(ភ្នំពេញ)៖ នៅក្នុងកិច្ចប្រជុំ​​ថ្ងៃ​ទី​១១ ខែមករា ឆ្នាំ​២០២១នេះ ក្រោមអធិបតីភាព ឯកឧត្តម ឃួង ស្រេង អភិបាលរាជធានីភ្នំពេញ និង​មានការចូលរួមពីលោករដ្ឋលេខាធិការ នៃរដ្ឋលេខាធិដ្ឋានអាកាសចរស៊ីវិល តំណាងក្រុមហ៊ុន OCIC បានឲ្យដឹងថា គម្រោងសាងសង់ស្ពានអាកាសផ្លូវ២០០៤ ស្ថិតនៅផ្លូវប្រសព្វរវាងមហាវិថី សហព័ន្ធរុស្ស៊ី និង​វិថីសម្តេចចៅហ្វាវាំង គង់ សំ អុល (​ឬ​ ផ្លូវ២០០៤) គ្រោងនឹងស្ថាបនា ចាប់ពីខែមីនា ឆ្នាំ២០២២នេះ​ ។ ស្ពាននេះ គ្រោងប្រើប្រាស់រយៈពេលនៃការសាងសង់ចំនួនជាង ១៤ខែ ពោលគឺនឹងស្ថាបនាឱ្យបានរួចរាល់នៅមុនដែលកម្ពុជា នឹងធ្វើជាម្ចាស់ផ្ទះ នៃការប្រកួតកីឡាស៊ីហ្គេមឆ្នាំ២០២៣។ គម្រោងនៃការសាងសង់ស្ពានអាកាសនេះថា ស្របពីលើបណ្ដោយផ្លូវសហព័ន្ធរុស្ស៊ី គ្របពីលើផ្លូវ២០០៤ ប្រសព្វជាមួយនឹងផ្លូវ២០១១។ គម្រោងស្ពានអាកាសផ្លូវ២០០៤នេះ មានប្រវែង ៥១៦.២ម៉ែត្រ ប្រវែងបណ្តោយតួស្ពាន ២៣៣,៩ម៉ែត្រ ប្រវែងទទឹងតួស្ពាន ១៥.៨ ម៉ែត្រ កំពស់តួស្ពាន ត្រង់ចំណុចកណ្ដាល ៥.០ ទៅ៥.៥ម៉ែត្រ។ អាជ្ញាធរសង្ឃឹមថា ស្ពានអាកាសថ្មីនឹងបញ្ចៀស ​និងកាត់បន្ថយ​ការ​កក​ស្ទះ​ចរាចរណ៍​ត្រង់​ចំនុច​មហាវិថី​សហព័ន្ធ​រុស្ស៊ី​និង​វិថី​សម្ដេច​ចៅហ្វាវាំង គង់​សំអុល ( ផ្លូវ​២០០៤ ) ហើយក្រៅពីគម្រោង​សាងសង់​ស្ពាន​អាកាស​មួយ​ខ្សែ រដ្ឋបាលរាជធានីភ្នំពេញ ​គ្រោងសិក្សាបន្ថែម​ផ្លូវ​ក្រោម​ដី​មួយ​ខ្សែ​ទៀត​ ដើម្បីធ្វើឱ្យ​លំហូរ​ចរាចរណ៍​មានភាព​ងាយស្រួល​ក្នុង​ការ​ធ្វើ​ដំណើរ។ សូមជម្រាបថា បច្ចុប្បន្ននេះរាជធានីភ្នំពេញមានស្ពានអាកាសចំនួន ៦ហើយ ដែលកំពុងដាក់ឲ្យប្រើប្រាស់ដូចជា៖ ១. ស្ពានអាកាសក្បាលថ្នល់ ២. ស្ពានអាកាសស្ទឹងមានជ័យ ៣. ស្ពានអាកាស៧មករា ៤. ស្ពានអាកាស៥មករា(តិចណូ) ៥.ស្ពានអាកាសផ្សារដីហ៊ុយ និង ៦. ស្ពានអាកាស និងផ្លូវក្រោមដីនៅរង្វង់មូលចោមចៅ (កំពុងដំណើការសាងសង់)៕