ជំនួបសម្តែងការគួរសមពីសំណាក់ក្រុមនិស្សិតបេក្ខជនជ័យលាភីអាហារូបករណ៍រដ្ឋាភិបាលសហព័ន្ធរុស្ស៊ី ចំនួន២៨រូប មុនចេញដំណើរទៅបន្តការសិក្សារបស់ខ្លួនក្នុងពេលឆាប់ៗ ថ្ងៃពុធ ៥រោច ខែកត្តិក ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៤ ខែវិច្ឆិកា ឆ្នាំ២០២១ ទីស្តីការក្រសួង លោកជំទាវ ឥម នីថារ៉ា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តម ទេសរដ្ឋមន្ត្រី ស៊ុន ចាន់ថុល បានអញ្ជើញជួបសំណេះសំណាលជាមួយក្រុមនិស្សិតបេក្ខជនជ័យលាភីអាហារូបករណ៍រដ្ឋាភិបាលសហព័ន្ធរុស្ស៊ី ចំនួន២៨រូប មុនចេញដំណើរទៅបន្តការសិក្សានៅសហព័ន្ធរុស្ស៊ី ដោយមានការចូលរួមពីថ្នាក់ដឹកនាំក្រសួង។ ក្រុមនិស្សិតជ័យលាភីអាហារូបករណ៍ទាំងនេះមានចំនួន២៨រូប ជាមន្ត្រីរាជការស្ថាប័នរដ្ឋ និងបុគ្គលិកមកពីវិស័យឯកជន បានប្រឡងជាប់ថ្នាក់បរិញ្ញាបត្រជាន់ខ្ពស់សិក្សារយៈពេលពីរឆ្នាំ សម្រាប់ឆ្នាំសិក្សា២០២១ និងឆ្នាំ២០២២ ដែលនឹងត្រូវចេញដំណើរទៅសហព័ន្ធរុស្ស៊ី ក្នុងពេលឆាប់ៗខាងមុខនេះ ដើម្បីបន្តការសិក្សាលើមុខជំនាញអាកាសចរណ៍ស៊ីវិល (វិស្វកម្មយន្តហោះ) ជំនាញផ្នែកវេជ្ជសាស្រ្ត (ទូទៅ និងឯកទេស) និងសេដ្ឋកិច្ចឌីជីថល រួមមាន៖ ផ្នែកសេដ្ឋកិច្ច គ្រប់គ្រង និងជំនាញផ្នែកដឹកជញ្ជូនផងដែរ។ ជំនួបសម្ដែងការគួរសមនេះ ធ្វើឡើងដើម្បីទទួលបាននូវអនុសាសន៍ ចំណេះដឹង និងបទពិសោធន៍ល្អៗទាក់ទងនឹងវិស័យផ្សេងៗ ជាពិសេសវិស័យសាធារណការ និងដឹកជញ្ជូន ដែលជាទុនក៏ដូចជាទស្សនទានដ៏មានតម្លៃសម្រាប់ការសិក្សានៅសហព័ន្ធរុស្ស៊ី។ ឆ្លៀតក្នុងឱកាសនេះ លោកជំទាវរដ្ឋលេខាធិការ បានក៏បានលើកឡើងផងដែរអំពីសមិទ្ធផលសម្រេចបានសំខាន់ៗក្រោមនយោបាយឈ្នះឈ្នះ និងការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបាននាំប្រទេសជាតិយើងឆ្លងកាត់មហា វិនាសកម្មដោយសារសង្គ្រាម និងអភិវឌ្ឍឈានឡើងលើគ្រប់វិស័យ។ ជាមួយគ្នានេះផងដែរ លោកជំទាវរដ្ឋលេខាធិការបានជំរុញលើកទឹកចិត្តឱ្យបេក្ខជនជ័យលាភីអាហារូបករណ៍ទាំងអស់ ខិតខំប្រឹងប្រែងរៀនសូត្រ ដើម្បីមុខមាត់គ្រួសារ ក៏ដូចជាមុខមាត់ប្រទេសជាតិ និងបាន បន្ថែមថា៖ នេះជាភ័ព្វសំណាងហើយដែលប្អូនៗបានរស់នៅក្រោមរបបដឹកនាំមួយដែលមានការគិតគូរគ្រប់ជ្រុងជ្រោយលើជោគវាសនា និងអនាគតរបស់ប្អូនៗទាំងអស់គ្នា។ លោកជំទាវរដ្ឋលេខាធិការ បានពាំនាំប្រសាសន៍សាកសួរសុខទុក្ខ និងការកោតសរសើរពីសំណាក់ឯកឧត្តមទេសរដ្ឋមន្ត្រី ដល់ក្រុមនិស្សិតជ័យលាភីទាំងអស់ ដែលបានប្រឡងជាប់អាហារូបករណ៍នេះ និងបានស្នើឱ្យពួកគេរក្សាអាកប្បកិរិយាវិជ្ជមាននៅពេលទៅសិក្សានៅប្រទេសគេ។ ជាទីបញ្ចប់ លោកជំទាវរដ្ឋលេខាធិការ បានពាំនាំនូវពាក្យស្លោកជាភាសាអង់គ្លេសរបស់ឯកឧត្តមទេសរដ្ឋមន្ត្រីថា៖ “I must study harder” ដែលមានន័យថា៖ “ខ្ញុំត្រូវតែខិតខំប្រឹងប្រែងរៀនសូត្រឱ្យកាន់តែខ្លាំងក្លាថែមទៀត” ជូនដល់និស្សិតទាំងអស់ផងដែរ៕