ភ្នំពេញ ៖ លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យានិងទំនាក់ទំនងសាធារណៈ ដែលជាអ្នកនាំពាក្យក្រសួង សាធារណការនិងដឹកជញ្ជូន និងជាប្រធានផ្នែកហេដ្ឋារចនាសម្ព័ន្ធព័ត៌មានវិទ្យានៃគម្រោង Port EDI បានទទួលជួបសម្តែងការគួរសមពិភាក្សា ការងារជាមួយថ្នាក់ដឹកនាំក្រុមហ៊ុនទទួលបន្ទុករៀបចំ ដឹកនាំដោយលោក Viboon Chaojirapant ប្រធានចាត់ការទូទៅនៃក្រុមហ៊ុន GUUD ដោយមានការចូលរួមពីថ្នាក់ដឹកនាំក្រុមហ៊ុន Exeo និងក្រុមហ៊ុន Positron ព្រមទាំងមន្ត្រីជំនាញរបស់នាយកដ្ឋានដើម្បីពិភាក្សាអំពី កិច្ចសហប្រតិបត្តិការបច្ចេកទេសព័ត៌មានវិទ្យា លើការងារអភិវឌ្ឍគម្រោងប្រព័ន្ធផ្លាស់ប្តូរទិន្នន័យអេឡិចត្រូនិកនៅកំពង់ផែ(Port EDI) កាលពីថ្ងៃទី១១ ខែមករា នាទីស្តីការក្រសួង។ កិច្ចពិភាក្សាបានផ្តោតសំខាន់លើវឌ្ឍនភាពការងារសម្រេចបាននាពេលកន្លងមក និងកិច្ចសហប្រតិបត្តិការធ្វើយ៉ាងណាជំរុញឱ្យការដាក់ ដំណើរការប្រព័ន្ធអាចដំណើរការទៅបានក្នុងអំឡុងខែសីហា ឆ្នាំ២០២២ តាមការគ្រោងទុក។ ទន្ទឹមនោះអង្គប្រជុំបានពិភាក្សាចែករំលែកព័ត៌មានអំពីបច្ចុប្បន្នភាព នៃការអភិវឌ្ឍន៍ប្រព័ន្ធស្វ័យប្រវត្តិកម្មផ្សេងៗរបស់ក្រសួង ដែលបានដាក់ឱ្យ ដំណើរការប្រើប្រាស់ ដើម្បីជួយសម្រួលដល់ការផ្តល់សេវាសាធារណៈ ជូនដល់ប្រជាពលរដ្ឋប្រកបដោយប្រសិទ្ធភាព តម្លាភាព និងកាត់បន្ថយ ការចំណាយក្រៅផ្លូវការ ក៏ដូចជាកិច្ចសហការ និងទំនាក់ទំនងជិតស្និទ្ធជាមួយវិស័យឯកជន ជួយធ្វើឱ្យប្រសើរឡើងក្នុងការផ្តល់ សេវាសាធារណៈ៕