ភ្នំពេញ ថ្ងៃទី៣០ ខែវិច្ឆិកា ឆ្នាំ២០២១ នៅទីស្តីការក្រសួង កាលពីថៃ្ង១០រោច ខែកត្តិក ឆ្នាំឆ្លូវ ត្រីស័ក ព.ស.២៥៦៥ ត្រូវថ្ងៃចន្ទ ទី២៩ ខែវិច្ឆិកា ឆ្នាំ២០២១ ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាវាគ្មិនកិត្តិយស ក្នុងកម្មវិធីវឌ្ឍនភាពការងារវិស័យសាធារណការ និងដឹកជញ្ជូន (MPWT Live Show) ក្រោមប្រធានបទ៖ «ការថែទាំផ្លូវថ្នល់ និងការចូលរួមពីប្រជាពលរដ្ឋ» ដោយមានការចូលរួមពីឯកឧត្តម ហ៊ាង វុត្ថា អគ្គនាយកនៃអគ្គនាយកដ្ឋានបច្ចេកទេស និងឯកឧត្តម ហេង រត្នពិសិដ្ឋ អគ្គនាយក នៃអគ្គនាយកដ្ឋានសាធារណការ និងមន្ត្រីជំនាញពាក់ព័ន្ធក្រោមឱវាទក្រសួងផងដែរ។ នៅក្នុងឱកាសនោះ ឯកឧត្តមរដ្ឋលេខាធិការ បានមានប្រសាសន៍អំពីសារៈសំខាន់នៃប្រព័ន្ធបណ្តាញផ្លូវថ្នល់នៅក្នុងព្រះរាជាណាចក្រកម្ពុជា ដែលរួមមានផ្លូវមួយលេខ ផ្លូវពីរលេខ និងផ្លូវបីលេខ សម្រាប់បម្រើដល់ការដឹកជញ្ជូនជូនប្រទេសជាតិ ។ ក្នុងនោះផ្លូវមួយលេខសាងសង់បានចំនួន ២ ២៥០គីឡូម៉ែត្រ ដោយក្រាលកៅស៊ូបាន១០០ភាគរយ ។ ចំណែកផ្លូវពីរលេខមានប្រវែង ៥ ០០០គីឡូម៉ែត្រ ក្រាលកៅស៊ូបានជាង ៣ ០០០គីឡូម៉ែត្រ ស្មើនឹងប្រមាណ ៧៤ភាគរយ ដើម្បីពង្រឹងសមត្ថភាព នៃការដឹកជញ្ជូនឱ្យកាន់តែប្រសើរ ឡើង។ ជាមួយគ្នានេះដែរ ឯកឧត្តមរដ្ឋលេខាធិការ បានមានប្រសាសន៍បន្ថែមទៀតថា ក្រសួងបានធ្វើការថែទាំផ្លូវមួយលេខ និងផ្លូវពីរលេខបាន ប្រមាណ៧០ភាគរយ អាស្រ័យដោយកម្រិតថវិកាដែលក្រសួងទទួលបានពីថវិកាជាតិ និងបានគូសបញ្ជាក់អំពីបេសកកម្ម ការប្តេជ្ញាចិត្តប្រកបដោយស្មារតីទទួលខុសត្រូវខ្ពស់របស់ក្រសួង ក៏ដូចជាមន្ត្រីរាជការទាំងអស់ ដែលជាអ្នកបម្រើសេវាជូនប្រជាពលរដ្ឋក្នុងការជួសជុលថែទាំផ្លូវថ្នល់ និងបម្រើសេវាជូនប្រជាពលរដ្ឋ ដើម្បីធានានិរន្តរភាពនៃការដឹកជញ្ជូន។ ទន្ទឹមនឹងនេះ ឯកឧត្តមរដ្ឋលេខាធិការ បានគូសបញ្ជាក់បន្ថែមទៀតអំពីយន្តការមួយចំនួនក្នុងការពង្រឹងការងារថែទាំផ្លូវថ្នល់ នៅតាមបណ្តារាជធានី-ខេត្ត ដើម្បីឱ្យមន្ត្រីបំពេញបេសកកម្មលើការងារថែទាំផ្លូវថ្នល់ អាចពង្រឹងសមត្ថភាពរបស់ខ្លួន និងធ្វើការត្រួតពិនិត្យ តាមដានជាប្រចាំនូវស្ថានភាពខូចរបស់ផ្លូវថ្នល់ ដើម្បីជួសជុលថែទាំបានទាន់ពេលវេលា ដោយក្រសួងមានអគ្គនាយកដ្ឋានបច្ចេកទេស ដែលជាអ្នកផ្ដល់មធ្យោបាយ និងបច្ចេក ទេសក្នុងការសាងសង់ និងថែទាំផ្លូវថ្នល់។អគ្គនាយកដ្ឋានសាធារណការដែលជាអ្នកពិនិត្យថាតើការថែទាំត្រូវការថវិកាវិនិយោគចំនួនប៉ុន្មាន? និងអគ្គនាយកដ្ឋានប្រព័ន្ធចម្រោះទឹកកខ្វក់ ដែលជាអ្នកត្រួតពិនិត្យមើលបណ្ដាញប្រព័ន្ធចម្រោះទឹកកខ្វក់ចេញពីតួផ្លូវ។ សូមជម្រាបថា កម្មវិធីនេះ គឺជាកម្មវិធីផ្សាយផ្ទាល់លើទំព័រហ្វេសប៊ុកផ្លូវការរបស់ក្រសួងសាធារណការ និងដឹកជញ្ជូន ដែលទទួលបានការអនុញ្ញាតពី ឯកឧត្តម ស៊ុន ចាន់ ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ក្នុងការដាក់ដំណើរការជាផ្លូវការ ដើម្បីបង្ហាញពីវឌ្ឍនភាព សមិទ្ធផល កិច្ចខិតខំប្រឹងប្រែងរបស់ក្រសួង ទៅកាន់ប្រជាពលរដ្ឋឱ្យកាន់តែទូលំទូលាយ ហើយកម្មវិធីនេះក៏ផ្ដល់ឱកាសផងដែរដល់ថ្នាក់ដឹកនាំ និង មន្ត្រីរបស់ក្រសួង ផ្សាភ្ជាប់ទំនាក់ទំនងជាមួយបងប្អូនប្រជាពលរដ្ឋ ឱ្យកាន់តែមានភាពជិតស្និទ្ធ តាមរយៈការបកស្រាយសំណួរដែលបានធ្វើការខមិន(Comment) សួរពាក់ព័ន្ធនឹងប្រធានបទរបស់វាគ្មិនកិត្តិយស ក្នុងទំព័រហ្វេសប៊ុកផ្លូវការរបស់ក្រសួង ក៏ដូចជាជំរុញការផ្ដល់សេវាសាធារណៈឱ្យកាន់តែមានភាពល្អប្រសើរថែមទៀត៕