កណ្តាល៖ តំណាងឯកឧត្ដមទេសរដ្ឋមន្ត្រី ស៊ុន ចាន់ថុល ប្រធានក្រុមការងាររាជរដ្ឋាភិបាលចុះជួយស្រុកកោះធំ ខេត្តកណ្ដាល ឯកឧត្តម ឯក រដ្ឋ អនុរដ្ឋលេខាធិការ និងជាសមាជិកក្រុមការងាររាជរដ្ឋាភិបាលចុះជួយស្រុកកោះធំ នៅថ្ងៃទី១៥,១៦,១៧ ខែធ្នូ ឆ្នាំ២០២១ បានចុះជួបសំណេះសំណាលជាមួយសិស្សវិទ្យាល័យថ្នាក់ទី១២ នៅស្រុកកោះធំមកពីវិទ្យាល័យ ប៊ុនរ៉ានី ហ៊ុនសែន ព្រែកតាដួង វិទ្យាល័យហ៊ុនសែនកំពង់កុង វិទ្យាល័យហ៊ុនសែនកោះធំ និងវិទ្យាល័យហ៊ុនសែនសំពៅពូន សរុបប្រមាណ៧៧០នាក់ ដែលកំពុងត្រៀមប្រឡងសញ្ញាបត្រមធ្យមសិក្សាទុតិយភូមិ នាសម័យប្រឡងថ្ងៃទី២៧ ខែធ្នូ ឆ្នាំ២០២១ ខាងមុខ។ នាឱកាសនេះ ក៏មានការចូលរួមពីលោកអភិបាល អភិបាលរងស្រុក លោកប្រធានក្រុមប្រឹក្សាភិបាលស្រុក សមាជិកក្រុមការងាររាជរដ្ឋាភិបាលចុះជួយឃុំសំពៅពូន និងអតីតសិស្សពូកែនិទេ្ទសA ពីររូប អតីតសិស្សជាប់អាហារូបករណ៍រៀននៅប្រទេសម៉ាឡេស៊ីចំនួន១រូប លោកគ្រូអ្នកគ្រូអញ្ជើញមកពីសាលា វិទ្យាល័យនីមួយៗក្នុងស្រុកកោះធំចំនួន២៥រូប។ ឯកឧត្តម ឯក រដ្ឋ អនុរដ្ឋលេខាធិការ បានពាំនាំនូវការសាកសួរ សុខទុក្ខ និងអនុសាសន៍ផ្តាំផ្ញើពីសំណាក់ឯកឧត្តមទេសរដ្ឋមន្ត្រី ជំរុញលើកទឹកចិត្តឱ្យប្អូនៗសិស្សានុសិស្ស ទាំងអស់យកចិត្តទុកដាក់ខិតខំប្រឹងប្រែងរៀនសូត្រឱ្យបានពូកែ ថែរក្សាសុខភាពឱ្យបានល្អ និងមាន គោលដៅច្បាស់លាស់លើការជ្រើសរើសមុខវិជ្ជាសិក្សាជំនាញនៅមហាវិទ្យាល័យ ក្រោយពីបានប្រឡង ជាប់ជាស្ថាពរ ជាពិសេសត្រូវគោរពតាមគោលការណ៍ណែនាំរបស់ក្រសួងអបរំយុវជន និងកីឡា និងវិធាន ការពារណែនាំរបស់ក្រសួងសុខាភិបាលឱ្យបានខ្ជាប់ខ្ជួនគឺ៖ ៣កុំ ៣ការពារ ដើម្បីទប់ស្កាត់ការចម្លងនៃជម្ងឺកូវីដ-១៩។ នាឱកាសនោះដែរឯកឧត្តមលើកឡើងថា៖ ដើម្បីជាការលើកទឹកចិត្តដល់ការ ខិតខំប្រឹងប្រែងរៀនសូត្រ សិស្សមកពីគ្រួសារមានជីវភាពខ្វះខាតដែលអាចប្រឡងជាប់សញ្ញាបត្រមធ្យមសិក្សាទុតិយភូមិឆ្នាំ២០២១ ចំនួន១០នាក់ នឹងទទួលបានឱកាសអាហារូបករណ៍១០០% ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ឯកឧត្តមបានបញ្ជាក់ថាសិស្សដែលប្រឡងជាប់សញ្ញាបត្រមធ្យមសិក្សាទុតិយភូមិជាប់និទ្ទេសA នឹងទទួលបានរង្វាន់លើកទឹកចិត្តម៉ូតូ SCOOPY ចំនួន១គ្រឿង ពីឯកឧត្តមទេសរដ្ឋមន្ត្រី ហើយសិស្ស ចំនួន១១នាក់មកពីស្រុកកោះធំដែលប្រឡងជាប់ចូលរៀននៅវិទ្យាស្ថានតេជោ សែន សាធារណការ និងដឹកជញ្ជូន នឹងទទួលបានឱកាសអាហារូបករណ៍១០០% នៅក្នុងវគ្គជ្រើសរើសសិស្សចូលរៀនឆ្នាំ សិក្សាថ្មីចំនួន២០០នាក់។ ឯកឧត្តមសមាជិកក្រុមការងារក៏បាននាំយកថវិការបស់ឯកឧត្តមទេសរដ្ឋមន្ត្រី ស៊ុន ចាន់ថុល សរុបចំនួន៤១លានរៀល ដើម្បីឧបត្ថម្ភដល់សិស្សចំនួន៧៧០នាក់ ក្នុងសិស្សម្នាក់ៗទទួលបានថវិកាចំនួន ៥០,០០០រៀល និងលោកគ្រូអ្នកគ្រូចំនួន២៥នាក់ ម្នាក់ៗទទួលបានថវិកា ១០០,០០០រៀល។ ទន្ទឹមគ្នានោះដែរ ឯកឧត្តម ឯក រដ្ឋ បានជូនពរដល់សិស្សានុសិស្សទាំងអស់ឱ្យប្រឡងជាប់សញ្ញាបត្រមធ្យមសិក្សាទុតិយភូមិ នាសម័យប្រឡងថ្ងៃទី២៧ ខែធ្នូ ឆ្នាំ២០២១ ទាំងអស់គ្នា និងសូមអនុវត្តវិធាន ការ៣កុំ ៣ការពារ ដើម្បីចៀសផុតពីជំងឺកូវីដ-១៩ ទាំងអស់គ្នា។ គួរជម្រាបផងដែរថា ឯកឧត្តមទេសរដ្ឋមន្ត្រី ស៊ុន ចាន់ថុល នឹងផ្តល់ជូនរង្វាន់លើកទឹកចិត្តម៉ូតូSCOOPYចំនួន១គ្រឿង ដល់សិស្សមកពីវិទ្យាល័យក្នុងស្រុកកោះធំ ដែលប្រឡងជាប់សញ្ញាបត្រមធ្យមសិក្សាទុតិយភូមិ ជាប់និទ្ទេស A ហើយសិស្សចំនួន១១នាក់មកពីស្រុកកោះធំដែលប្រឡងជាប់ចូលរៀននៅវិទ្យាស្ថានតេជោ សែន សាធារណការ និងដឹកជញ្ជូន នឹងទទួលបានឱកាសអាហារូបករណ៍១០០% នៅក្នុងវគ្គជ្រើសរើសសិស្ស ចូលរៀនឆ្នាំសិក្សាថ្មីចំនួន២០០នាក់៕