[Rasmei Kampuchea Daily News] - ក្រសួងសាធារណការ កំពុងសិក្សាជ្រើសរើសខ្សែផ្លូវអាទិភាព សម្រួលដល់ការធ្វើដំណើរបស់ប្រជាពលរដ្ឋ និងការដឹកជញ្ជូនទំនិញ
ភ្នំពេញ៖ ក្រសួងសាធារណការនិងដឹកជញ្ជូន បាននិងកំពុងពិភាក្សាដើម្បីជ្រើសរើសខ្សែផ្លូវអាទិភាពណាដែលសម្រួលដល់ការធ្វើដំណើរបស់ប្រជាពលរដ្ឋ និងការដឹកជញ្ជូនទំនិញ។
ពាក់ព័ន្ធនឹងគម្រោងនេះ កាលពីថ្ងៃទី១៥ ខែកញ្ញា ឆ្នាំ២០២១ លោក សួង ហេង រដ្ឋលេខាធិការក្រសួងសាធារណការនិងដឹកជញ្ជូន បានដឹកនាំកិច្ចប្រជុំក្រុមការងារជំនាញបច្ចេកទេសរបស់ក្រសួងសាធារណការ និងដឹកជញ្ជូន ដោយមានការចូលរួមពីអគ្គនាយក និងមន្ត្រីជំនាញបច្ចេកទេសពាក់ព័ន្ធក្រោមឱវាទក្រសួង ដើម្បីពិនិត្យ និងពិភាក្សាលើគម្រោងផែនការបីឆ្នាំរំកិល ២០២២-២០២៤ ការងារសាងសង់ហេដ្ឋារចនាសម្ព័ន្ធផ្លូវ ថ្នល់ ស្ពាន ស្ថិតក្រោមអាណាប័ករបស់ក្រសួងសាធារណការ និងដឹកជញ្ជូន ដែលប្រើប្រាស់ថវិកាជាតិ។
កិច្ចប្រជុំនេះបានធ្វើឡើងដើម្បីជ្រើសរើសខ្សែផ្លូវអាទិភាព ដើម្បីអនុវត្តឱ្យចំគោលដៅ និងប្រកបដោយប្រសិទ្ធភាព សម្រួលដល់ការធ្វើដំណើរបស់ប្រជាពលរដ្ឋ ក៏ដូចជាការដឹកជញ្ជូនទំនិញ៕
