[Rasmei Kampuchea Daily News] - ប្រកួតហែលទឹកជើងឯកកីឡាថ្នាក់ជាតិ៖ ចប់ការប្រកួត ក្រសួងសាធារណការ និងដឹកជញ្ជូន ឈរតំណែងកំពូល
ដោយៈ សុវណ្ណកុម្ភៈ / ភ្នំពេញៈ ការប្រកួតហែលទឹកជើងឯកជាតិ ឆ្នាំ២០២១ ដែលចាប់ផ្ដើម ពីថ្ងៃទី៨ មករា មកនោះ បានបញ្ចប់ជាស្ថាពរ ដោយក្លិបហែលទឹក ក្រសួងសាធារណការ និងដឹកជញ្ជូន គ្រងតំណែងជើងឯកកំពូល។
ក្លិបនេះ ដណ្តើមបានមេដាយច្រើនជាងគេ គឺមានចំនួនសរុប ២៦ គ្រឿង ដែលក្នុង នោះ មានមេដាយមាស ១២ គ្រឿង ប្រាក់ ៧ គ្រឿង និងសំរិទ្ធ ៧ គ្រឿង។ ក្លិបហែលទឹកក្រសួងមហាផ្ទៃ ដែលឈរនៅលំដាប់លេខ២នោះ ដណ្តើមបានមេដាយ ១៣ គ្រឿង រួមមាន មេដាយមាស ៥គ្រឿង ប្រាក់ ៦ គ្រឿង និងសំរិទ្ធ ២ គ្រឿង។ ក្លិបហែលទឹកក្រសួងសេដ្ឋកិច្ច និងហិរញ្ញវត្ថុ ឈរនៅលំដាប់ដ្នាក់លេខ៣ គឺដណ្តើមបានមេដាយ ១៣ គ្រឿង រួមមាន មេដាយមាស ២ គ្រឿង ប្រាក់ ៤ គ្រឿង និងសំរិទ្ធ ៧ គ្រឿង។ ក្លិបហែលទឹកក្រសួងព័ត៌មាន ទទួលបានមេដាយប្រាក់ ២ គ្រឿង និងសំរិទ្ធ ១គ្រឿង។ ក្លិបហែលទឹកព្រឹទ្ធាចារ្យ ហែមថុន ដណ្តើមមេដាយសំរិទ្ធ ១គ្រឿង និងក្លិបហែលទឹក នាគរាជ ខេត្តកំពង់ចាម ដណ្តើមមេដាយសំរិទ្ធ ១ គ្រឿង។
អគ្គលេខាធិការ សហព័ន្ធខ្មែរកីឡាហែលទឹក លោក ហែម គីរី បានប្រាប់ឲ្យដឹងថាៈ ការប្រកួតមានក្រុមកីឡាករ-កីឡាការិនី និងគណៈប្រតិភូ គ្រូបង្វឹកចូលរួម ១២៣ នាក់ ក្នុងនោះ កីឡាករចំនួន ៧៤ នាក់ កីឡាការិនី ៣៨ និងគ្រូបង្វឹក ១១ នាក់ មកពី ៦ ក្លិប រួមមាន ក្លិបហែលទឹកក្រសួងសាធារណការ និងដឹកជញ្ជូន ក្លិបហែលទឹកក្រសួង សេដ្ឋកិច្ច និងហិរញ្ញវត្ថុ ក្លិបហែលទឹកក្រសួងមហាផ្ទៃ ក្លិបហែលទឹកក្រសួងព័ត៌មាន ក្លិបហែលទឹកនាគរាជ ខេត្តកំពង់ចាម និងក្លិបហែលទឹកព្រឹទ្ធាចារ្យ ហែម ថុន ។
ការប្រកួតជើងឯកឆ្នាំនេះ យើងធ្វើឡើងមណ្ឌលកីឡាហែលទឹកបាត់ដំបង ដើម្បីផ្សព្វ ផ្សាយឲ្យប្រជាជន និងសិស្សានុសិស្ស ខេត្តបាត់ដំបង បានជ្រាបពីប្រភេទកីឡា ហែលទឹក និងបង្កើធនធានមនុស្ស សម្រាប់ខេត្តមួយនេះ។
លោកបានបន្តថាៈ ដោយមានការសហការ រវាងសហព័ន្ធខ្មែរកីឡាហែលទឹក និងគណៈកម្មាធិការជាតិ ប៉ារ៉ាអូឡាំពិកកម្ពុជា ក្នុងនោះ យើងក៏ធ្វើការប្រកួតកីឡា ជនពិការជើងឯកថ្នាក់ជាតិ ២០២២ ដើម្បីជ្រើសរើសពួកគាត់ ចូលរួមជាមួយក្រុម ជម្រើសជាតិ ២០២២ របស់ក្រសួងអប់រំ យុវជន និងកីឡាទៀតផង ៕
