(ភ្នំពេញ)៖ ក្រសួងសាធារណការ និងដឹកជញ្ជូន ចេញសេចក្តីជូនដំណឹងដល់បុគ្គលិកមន្ត្រីរាជការ និងបុគ្គលិកជាប់កិច្ចសន្យា នៃក្រសួងសាធារណការ និងដឹកជញ្ជូន ដែលមានសាច់ញាតិកូនចៅ មានអាយុ០៥ឆ្នាំ សូមយកទៅចាក់វ៉ាក់សាំងឱ្យបានគ្រប់ៗគ្នា តាមការកំណត់របស់គណៈកម្មការចំពោះកិច្ច ចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) ចាប់ពីថ្ងៃទី០៨- ១១ ខែវិច្ឆិកា ឆ្នាំ២០២១ខាងមុខនេះ។ នៅក្នុងសេចក្តីជូនដំណឹងរបស់ក្រសួងសាធារណការ និងដឹកជញ្ជូនដែល Fresh News ទទួលបានព្រឹកថ្ងៃទី០៥ ខែវិច្ឆិកា ឆ្នាំ២០២១នេះ បានឱ្យដឹងថា គ.វ.ក-១៩ នឹងរៀបចំយុទ្ធនាការចាក់វ៉ាក់សាំងកូវីដ-១៩ ជូនដល់សាច់ញាតិកូនចៅរបស់ឥស្សរជនជាន់ខ្ពស់ និងកូនចៅរបស់ថ្នាក់ដឹកនាំ បុគ្គលិកមន្ត្រីរាជការ និងបុគ្គលិកជាប់កិច្ចសន្យា ដែលមានអាយុ០៥ឆ្នាំ ដែលបានជូនដំណឹងដោយ គ.វ.ក-១៩ ហើយសម្រាប់ក្រសួងសាធារណការ និងដឹកជញ្ជូន ត្រូវបានកំណត់កាលបរិច្ឆេទ នៅថ្ងៃទី០៨- ១១ ខែវិច្ឆិកា ឆ្នាំ២០២១ខាងមុខនេះ ពេលព្រឹកម៉ោង ៨៖០០នាទី ដល់ម៉ោង ១១៖ ០០នាទី, ពេលរសៀលម៉ោង ១៤៖០០នាទី ដល់ម៉ោង ១៧៖០០នាទី។ សម្រាប់ទីកន្លែងចាក់វ៉ាក់សាំងកូវីដ-១៩ មានដូចជា៖ ១៖ ថ្នាក់ដឹកនាំក្រសួងជារដ្ឋលេខាធិការ ឬទីប្រឹក្សាក្រសួងមានឋានៈស្មើរដ្ឋលេខាធិការ សូមនាំសាច់ញាតិកូនចៅទៅទទួលការចាក់វ៉ាក់សាំងកូវីដ-១៩ នៅមន្ទីរពេទ្យកាល់ម៉ែត ចាប់ពីថ្ងៃទី៩-១១ ខែវិច្ឆិកា ឆ្នាំ២០២១។ ២៖ ថ្នាក់ដឹកនាំក្រសួងជាអនុរដ្ឋលេខាធិការ អគ្គនាយក អគ្គនាយករង ឬទីប្រឹក្សាក្រសួងមានឋានៈស្មើ សូមនាំសាច់ញាតិកូនចៅទៅទទួលការចាក់វ៉ាក់សាំង កូវីដ-១៩ នៅមន្ទីរពេទ្យព្រះអង្គឌួង ចាប់ពីថ្ងៃទី៩-១១ ខែវិច្ឆិកា ឆ្នាំ២០២១។ ៣៖ លោក-លោកស្រីជាបុគ្គលិកមន្ត្រីរាជការ ដែលមានតួនាទីជាប្រធាននាយកដ្ឋាន/ អនុប្រធាននាយកដ្ឋាន ទីប្រឹក្សាក្រសួង ប្រធានការិយាល័យ/ អនុប្រធានការិយាល័យ បុគ្គលិកក្របខណ្ឌ និងបុគ្គលិកជាប់កិច្ចសន្យា សូមនាំសាច់ញាតិកូនចៅទៅទទួលការចាក់វ៉ាក់សាំងកូវីដ-១៩ នៅមន្ទីពេទ្យកុមារជាតិ ចាប់ពីថ្ងៃទី ៨-១០ ខែវិច្ឆិកា ឆ្នាំ២០២១៕