[Phnom Penh Post] - អភិបាលខេត្តផ្អាកវាយតម្លៃការងារប្រធានមន្ទីរម្នាក់ ករណីប្រព្រឹត្តអំពើមិនសមរម្យ
2021-11-02
Go to the website published Phnom Penh Post
កំពង់ចាមៈ លោក អ៊ុន ចាន់ដា អភិបាលខេត្តកំពង់ចាមបានសម្រេចផ្អាកវាយតម្លៃការងារលោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តនេះរយៈពេល ២ ឆ្នាំចំពោះការធ្វើសកម្មភាពមិនសមរម្យ ដោយបានផឹកស្រាស្រវឹង ហើយចូលទៅអុកឡុកក្នុងពិធីប្រកាសចូលកាន់តំណែងជាផ្លូវការរបស់លោក សុខ លឹមហៀង ប្រធានមន្ទីរសាធារណការ និងដឹកជញ្ជូនខេត្តកំពង់ចាម កាលពីថ្ងៃទី ២៨ ខែតុលា ឆ្នាំ ២០២១។
យោងតាមលិខិតព្រមានចុះថ្ងៃទី ២៩ ខែ តុលា ឆ្នាំ ២០២១ ដែល ភ្នំពេញ ប៉ុស្តិ៍ ទទួលបានកាលពីថ្ងៃចន្ទ លោក អ៊ុន ចាន់ដា បានចាត់ទុកសកម្មភាពនោះថា ជាអំពើមិនគប្បី និងធ្វើឱ្យបាត់បង់សេចក្តីថ្លៃថ្នូរកិត្តិយសជាមន្ត្រីរាជការ និងបានធ្វើឱ្យប៉ះពាល់ដល់កិត្តិយសថ្នាក់ដឹកនាំខេត្ត ថ្នាក់ដឹកនាំក្រសួងថែមទៀតផង។
លោក ចាន់ដា បានបញ្ជាក់ក្នុងលិខិតនោះថា៖ «រដ្ឋបាលខេត្តសម្រេចផ្អាកធ្វើការវាយតម្លៃស្នើសុំគ្រឿងឥស្សរិយយសការងាររយៈពេល ២ ឆ្នាំ រួមទាំងការវាយតម្លៃស្នើសុំដំឡើងថ្នាក់ ដំឡើងឋានន្តរស័ក្តិ រយៈពេល ២ ឆ្នាំចំពោះ លោក អ៊ុម វិបុល»។
ក្នុងលិខិតព្រមានដដែលនោះ លោក ចាន់ដា ក៏បានណែនាំឱ្យលោក អ៊ុម វិបុល កែប្រែឥរិយាបថ ដោយបញ្ឈប់ការយកម៉ោងការងារទៅដើរផឹកគ្រឿងស្រវឹងបង្កបាតុភាព ឬធ្វើសកម្មភាពទាំងឡាយណាដែលធ្វើឱ្យបាត់បង់កិត្តិយស សេចក្ដីថ្លៃថ្នូរជាអ្នកដឹកនាំ និងជាអ្នករាជការ។ ប៉ុន្តែត្រូវមានទំនាក់ទំនងជិតស្និទ្ធជាមួយមន្ទីរ អង្គភាពជុំវិញខេត្ត និងរដ្ឋបាលក្រុង ស្រុក ដោយត្រូវគោរពវិន័យ និងពេលវេលាបំពេញការងារនៅក្នុងអង្គភាពឱ្យបានជាប់លាប់ហើយគ្រប់បេសកកម្ម និងការសុំច្បាប់ឈប់សម្រាកត្រូវមានការអនុញ្ញាតពីអភិបាលនៃគណៈអភិបាលខេត្ត។
ជាមួយគ្នានេះ លោកបានជំរុញឱ្យលោក អ៊ុម វិបុល អនុវត្តតាមសេចក្ដីណែនាំខាងលើឱ្យបានត្រឹមត្រូវ ដើម្បីចៀសវាងកើតមានកំហុសជាថ្មីទៀតនៅពេលក្រោយ។ លោកបានបញ្ជាក់បន្ថែមថា៖ «ក្នុងករណីមិនរាងចាលរដ្ឋបាលខេត្តនឹងចាត់វិធានការតាមច្បាប់ស្ដីពីសហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជា និងច្បាប់ពាក់ព័ន្ធនានាដោយមិនមានការយោគយល់ទៀតឡើយ»។
ជុំវិញករណីនេះ លោក អ៊ុម វិបុល ប្រធានមន្ទីរធនធានទឹកខេត្តកំពង់ចាម មិនអាចទាក់ទងស្នើសុំការពន្យល់បានទេ កាលពីថ្ងៃទី ១ ខែវិច្ឆិកា ឆ្នាំ ២០២១។ ប៉ុន្តែយោងតាមចំណាររបស់លោកលើលិខិតព្រមាននោះ និងដែលលោកទទួលបានកាលពីថ្ងៃទី ៣០ ខែតុលា ឆ្នាំ ២០២១ បានចារបញ្ជាក់ថា៖ «ខ្ញុំបាទបានទទួលដោយសេចក្ដីគោរពដ៏ខ្ពង់ខ្ពស់»។
ចំណែក លោក សុខ លឹមហៀង ប្រធានមន្ទីរសាធារណការ និងដឹកជញ្ជូនខេត្តកំពង់ចាម កាលពីថ្ងៃទី ១ ខែវិច្ឆិកា ឆ្នាំ ២០២១ បានបដិសេធធ្វើអធិប្បាយបន្ថែមពីលើលិខិតព្រមានរបស់លោក អ៊ុន ចាន់ដា ដោយលោកបានប្រាប់ ភ្នំពេញ ប៉ុស្តិ៍ថា ករណីរបស់លោក អ៊ុម វិបុល ប្រធានមន្ទីរធនធានទឹក និងឧតុនិយម ត្រូវបានគណៈអភិបាលខេត្តចាត់វិធានការដោយព្រមានជាលាយលក្ខណ៍អក្សររួចរាល់ហើយ «ខ្ញុំគ្មានអ្វីត្រូវអធិប្បាយបន្ថែមនោះទេ»។
គួររំឭកថា កាលពីរសៀលថ្ងៃទី ២៨ ខែ តុលា ឆ្នាំ ២០២១ មានពិធីប្រកាសតែងតាំងតំណែង លោក សុខ លឹមហៀង ដែលជាអនុប្រធានមន្ទីរសាធារណការ និងដឹកជញ្ជូនខេត្តកំពង់ចាមទៅជាប្រធានមន្ទីរនេះ ជំនួសលោក សុខ ស្រ៊ុន ដែលត្រូវបានផ្លាស់ទៅទទួលភារកិច្ចថ្មីនៅក្រសួងសាធារណការ និងដឹកជញ្ជូន។
ពិធីផ្ទេរតំណែងនោះធ្វើឡើងនៅក្នុងសាលាខេត្តកំពង់ចាមក្រោមអធិបតីភាពលោក ស៊ុយ សាន រដ្ឋលេខាធិការក្រសួងសាធារណការ និងដឹកជញ្ជូន និងលោក អ៊ុន ចាន់ដា អភិបាលខេត្តកំពង់ចាម។ ក៏ប៉ុន្តែនៅក្នុងពេលនោះ លោក អ៊ុម វិបុលដែលកំពុងស្ថិតក្នុងស្ថានភាពស្រវឹងស្រាជោកជាំបានធ្វើសកម្មភាពចូលទៅអុកឡុកក្នុងពិធីនោះ ដោយប្រើកាយវិការ និងពាក្យពេចន៍មិនសមរម្យ ធ្វើឱ្យបាត់បង់នូវកិតិ្តយស និងសេចក្ដីថ្លៃថ្នូររបស់ខ្លួនក្នុងនាមជាថ្នាក់ដឹកនាំនៃអង្គភាពមួយ និងប៉ះពាល់ដល់កិត្តិយស និងសេចក្ដីថ្លៃថ្នូររបស់ថ្នាក់ដឹកនាំខេត្ត និងក្រសួងស្ថាប័នពាក់ព័ន្ធផងដែរ៕
