការ បានថ្លែងអំណរគុណយ៉ាងជ្រាលជ្រៅផងដែរដល់មូលនិធិគម្រោងកិច្ចសហ ប្រតិបត្តិការមេគង្គ-កូរ៉េ (MKCF) និងវិទ្យាស្ថានមេគង្គ ដែលបានវាយតម្លៃប្រកបដោយសុក្រឹត្យភាព និង បានជ្រើសរើសគម្រោងស្នើសុំរបស់វិទ្យាស្ថានតេជោសែន សាធារណការ និងដឹកជញ្ជូន នេះឡើង និងបានសម្តែងនូវការគាំទ្រយ៉ាងពេញទំហឹងចំពោះគំនិតផ្តួចផ្តើមដ៏មានគុណប្រយោជន៍នេះ។ សូមជម្រាបជូនថា៖ កម្មវិធីបណ្ដុះបណ្ដាលថែទាំផ្លូវថ្នល់នេះ នឹងក្លាយជាកម្មវិធីដែលបានរចនាថ្មី និងមាន តែមួយគត់ក្នុងប្រទេសកម្ពុជា ជាកម្មវិធីសិក្សាមួយដែលមានរចនាសម្ព័ន្ធល្អ និងត្រូវបានបង្កើតឡើង ដើម្បីបំពាក់បំប៉នដល់សិក្ខាកាមគោលដៅមកពីប្រទេសទាំងបីកម្ពុជា ឡាវ វៀតណាម ជាមួយអ្នកជំនាញ បច្ចេកទេសជាក់លាក់ និងទំនើបកម្មនៃការថែទាំផ្លូវថ្នល់។ កម្មវិធីបណ្ដុះបណ្ដាលនេះនឹងផ្ដល់ជូនដោយប្រើមធ្យោបាយនិងវិធីសាស្ត្រផ្សេងៗគ្នារួមមាន៖ ការបណ្ដុះ បណ្ដាលដោយផ្ទាល់ និងប្រយោលតាមកម្មវិធីអនឡាញ សិក្ខាសាលាការអនុវត្តជាក់ស្ដែងនៅតាម ការដ្ឋាន និងលំហាត់ ដើម្បីធានាថាសិក្ខាកាមគោលដៅមកពីប្រទេសទាំងបី កម្ពុជា ឡាវ វៀតណាម នឹងអាចទទួលបានអត្ថប្រយោជន៍ច្រើនបំផុតពីកម្មវិធីបណ្ដុះបណ្ដាលនេះ ជាពិសេសការប្រើប្រាស់ប្រព័ន្ធគ្រប់គ្រងការសិក្សានឹងជួយសិក្ខាកម្មឱ្យទទួលបានអត្ថប្រយោជន៍ នៃការបណ្ដុះបណ្ដាលពីកន្លែង ដែលពួកគេរស់នៅផ្ទាល់។ សូមបញ្ជាក់ជូនផងដែរថា៖ នាយកដ្ឋានបណ្ដុះបណ្ដាល និងវិក្រឹតការនៃវិទ្យាស្ថានតេជោ សែន សាធារណការ និងដឹកជញ្ជូន ទទួលបានការអនុម័តថវិកា ដើម្បីអនុវត្តគម្រោងកសាងសមត្ថភាពស្ដីពីវិធីសាស្ដ្រថែទាំផ្លូវថ្នល់ក្នុងការលើកកម្ពស់ហេដ្ឋារចនាសម្ព័ន្ធប្រកបដោយចីរភាពសម្រាប់ប្រទេសកម្ពុជា-ឡាវ-វៀតណាម ពីមូលនិធិក្នុងក្របខណ្ឌកិច្ចសហប្រតិបត្ដិការមេគង្គ-សាធារណ រដ្ឋកូរ៉េ (MKCF) តាមរយៈវិទ្យាស្ថានមេគង្គសម្រាប់រយៈពេល ១៨ខែ ក្នុងគោលបំណងកសាងសមត្ថភាព អ្នកបច្ចេកទេស មន្ត្រីពាក់ព័ន្ធ និងកម្មករសំណង់ នៅប្រទេសកម្ពុជា-ឡាវ-វៀតណាម តាមរយៈកម្មវិធីបណ្តុះបណ្តាលថែទាំផ្លូវថ្នល់ ដើម្បីលើកកម្ពស់ហេដ្ឋារចនាសម្ព័ន្ធប្រកបដោយចីរភាពសម្រាប់ប្រទេស កម្ពុជា-ឡាវ-វៀតណាម៕