[Rasmei Kampuchea Daily News] - ក្រសួងសាធារណការប្រជុំពិនិត្យវឌ្ឍនភាពការងារក្នុងការរៀបចំផែនការមេបច្ចេកវិទ្យាសម្រាប់វិស័យសាធារណការ និងដឹកជញ្ជូន
ភ្នំពេញ៖ ក្រសួងសាធារណការនិងដឹកជញ្ជូន បានបើកកិច្ចប្រជុំលើកទី២ ដើម្បីពិនិត្យមើលវឌ្ឍនភាពការងារក្នុងការរៀបចំផែនការមេបច្ចេកវិទ្យាសម្រាប់វិស័យសាធារណការ និងដឹកជញ្ជូន ដោយមានការចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីថ្នាក់ដឹកនាំ សមាជិក និងសមាជិកានៃគណៈកម្មការ កាលពីថ្ងៃទី១២ ខែតុលា ឆ្នាំ២០២១
នៅទីស្តីការក្រសួង។
លោក ឈួន វិន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មការរៀបចំផែនការមេបច្ចេកវិទ្យាសម្រាប់វិស័យសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំនេះ។
កិច្ចប្រជុំនេះមានការធ្វើបទបង្ហាញដោយក្រុមការងារបច្ចេកទេសអំពីវឌ្ឍនភាពការងារ ដែលក្រុមការងារ សម្រេចបាន ក្នុងការប្រមូលលិខិតបទដ្ឋានគតិយុត្តិនានា និងធាតុចូលសំខាន់ៗពីអង្គភាពពាក់ព័ន្ធ ដើម្បីអាចឈានទៅរៀបចំចេញនូវសេចក្ដីព្រាងផែនការមេបច្ចេកវិទ្យា ព្រមទាំងលើកឡើងពីបញ្ហាប្រឈម និងដំណោះស្រាយមួយចំនួន ដែលកើតមានក្នុងកំឡុងពេលអនុវត្តការងារកន្លងមក។
សូមជម្រាបថា ផែនការមេបច្ចេកវិទ្យាសម្រាប់វិស័យសាធារណការ និងដឹកជញ្ជូននេះ ត្រូវបានរៀបចំឡើងក្នុងគោលដៅស្របតាមក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ឆ្នាំ២០២១-២០៣៥ ដែលរាជរដ្ឋាភិបាល កាលពីខែឧសភា ឆ្នាំ២០២១ កន្លងទៅ បានសម្រេចដាក់ចេញ និងកំពុងរៀបចំបញ្ចប់ក្របខ័ណ្ឌគោលនយោបាយរដ្ឋាភិបាលឌីជីថល ឆ្នាំ២០២១-២០៣០ ដើម្បីកសាងសេដ្ឋកិច្ច និងសង្គមឌីជីថលរស់រវើក តាមរយៈការធ្វើបដិវត្តកម្មឌីជីថល នៅគ្រប់តួអង្គពាក់ព័ន្ធសំខាន់ៗ ជាពិសេសរាជរដ្ឋាភិបាល វិស័យឯកជន ប្រជាពលរដ្ឋ និងធុរកិច្ចជន ដើម្បីជំរុញសន្ទុះកំណើនសេដ្ឋកិច្ចជាតិ និងលើកកម្ពស់សុខុមាលភាពសង្គមដោយផ្អែកលើគន្លងប្រក្រតីភាពថ្មី៕
