[Rasmei Kampuchea Daily News] - អន្តរក្រសួងប្រជុំពិភាក្សាស្តីពីការ ត្រៀមរៀបចំព្រឹត្តិការណ៍កីឡាស៊ីហ្គេមដែលកម្ពុជានឹងធ្វើជាម្ចាស់ផ្ទះ
ភ្នំពេញ៖ថ្ងៃទី១៩ ខែតុលា ឆ្នាំ២០២១ នៅទីស្ដីការក្រសួង លោក តូច ចាន់កុសល រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន បាន អញ្ជើញដឹកនាំគណៈប្រតិភូក្រសួង និងអ្នកជំនាញពាក់ព័ន្ធចូលរួមកិច្ចប្រជុំស្តីពីការត្រៀមរៀបចំព្រឹត្តិការណ៍កីឡាស៊ីហ្គេម(SEA GAMES) និងកីឡាជនពិការ អាស៊ានប៉ារ៉ាហ្គេម (ASEAN PARA GAMES) ឆ្នាំ២០២៣ តាមប្រព័ន្ធវីដេអូពីចម្ងាយ ក្រោមអធិបតីភាពលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការជាតិអូឡាំពិកកម្ពុជា (NOCC) និងជាអនុប្រធានអចិន្ត្រៃយ៍ នៃគណៈកម្មការរៀបចំការប្រកួតកីឡាស៊ីហ្គេម ឆ្នាំ២០២៣ (CAMSOC) ដោយមានការចូលរួមពីតំណាងក្រសួង-ស្ថាប័នពាក់ព័ន្ធ។
សូមជម្រាបជូនថា៖ ព្រះរាជាណាចក្រកម្ពុជា កំពុងត្រៀមរៀបចំព្រឹត្តិការណ៍កីឡាថ្នាក់តំបន់អាស៊ីអាគ្នេយ៍ ស៊ីហ្គេម លើកទី៣២ ឆ្នាំ២០២៣ខាងមុខ ក្នុងនោះរួមមាន៖ ការកសាងនូវហេដ្ឋារចនាសម្ព័ន្ធ ការកសាងសមត្ថភាពអត្តពលិក ការត្រៀមរៀបចំកញ្ចប់ថវិកាជាតិ ក្រសួង-ស្ថាប័នទទួលបន្ទុកការងាររៀបចំ ដើម្បីឈានទៅសម្រេចជោគជ័យជាប្រវត្តិសាស្ត្រជាលើកដំបូងរបស់ខ្លួនក្នុងការទទួលធ្វើជាម្ចាស់ផ្ទះ។
កិច្ចប្រជុំនេះធ្វើឡើងក្នុងគោលបំណងដើម្បីប្រមូលធាតុចូល ក៏ដូចជាមតិយោបល់ពីតំណាងក្រសួង-ស្ថាប័នពាក់ព័ន្ធ ដោយផ្តោតការពិភាក្សាលើរបៀបវារៈសំខាន់ៗរួមមាន៖ ការដឹកជញ្ជូនក្នុងអំឡុងពេល ព្រឹត្តិការណ៍កីឡា ទីតាំងប្រកួត តម្រាយផ្លូវដឹកជញ្ជូនកីឡាករក្នុងការចូលរួមកម្មវិធីបើកនិងកម្មវិធីបិទ កន្លែងស្នាក់នៅសម្រាប់កីឡាករ តម្រូវការប្រើប្រាស់រថយន្តនិងប្រភេទរថយន្ត ការសាងសង់ភូមិកីឡា ការស្នាក់នៅ និងការផ្គត់ផ្គង់ម្ហូបអាហារសម្រាប់កីឡាករ ភ្ញៀវVVIP និងVIP អាជ្ញាកណ្តាល ចៅក្រម និងអ្នកបច្ចេកទេសកីឡា ការដឹកជញ្ជូនមុន និងក្រោយព្រឹត្តការណ៍កីឡា បញ្ហាប្រឈម ដំណោះស្រាយ និងសំណូមពរ៕
