នាព្រឹកថ្ងៃចន្ទ ១១កើត ខែកក្តិក ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៥ ខែវិច្ឆិកា ឆ្នាំ២០២១ ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ អញ្ជើញដឹក នាំមន្ត្រីជំនាញចុះពិនិត្យការស្ថាបនាផ្លូវបេតុងមួយខ្សែ ចាប់ពីចំណុចផ្លូវបំបែកផ្លូវលេខ៧០២ (ផ្លូវអូរអារ៉េវ) រហូតដល់មុខសាលាយុត្តិធម៌ ស្ថិតនៅសង្កាត់លេខ១ ក្រុងព្រះសីហនុ ខេត្តព្រះសីហនុ។ ក្នុងឱកាសនោះ ឯកឧត្តម គួច ចំរើន អភិបាលខេត្តព្រះសីហនុ បានធ្វើការណែ នាំឱ្យក្រុមការងារបច្ចេកទេសសាងសង់ ត្រូវដាក់ដែកជើងទា ដើម្បីទ្រសសៃដែក ព្រោះវាមាន គុណភាពរឹងមាំ និងប្រើប្រាស់បានយូរអង្វែង ព្រមទាំងជំរុញឱ្យក្រុមកាងារសាងសង់ ត្រូវពន្លឿនការងារ សាងសង់ឱ្យបានលឿន ធានាបានបរិ មាណ គុណភាព និងសោភណភាព ហើយផ្លូវមួយខ្សែនេះ ជាផ្លូវមេដែលអាច ជួយសម្រួលចរាចរណ៍របស់ប្រជាពលរដ្ឋក្នុងក្រុង ព្រះសីហនុ។ រដ្ឋបាលខេត្ត នឹងបន្តខិតខំកៀរគររកប្រភពថវិកា បន្តអភិវឌ្ឍន៍ហេដ្ឋារចនាសម្ព័ន្ធ ផ្លូវថ្នល់នៅតាមក្រុងស្រុក ឃុំ សង្កាត់ ក្នុងខេត្តព្រះសីហនុ ដើម្បីឱ្យមានភាពទាក់ទាញ កាន់តែងាយស្រួល ក៏ដូចជាការធ្វើចរាចរណ៍របស់ បងប្អូនប្រជាពលរដ្ឋ និងភ្ញៀវទេសចរមក កាន់ខេត្តព្រះសីហនុនាពេលខាងមុខកាន់តែច្រើនបន្ថែមទៀត កាលណាយើងមានផ្លូវ គឺមានសង្ឃឹមក្នុងការអភិវឌ្ឍ។ សូមជម្រាបថា ផ្លូវបេតុងមួយខ្សែនេះ មានទទឹង ១០,២៥ម៉ែត្រ បណ្តោយ ២,២៦៦ម៉ែត្រ សាងសង់អំពីបេតុងឆ្អឹងដែកមានកម្រាស់ ០,២០ម៉ែត្រ ដែលជាគម្រោងអភិវឌ្ឍន៍ហេដ្ឋារចនា សម្ព័ន្ធប្រចាំឆ្នាំ២០២១ របស់រដ្ឋបាលខេត្តព្រះសីហនុ នៅក្នុងសង្កាត់លេខ១ ក្រុងព្រះសីហនុ។ នៅឆ្នាំ២០២២ខាងមុខ រដ្ឋបាលខេត្តនឹងបន្តគម្រោងស្ថាបនាផ្លូវបេតុងនេះបន្តទៀត ដែលនៅសល់ប្រវែងជាង ៧០០ម៉ែត្រ៕ ដោយ ងូ សុមុនី