នៅថ្ងៃព្រហស្បតិ៍ ៦កើត ខែកត្តិក ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៥ ខែវិច្ឆិកា ឆ្នាំ២០២១ នៅសាលាខេត្តបន្ទាយមានជ័យ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋាន គ.ស.ច.គ. ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានអញ្ជើញជាអធិបតីភាពក្នុងពិធីយុទ្ធនាការអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកខេត្តបន្ទាយជ័យ និងមានការចូលរួមអមដំណើរដោយ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក និងជាប្រធានផ្នែកអប់រំផ្សព្វផ្សាយ នៃអគ្គលេខាធិការដ្ឋាន គ.ស.ច.គ. តំណាងស្នងការដ្ឋាននគរបាលខេត្ត តំណាងបញ្ជាការដ្ឋានកងរាជអាវុធហត្ថខេត្តបន្ទាយមានជ័យ និងមន្ត្រីអគ្គលេខាធិការដ្ឋាន គ.ស.ច.គ.។ ពិធីនេះរៀបចំឡើងដោយ នាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន សហការជាមួយអគ្គលេខាធិការដ្ឋាន នៃគណៈកម្មាធិការជាតិសុវត្ថិភាពចរាចរណ៍ផ្លូវគោក មន្ទីរសាធារណការ និងដឹកជញ្ជូនខេត្តបន្ទាយមានជ័យ លេខាធិការដ្ឋានអនុគណៈកម្មការសុវត្ថិភាពចរាចរណ៍ផ្លូវគោកខេត្តបន្ទាយមានជ័យ ស.ស.យ.ក ក្នុងវិស័យសាធារណការ និងដឹកជញ្ជូន និងមានការចូលរួមពី បងប្អូនមន្ត្រីរាជការ នៃមន្ទីរពាក់ព័ន្ធជុំវិញខេត្ត លោកគ្រូ អ្នកគ្រូ កងកម្លាំងនគរបាល កងកម្លាំងរាជអាវុធហត្ថ សិស្សានុសិស្ស យុវជនកាកបាទក្រហមខេត្ត យុវជនកាយរិទ្ធិខេត្តបន្ទាយមានជ័យ សរុបប្រមាណជាង ១០០នាក់។ គោលបំណងនៃការរៀបចំយុទ្ធនាការអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកនាពេលនេះ គឺដើម្បីពញ្ញាក់ស្មារតីដល់អ្នកប្រើប្រាស់ផ្លូវទាំងអស់ ជាពិសេសអ្នកប្រើប្រាស់ទោចក្រយានយន្ត ឱ្យយកចិត្តទុកដាក់ និងចូលរួមគោរពច្បាប់ស្តីពីចរាចរណ៍ផ្លូវគោក សំដៅចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោកឱ្យនៅកម្រិតទាប។ តាមរយៈរបាយការណ៍ស្តីពី គ្រោះថ្នាក់ចរាចរណ៍ផ្លូវគោករបស់ស្នងការនគរបាលខេត្តបន្ទាយមានជ័យបានឱ្យដឹងថា ក្នុងរយៈពេល៩ខែ ដើមឆ្នាំ២០២១ នេះ ខេត្តបន្ទាយមានជ័យកើតមានគ្រោះថ្នាក់ចរាចរណ៍ចំនួន ៦៣ករណី និង បណ្តាលឱ្យមានអ្នកស្លាប់ចំនួន ៤៨នាក់ អ្នករបួសធ្ងន់ ៣៨នាក់ អ្នករបួសស្រាល ២០នាក់ និងមិនពាក់មួកសុវត្ថិភាពក្នុងពេលគ្រោះថ្នាក់ចំនួន ៤៥នាក់។ មូលហេតុដែលបណ្តាលឱ្យមានគ្រោះថ្នាក់ចរាចរណ៍នេះរួមមាន៖ ការបើកបរហួសល្បឿនកំណត់ ៣០ករណី មិនគោរពសិទ្ធិអាទិភាព ៤ករណី បត់មិនប្រុងប្រយ័ត្ន ១២ករណី ជែងក្នុងស្ថានភាពគ្រោះថ្នាក់ ៤ករណី បើកបរក្នុងស្ថានភាពស្រវឹង ៥ករណី កត្តាយានយន្ត ២ករណី មិនប្រកាន់ស្តាំ ១ករណី និងគ្រោះថ្នាក់ផ្សេងៗ ៥ករណី ។ បៀបធៀបរយៈពេល ៩ខែ ឆ្នាំ២០២១ និង ៩ខែឆ្នាំ២០២០ គ្រោះថ្នាក់ចរាចរណ៍ផ្លូវគោកក្នុងខេត្តបន្ទាយមានជ័យ បានថយចុះ ១ករណី (៦៣/៦២ករណី) អ្នកស្លាប់ថយចុះ ៥នាក់ (៤៨/៥៣នាក់) អ្នករបួសធ្ងន់ថយចុះ ១៥នាក់ (៣៨/៥៣នាក់) និងអ្នករបួសស្រាល ថយចុះ ១៨នាក់ (២០/៣៨នាក់)។ លោក សុក ចាន់ថា ប្រធានមន្ទីរសាធារណការ និងដឹកជញ្ជូនខេត្តបន្ទាយមានជ័យ និងជាប្រធានលេខាធិការដ្ឋាន គ.ស.ច.គ. ខេត្តបន្ទាយមានជ័យបានរាយការណ៍អំពីវឌ្ឍនភាពការងាររបស់មន្ទីរសាធារណការ និងដឹកជញ្ជូនខេត្តបន្ទាយមានជ័យ ដែលបានអនុវត្តនាពេលកន្លងមកទាក់ទងនឹងការងារសុវត្ថិភាពចរាចរណ៍ផ្លូវគោក ជាអាទិ៍ ការត្រួតពិនិត្យយានដ្ឋានកែច្នៃ ការត្រួតពិនិត្យលក្ខណៈបច្ចេកទេសរបស់យានយន្ត និង ការផ្សព្វផ្សាយ និងចែកឯកសារផ្សេងៗពាក់ព័ន្ធនឹងច្បាប់ស្តីពីចរាចរណ៍ផ្លូវគោក។ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានមានប្រសាសន៍ ថ្នាក់ដឹកនាំអនុគណៈកម្មការសុវត្ថិភាពចរាចរណ៍ផ្លូវគោកខេត្តបន្ទាយមានជ័យ តែងយកចិត្តទុកដាក់ចំពោះបញ្ហាគ្រោះថ្នាក់ចរាចរណ៍ផ្លូវគោក និងបន្តជំរុញការអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកដល់បងប្អូនប្រជាពលរដ្ឋឱ្យបានយល់ដឹងបន្ថែម។ ឯកឧត្តមបានគាំទ្រយ៉ាងពេញទំហឹងដល់សកម្មភាពរបស់អគ្គលេខាធិការដ្ឋាន គ.ស.ច.គ. ក្នុងការចុះអប់រំផ្សព្វផ្សាយច្បាប់ស្តីពីចរាចរណ៍ផ្លូវគោក និងបានសន្យាលៃលកថវិកាមួយផ្នែករបស់ខេត្តដើម្បីគាំទ្រលើការងារសុវត្ថិភាពចរាចរណ៍ផ្លូវគោករបស់អនុគណៈកម្មការសុវត្ថិភាពចរាចរណ៍ផ្លូវគោកខេត្តបន្ទាយមានជ័យផងដែរ។ លោកជំទាវអគ្គលេខាធិការ គ.ស.ច.គ បានអំពាវដល់អ្នកចូលរួមទាំងអស់ ឱ្យចូលរួមអប់រំផ្សព្វផ្សាយអំពីច្បាប់ស្តីពីចរាចរណ៍ផ្លូវគោក បន្តដល់បងប្អូន ញាតិមិត្តរបស់ខ្លួន ដើម្បីការពារអាយុជីវិតខ្លួនឯង និងអ្នកដទៃ ជៀសផុតពីគ្រោះថ្នាក់ចរាចរណ៍ផ្លូវគោក។ ត្រូវពាក់មួកសុវត្ថិភាពឱ្យបានគ្រប់ៗគ្នានៅពេលជិះតាមទោចក្រយានយន្ត ដើម្បីការពារអាយុជីវិតពីរបួសផ្នែកក្បាលធ្ងន់ធ្ងរ។ លោកជំទាវក៏បានសំណូមពរឱ្យបងប្អូនប្រជាពលរដ្ឋអ្នកប្រើប្រាស់ផ្លូវទាំងអស់ ត្រូវប្រើប្រាស់គន្លងផ្លូវរបស់ខ្លូនឱ្យបានត្រឹមត្រូវជៀសវាងគ្រោះថ្នាក់ចរាចរណ៍ជាយថាហេតុ និងមិនត្រូវបើកបរនៅពេលប្រើប្រាស់គ្រឿងស្រវឹងជាដាច់ខាត។ នៅក្នុងយុទ្ធនាការនេះ ក៏មានការណែនាំអំពី Cambodia Driving Rules កម្មវិធីថែទាំផ្លូវ (Road Care App) របៀបក្នុងការពាក់មួកសុវត្ថិភាពឱ្យបានត្រឹមត្រូវ ព្រមទាំងការចែកជូននូវឯកសារមួយចំនួន ដូចជា សៀវភៅច្បាប់ស្តីពីចរាចរណ៍ផ្លូវគោក សៀវភៅអ្វីដែលអ្នកបើកបរទោចក្រយានយន្តត្រូវយល់ដឹង ខិត្តប័ណ្ណជំនួយស្មារតីស្តីពីសុវត្ថិភាពចរាចរណ៍ និងស្ទីកឃ័រចំណាំងផ្លាត។ នៅក្នុងយុទ្ធនាការនេះ ក៏មានការណែនាំដល់អ្នកចូលរួមក្នុងយុទ្ធនាការអំពីវិធានទប់ស្កាត់ជំងឺ Covid-19 តាមរយៈការរក្សាគម្លាត ការពាក់ម៉ាសការពារ ការថែរក្សាសុខភាព និងអនាម័យខ្លួនប្រាណតាមការណែនាំរបស់ក្រសួងសុខាភិបាល ដើម្បីចូលរួមចំណែកជាមួយរាជរដ្ឋាភិបាលក្នុងការទប់ស្កាត់ជំងឺ Covid-19 ផងដែរ។