ឯកឧត្តម ប៉េង ពោធិ៍នា រដ្ឋលេខាធិការ បានដឹកនាំបើកកិច្ចប្រជុំអធិការកិច្ចសម្រាប់ការិយបរិច្ឆេទ២០២០ និងបណ្តាឆ្នាំពាក់ព័ន្ធរវាងគណៈប្រតិភូអធិការកិច្ចក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងថ្នាក់ដឹកនាំគ្រប់អគ្គនាយកដ្ឋាន អគ្គាធិការដ្ឋាន និងអង្គភាពក្រោមឱវាទក្រសួងសាធារណការ និងដឹកជញ្ជូន ថ្ងៃពុធ ១១កើត ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៥ ខែវិច្ឆិកា ឆ្នាំ២០២១ នៅទីស្ដីការ ក្រសួង ឯកឧត្តម ប៉េង ពោធិ៍នា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំ កិច្ចប្រជុំរវាងគណៈប្រតិភូអធិការកិច្ចក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និង ថ្នាក់ដឹកនាំអគ្គាធិការដ្ឋាន នៃក្រសួងសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំ ក្រសួងទទួលបន្ទុក មន្ត្រីជំនាញមកពីអគ្គាធិការដ្ឋាន និងអង្គភាពនានាក្រោមឱវាទក្រសួងផងដែរ។ ការចុះអធិការកិច្ចរបស់គណៈប្រតិភូនេះធ្វើឡើងក្នុងគោលបំណងពិនិត្យទៅលើការគ្រប់គ្រងការអនុវត្តតួនាទីភារកិច្ចការផ្តល់សេវាសាធារណៈ និងការងារសាងសង់ ជួសជុល ថែទាំខួប ប្រចាំ និងបន្ទាន់នៅ ក្រសួងសាធារណការ និងដឹកជញ្ជូន មន្ទីរសាធារណការ និងដឹកជញ្ជូនរាជធានី-ខេត្ត កងវិស្វកម្ម និងអង្គភាពពាក់ព័ន្ធក្នុងការិយបរិច្ឆេទ២០២០ និងបណ្តាឆ្នាំពាក់ព័ន្ធ និងត្រួតពិនិត្យនូវបណ្តាវិធានការផ្សេងៗផងដែរ។ ថ្លែងក្នុងកិច្ចប្រជុំនោះ ឯកឧត្ដមរដ្ឋលេខាធិការ បានសម្ដែងនូវការស្វាគមន៍យ៉ាងកក់ក្តៅចំពោះគណៈប្រតិភូ ដែលបានអញ្ជើញមកធ្វើអធិការកិច្ចនៅក្រសួងសាធារណការ និងដឹកជញ្ជូន នាពេលនេះ និងបានជំរុញឱ្យថ្នាក់ដឹកនាំគ្រប់អង្គភាពក្រោមឱវាទក្រសួងទាំងអស់សហការឱ្យបានជិតស្និទ្ធជាមួយគណៈប្រតិភូអធិការកិច្ច ជាពិសេសបង្កលក្ខណៈងាយស្រួលឱ្យការចុះធ្វើអធិការកិច្ចនេះទទួលបានជោគជ័យ និងទទួលបានលទ្ធផលផ្លែផ្កាតាមការគ្រោងទុក៕