ថ្ងៃសុក្រ ១១កើត ខែភទ្របទ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៧ ខែកញ្ញា ឆ្នាំ២០២១ នៅទីស្ដីការក្រសួង លោក ចៅ សុភៈភិបាល អគ្គនាយករង នៃអគ្គនាយកដ្ឋានប្រព័ន្ធចម្រោះទឹកកខ្វក់ក្រសួងសាធារណការ និងដឹកជញ្ជូន និងជានាយកគម្រោង បានដឹកនាំកិច្ចប្រជុំពិនិត្យវឌ្ឍនភាពការងារ និងផ្សព្វផ្សាយពីក្រមសីលធម៌របស់មន្រ្តី នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមហិរញ្ញប្បទានឥណទានសម្បទានរបស់ធនាគារពិភពលោក (World Bank) ដោយមានការអញ្ជើញចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីមន្រ្តីពាក់ព័ន្ធក្នុងគម្រោងទឹកកខ្វក់ក្នុងក្រុងសៀមរាប ខេត្តសៀមរាប។ កិច្ចប្រជុំនេះរៀបចំឡើងក្នុងគោលបំណងពិនិត្យ ពិភាក្សាលើលទ្ធផលការងារបច្ចេកទេស កិច្ចលទ្ធកម្ម កិច្ចការហិរញ្ញវត្ថុ ការធ្វើសវនកម្មគម្រោង កិច្ចគាំពារបរិស្ថាន និងសង្គម ដែលបានអនុវត្តកន្លងមក និងយុទ្ធវិធីបន្តសកម្មភាពទៅថ្ងៃមុខ ដោះស្រាយបញ្ហាប្រឈម ព្រមទាំងជំរុញការអនុវត្តនូវសកម្មភាពការងារនៃគម្រោងលើកកម្ពស់ការផ្គត់ផ្គង់ទឹកស្អាតនិងអនាម័យទៅតាមផែនការដែលបានគ្រោងទុក។ លោកនាយកគម្រោង បានលើកឡើងអំពីយុទ្ធសាស្ត្រ ការពង្រឹងកិច្ចការងារ ក្នុងគោលបំណង ដើម្បីធានាប្រតិបត្តិការ និងថែទាំប្រព័ន្ធចម្រោះទឹកកខ្វក់ ប្រកបដោយសមធម៌ និរន្តរភាព ជាពិសេសចូលរួមថែរក្សាអនាម័យ សុខភាពសាធារណៈ ព្រមទាំងលើកកម្ពស់សោភ័ណភាព និង កែលម្អបរិស្ថានធម្មជាតិ ។ ជាមួយគ្នានោះផងដែរ លោកនាយកគម្រោង បានជំរុញលើកទឹកចិត្តឱ្យក្រុមការងារអនុវត្តគម្រោងស្វែងយល់ពីវិធានប្រតិបត្តិគោលការណ៍គ្រឹះនៃក្រមសីលធម៌មន្ត្រីមានសមត្ថកិច្ច ក្នុងការសិក្សារៀបចំគម្រោង ហើយអ្នកអនុវត្ត និងអ្នកគ្រប់គ្រងគម្រោងហេដ្ឋារចនាសម្ព័ន្ធរូបវន្តសាធារណៈ ត្រូវមានការយកចិត្តទុកដាក់ខ្ពស់ក្នុងការ ពង្រឹងគុណភាពកិច្ចការងារ មានសីលធម៌វិជ្ជាជីវៈ និងគណនេយ្យភាព រួមចំណែកដល់ការធានាបាននូវនិរន្តរភាព និងប្រសិទ្ធភាព៕