[Rasmei Kampuchea Daily News] - ចាប់ផ្តើមស្ថាបនាផ្លូវ ស្ពានកាត់ត្រង់ថ្មីបញ្ជៀសពីគល់ផ្លូវស្ពានកោងចាស់នៅក្រុងសំរោង
ដោយ:អូរស្មាច់/ឧត្តរមានជ័យ: ផ្លូវ ស្ពានកាត់ត្រង់ បញ្ជៀសពីចំណុចផ្លូវស្ពានកោងនៃគល់ស្ពានចាស់សងខាងងាយបង្កគ្រោះថ្នាក់ដល់អ្នកប្រើប្រាស់ផ្លូវ បានចាប់ផ្តើមស្ថាបនាហើយ លើផ្លូវជាតិលេខ៦៨ បេ ស្ថិតនៅត្រង់ចំណុចភូមិកណ្តែក សង្កាត់សំរោង ក្រុងសំរោង ខេត្តឧត្តរមានជ័យ។
លោក ប៉ាង សំអាត អនុប្រធានមន្ទីរសាធារណការ ខេត្តនិងដឹកជញ្ជូនខេត្តឧត្តរមានជ័យ បានឱ្យដឹងថា ដំណើរការស្ថាបនាផ្លូវស្ពានកាត់ត្រង់ខាងលើ គឺផែនការ របស់មន្ទីរសាធារណការ និង ដឹកជញ្ជូនខេត្ត ប្រើប្រាស់ថវិកាជាតិ ផ្តល់តាមរយៈគម្រោងផែនការរបស់ក្រសួង សាធារណការ និងដឹកជញ្ជូនក្នុងឆ្នាំ២០២២។
លោកបន្តថា គម្រោងស្ថាបនា កាត់ត្រង់ថ្មីមួយមន្ថែមនេះ ជាផ្លូវកៅស៊ូ និង ស្ពានបេតុង គឺកម្រិតស្តង់ដារ ដូចផ្លូវ ស្ពាន ចាស់ តភ្ជាប់ពីចំណុចផ្លូវកោង នៃ គល់ស្ពានម្ខាងឆ្ពោះទៅចំណុចផ្លូវនៃគល់ស្ពានកោងម្ខាងទៀត មានប្រវែង ចំនួន៨០០ ម៉ែត្រ ។
លោក បាន បញ្ជាក់ថាៈ ចំណុច ផ្លូវ កោង នៃ គល់ស្ពាន សង ខាងលើនេះ ត្បិត គល់ស្ពាន បច្ចុប្បន្ននេះ មានការ បំពាក់ នូវ រនាំង ដែក ភ្លើង ស្លាក សញ្ញា សងខាង ឱ្យមាន ការ ប្រុងប្រយ័ត្ន ក៏ដោយ ក៏ករណីគ្រោះថ្នាក់ បង្កដោយ រថយន្ត បណ្តាលឱ្យបាត់បង់អាយុជីវិតមនុស្សជាញឹកញាប់ក្នុងមួយឆ្នាំៗ៕
