[Kampuchea Thmey] - ក្រសួងសាធារណការ បំពាក់ម៉ាស៊ីនប្រើចំហាយខ្យល់ដើម្បីផលិតទឹកបរិសុទ្
2021-11-27
Go to the website published Kampuchea Thmey
ទឹកបរិសុទ្ធដែលផលិតចេញពីម៉ាស៊ីន ដោយប្រើបច្ចេកវិទ្យាទំនើបរបស់អ៊ីស្រាអែល មានសមត្ថភាពអាចផលិតទឹកបរិសុទ្ធដោយស្វ័យប្រវត្តិពីខ្យល់ក្នុងបរិយាកាស ដោយមិនចាំបាច់តភ្ជាប់ជាមួយប្រភពទឹកទុយោ ត្រូវបានបំពាក់នៅក្នុងបរិវេណទីស្តីការក្រសួងសាធារណការ និងដឹកជញ្ជូន ដើម្បីបម្រើដល់សេចក្តីត្រូវការរបស់មន្ត្រីរាជការ បុគ្គលិកនិយោជិត ដែលកំពុងបំពេញ ការងារ និងចូលរួមចំណែកថែរក្សាបរិស្ថាន សុខភាព អនាម័យ និងការសន្សំសំចៃ។
លោកទេសរដ្ឋមន្ត្រី ស៊ុន ចាន់ថុល អញ្ជើញចុះពិនិត្យមើល និងសាកល្បងទទួលទាន កាលពីថ្ងៃទី២៥ ខែវិច្ឆិកា ឆ្នាំ២០២១ នៅទីស្តីការក្រសួង និងចុះពិនិត្យ និងសាកល្បងទទួលទានទឹកបរិសុទ្ធ ដែលផលិតចេញពីម៉ាស៊ីនផលិតទឹកបរិសុទ្ធ ដោយបរិយាកាស-WATERGEN (ប្រភេទ GEN-M) ដែលបានបំពាក់នៅក្នុងបរិវេណទីស្តីការក្រសួង។
លោកទេសរដ្ឋមន្ត្រី គ្រោងនឹង រៀបចំឱ្យមានការបំពាក់ ម៉ាស៊ីន WATERGEN ខ្នាតតូច (ប្រភេទ GENNY) នៅគ្រប់ជាន់នៃអាគាររដ្ឋបាលរបស់ទីស្តីការក្រសួងផងដែរ ដើម្បីផ្គត់ផ្គង់ទឹកបរិសុទ្ធប្រចាំថ្ងៃជូនដល់ថ្នាក់ដឹកនាំ មន្ត្រីរាជការ បុគ្គលិកនិយោជិត ដែលកំពុងបំពេញ ការងាររបស់ខ្លួន ដើម្បីចូលរួមចំណែកថែរក្សាបរិស្ថាន សុខភាព អនាម័យ និងការសន្សំសំចៃផងដែរ។
ម៉ាស៊ីនផលិតទឹកបរិសុទ្ធនេះជាបច្ចេកវិទ្យាទំនើបមកពីប្រទេសអ៊ីស្រាអែល មានសមត្ថភាពអាចផលិត ទឹកបរិសុទ្ធដោយស្វ័យប្រវត្តិពីខ្យល់ក្នុងបរិយាកាស ដោយមិនចាំបាច់តភ្ជាប់ជាមួយប្រភពទឹកទុយោ និង អាចផ្គត់ផ្គង់ទឹកប្រកបដោយគុណភាព និងសុវត្ថិភាពខ្ពស់ និងកាត់បន្ថយផលប៉ះពាល់បរិស្ថានផ្សេងៗថែមទៀតផង។
ថ្លែងក្នុងដំណើរអញ្ជើញចុះពិនិត្យ និងសាកល្បងទទួលទាន លោកទេសរដ្ឋមន្ត្រីបានសម្តែងចំណាប់អារម្មណ៍លើរសជាតិឆ្ងាញ់ នៃទឹកដែលផលិតដោយម៉ាស៊ីននេះ និងអត្ថប្រយោជន៍របស់វាសម្រាប់សុខភាព ជាពិសេសអត្ថប្រយោជន៍របស់ម៉ាស៊ីននេះ ក្នុងការជួយកាត់បន្ថយការប្រើបាស់ផ្លាស្ទិច និងជួយថែរក្សាបរិស្ថានផងដែរ៕
