សកម្មភាពក្រុមការងារ ស.ស.យ.ក វិស័យសាធារណការ និងដឹកជញ្ជូន ចូលរួមពិធីសម្ភោធដាក់ឲ្យប្រើប្រាស់ជាផ្លូវការវិមានកីឡដ្ឋាន នៃពហុកីឡាជាតិមរតកតេជោ និងការប្រកាសបើកយុទ្ធនាការជាតិផ្សព្វផ្សាយ SEA GAME – ASEAN PARA GAMEs ឆ្នាំ២០២៣ នាពេលខាងមុខ នៅថ្ងៃទី១៨ ខែធ្នូ ឆ្នាំ២០២១ ក្រុមការងារ ស.ស.យ.ក វិស័យសាធារណការ និងដឹកជញ្ជូន បានចូលរួមពិធីសម្ភោធដាក់ឲ្យប្រើប្រាស់ជាផ្លូវការវិមានកីឡដ្ឋាន នៃពហុកីឡាជាតិមរតកតេជោ និងពិធីរាប់ថយក្រោយ៥០០ថ្ងៃ ប្រកាសបើកយុទ្ធនាការជាតិផ្សព្វផ្សាយ SEA GAME – ASEAN PARA GAMEs ឆ្នាំ២០២៣ ក្រោមអធិបតីភាពដ៍ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលប្រារព្ធធ្វើឡើងនៅវិមានកីឡដ្ឋានដ៏ធំស្កឹមស្កៃ ពហុកីឡាជាតិមរតកតេជោ ស្ថិតក្នុងសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ដោយមានការអញ្ជើញជាអធិបតីភាពរួមគ្នាពី ឯកឧត្តម វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជា ។ ពហុកីឡដ្ឋានជាតិមរតកតេជោ សាងសង់ឡើងដោយជំនួយឥតសំណងពីមិត្តចិន ដែលកើតឡើងពីចំណងមិត្តភាព កម្ពុជា-ចិន ទាំងនេះបានបង្ហាញយ៉ាងច្បាស់ពីការអភិវឌ្ឍន៍សង្គម សេដ្ឋកិច្ច វឌ្ឍនភាពជាតិ ជាពិសេសការរីកចម្រើនលូតលាស់គួរកត់សំគាល់នៃវិស័យកីឡាជាតិ ដែលត្រូវបានលើកស្ទួយ និងយកចិត្តទុកដាក់ដោយរាជរដ្ឋាភិបាលកម្ពុជា ហើយគឺជាថ្នាលបណ្ដុះបណ្ដាល និងអភិវឌ្ឍយុវជនក្នុងវិស័យកីឡាដើម្បីមានសមត្ថភាពពេញលេញដើម្បីប្រកួតប្រជែងក្នុងថ្នាក់តំបន់ និងអន្ដរជាតិ។ ពហុកីឡាដ្ឋានជាតិមរតកតេជោជាកីឡដ្ឋានធំជាងគេទី៣ នៅក្នុងតំបន់អាស៊ីអាគ្នេយ៍ មានចំនួនកៅអីរហូតដល់ ៦០ ០០០ កៅអី ដែលមានទំហំផ្ទៃដី ១៤,៩ ហិកតា ទំហំអាគារ ៨៦ ០០០ម៉ែត្រក្រឡា បានចាប់ផ្ដើមដំណើរការសាងសង់នៅថ្ងៃទី៣១ ខែសីហា ឆ្នាំ២០១៧ ហើយបញ្ចប់គម្រោងសាងសង់នៅថ្ងៃទី៣១ ខែឧសភា ឆ្នាំ២០២១។ ក្នុងនាម ស.ស.យ.ក វិស័យសាធារណការ និងដឹកជញ្ជូន សូមអបអរសាទរជាមួយរាជរដ្ឋាភិបាលកម្ពុជា ដែលសម្រេចបាននូវសម្មិទ្ធិផលថ្មី ដ៏ស្កឹមស្កៃនេះក្នុងវិស័យកីឡា៕ #អរគុណសន្ដិភាព #ពហុកីឡាដ្ឋានមរតកតេជោ